بۇل تۋرالى اقوردادا گەرمانيا پرەزيدەنتى فرانك-ۆالتەر شتاينمايەرمەن كەلىسسوزدەردەن كەيىنگى باق وكىلدەرىنە بىرلەسكەن مالىمدەمە بارىسىندا مەملەكەت باسشىسى قاسىم-جومارت توقاەۆ ايتتى. 

«ەڭ الدىمەن شاقىرۋىمدى قابىل الىپ، قازاقستانعا ارنايى ساپارمەن كەلگەنىڭىز ءۇشىن ريزاشىلىعىمدى بىلدىرەمىن. بۇل ساپار ەكى ەل اراسىنداعى ىنتىماقتاستىقتى دامىتۋعا تىڭ سەرپىن بەرەرى ءسوزسىز. ءبىز بۇگىن گەرمانيا پرەزيدەنتى فرانك-ۆالتەر شتاينمايەر مىرزامەن كەلىسسوزدەر جۇرگىزدىك. ەكىجاقتى بايلانىستاردى نىعايتۋ جولدارىن تالقىلادىق. سونداي-اق وزەكتى حالىقارالىق ماسەلەلەر جونىندە پىكىر الماستىق»، - دەدى مەملەكەت باسشىسى.

پرەزيدەنتتىڭ اتاپ وتۋىنشە، بيىل قازاقستان مەن گەرمانيا اراسىندا ديپلوماتيالىق قارىم-قاتىناس ورناعانىنا 31 تولدى. وسى ۋاقىت ىشىندە جوعارى دەڭگەيدەگى ساياسي ديالوگ قالىپتاستى. ءوزارا ءتيىمدى ساۋدا-ەكونوميكالىق جانە ينۆەستيتسيالىق ىنتىماقتاستىق قارقىندى دامۋدا. مادەني-گۋمانيتارلىق بايلانىستاردىڭ اياسى كەڭەيدى.

«سەرىكتەستىكتى جانداندىرۋ ءۇشىن الەۋەتىمىز مول ەكەنىن اتاپ وتكىم كەلەدى. اتاپ ايتقاندا، ماڭعىستاۋداعى جاسىل سۋتەگىن وندىرۋگە ارنالعان بىرلەسكەن جوبانىڭ ماڭىزى زور. نەمىستىڭ وزىق تەحنولوگياسى مەن تاجىريبەسى نەگىزىندە كاسىبي ماماندار دايىنداۋ قاجەت. وسى رەتتە اقتاۋدا قازاق-نەمىس ينجينيرينگ ينستيتۋتى اشىلادى. بۇل جوبالار ەكى ەلدىڭ ستۋدەنتتەرى مەن ماماندارى اراسىندا تاجىريبە الماسۋعا جول اشادى. ەكونوميكانى، ءوندىرىس سالاسىن بىلىكتى كادرلارمەن قامتاماسىز ەتۋگە مۇمكىندىك بەرەدى»، - دەدى قاسىم-جومارت توقاەۆ.

Abai.kz