ساتپاەۆ: «سوعىس ناسيحاتشىلارىن قازاقستانعا شاقىرعاندار جازالانۋى كەرەك»
ساياساتتانۋشى دوسىم ساتپاەۆ قازاقستانعا رەسەيدىڭ سوعىس ناسيحاتشىلارىن شاقىرعانداردى قىلمىستىق جاۋاپكەرشىلىككە تارتۋ كەرەك ەكەنىن ايتتى.
«نيەت پەن ساياسي جىگەر بولسا، ۋكرايناداعى سوعىستى قولدايتىن شوۋ بيزنەستەگى لەپس سياقتى ءپۋتيننىڭ ناسيحاتشىلارىن قازاقستانعا كونتسەرت قويۋعا شاقىرىپ جۇرگەندەردى قىلمىستىق جاۋاپكەرشىلىككە تارتۋعا بولادى. ويتكەنى ولاردىڭ قازاقستانعا كەلۋىنىڭ ءوزى سوعىستى ناسيحاتتاۋ بولىپ سانالادى. ولار 2022 جىلعى 24 اقپاننان باستاپ ونەر يەسى دەگەن اتتان ناسيحاتتاۋشى دەگەن اتقا وتكەن. ەرتەڭ-اق تۋرا وسىنداي سوزدەرىمەن قازاقستاننىڭ تاۋەلسىزدىگىنە، اۋماقتىق تۇتاستىعىنا كۇمان كەلتىرەتىن بولادى»،-دەپ جازدى ساياساتتانۋشى ءوزىنىڭ Facebook پاراقشاسىندا.
ايتا كەتەيىك، رەسەيلىك انشىلەر گريگوري لەپس پەن نيكولاي باسكوۆ وسىدان ءبىراز ۋاقىت بۇرىن ۋكراينا تانكتەرىن جارىپ جىبەرگەندەرگە ارقايسىسى 1 ميلليون رۋبلدەن تولەيتىنىن ايتقان. سۇيتكەن گريگوري لەپس شىلدە ايىندا قوناەۆ قالاسىنا كونتسەرتىن وتكىزۋگە كەلمەك.
فوتو: اشىق دەرەككوزدەن
Abai.kz
