سولتۇستىك قازاقستان وبلىسىنىڭ اكىمى ايداربەك ساپاروۆ جاقىن اعايىندارىنىڭ وڭىردە تابىستى كاسىپپەن اينالىسۋىنا بايلانىستى پىكىر ءبىلدىردى. 

ورتالىق كوممۋنيكاتسيالار قىزمەتى الاڭىندا وتكەن بريفينگتە سقو اكىمىنە بىلاي سۇراق قويىلدى: «ءسىزدىڭ جاقىن تۋىستارىڭىز سقو-دا اگروبيزنەسپەن وتە تابىستى اينالىسىپ وتىر. وبلىس باسشىسى اعاسى بولعاندا ءىستىڭ تابىستى بولارى انىق. ءسىز بۇل جاعدايدى مۇددەلەر ىقپالداستىعى دەپ ەسەپتەمەيسىز بە؟»

«بىرىنشىدەن، مەنىڭ وبلىس اكىمى بولىپ تاعايىندالعانىما ءبىر جىل دا بولعان جوق. ال، مەنىڭ اعام ەگىنشىلىكپەن 1995 جىلدان باستاپ اينالىسىپ كەلەدى. ول – اگرونوم عالىم، ومبى اۋىلشارۋاشىلىعى ينستيتۋتىن بىتىرگەن. اۋىل شارۋاشىلىعى سالاسىن جاقسى بىلەدى، سوندىقتان قولعا العان. بۇل جەردە ەشقانداي ماسەلە جوق. بارلىعى زاڭ اياسىندا»، - دەپ جاۋاپ بەردى ايداربەك ساپاروۆ.

سونداي-اق، ءوڭىر اكىمى «اعاسىنىڭ بيزنەسىنە بولىنگەن سۋبسيديانى» باس پروكۋراتۋرانىڭ تەكسەرگەنىن ايتتى.

«سۋبسيديا العان» دەگەن جالعان اقپاراتتار بولدى، ونى باس پروكۋراتۋرا تەكسەردى. قولدانىستاعى زاڭ اياسىندا ول سۋبسيديا الا الادى. مەنىڭ وبلىس باسشىسى بولعانىم، كەرىسىنشە ونىڭ جۇمىس ىستەۋىنە قيىندىق تيگىزەدى. ويتكەنى، ءبىز قازىر الەۋمەتتىك سالاعا اسا ءمان بەرىپ جاتىرمىز. ونىڭ قانشاما تۇرعىن ءۇي، مەديتسينالىق پۋنكتىلەر مەن دەمالىس ورتالىقتارىن سالعانىن ءوز كوزىڭىزبەن كورسەڭىز بولادى. ول باسقالارعا ۇلگى بولۋى ءتيىس»، - دەيدى سقو اكىمى.

فوتو:gov.kz

Abai.kz