ءماجىلىس دەپۋتاتى ابزال قۇسپان قاماۋداعى قايرات ساتىبالدى "ۇشقوڭىرداعى رەزيدەنتسياسىن نازارباەۆقا سىيلاعانى جايلى" ازاتتىق زەرتتەۋىنە بايلانىستى باس پروكۋراتۋراعا ساۋال ازىرلەپ جاتقانىن ايتتى.

"بۇل قولدانىستاعى قىلمىستىق-پروتسەستىك كودەكستىڭ تالاپتارىن ورەسكەل بۇزۋ. ءبىر ەمەس، بىرنەشە زاڭنىڭ بۇزىلۋىنا كۋا بولىپ وتىرمىز...باق تۋرالى زاڭعا سايكەس، ەگەر ول شىندىققا سايكەس بولماسا مەملەكەتتىك ورگاندار تەرىستۋى ءتيىس. كەشە كورگەنىم، باس پروكۋراتۋرا اتىنا دا، قۇزىرلى ورگاندارعا ساۋال جولدانعان. وعان ءتيىستى جاۋاپ تا بەرىلمەگەن" دەدى دەپۋتات.

ءبىر كۇن بۇرىن ازاتتىق سايتى الماتى وبلىسى، ۇشقوڭىر جايلاۋىنداعى رەزيدەنتسيانى قايرات ساتىبالدى نەمەرە اعاسى، قازاقستاننىڭ بۇرىنعى پرەزيدەنتى نۇرسۇلتان نازارباەۆقا سىيعا تارتقانى جونىندە زەرتتەۋ جاريالاعان.

بيىل ءساۋىردىڭ ورتاسىندا بۇرىن ساتىبالدىنىڭ اتىندا تۇرعان جايلاۋداعى وسى رەزيدەنتسيا اعاسى، قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ يەلىگىندەگى "ەلباسى" قورىنىڭ مەنشىگىنە وتكەن. ازاتتىق راديوسىنا "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ بەرگەن جاۋابىنا سايكەس، مۇلىكتىڭ مەنشىك قۇقىعى سىيعا تارتۋ شارتى بويىنشا وزگەرگەن. بىراق ونىڭ قالاي جۇزەگە اسقانى جۇمباق.

قايرات ساتىبالدى بىلتىر قىركۇيەكتە سەرىكتەرىمەن بىرگە 40 ميلليارد تەڭگەنى تالان-تاراجعا سالدى دەگەن ايىپپەن قىلمىستىق كودەكستىڭ ءۇش بابى بويىنشا كىنالى دەپ تانىلىپ، 6 جىلعا بوستاندىعىنان ايىرىلدى.

ماۋسىم ايىندا ءماجىلىس دەپۋتاتى ماقسات تولىقباي قايرات ساتىبالدى تەرگەۋدە ءجۇرىپ، الماتى ورتاسىنداعى Double Tree by Hilton Almaty قوناقۇيىن ساتىپ العانىن ايتقان. ونىڭ ايتۋىنشا، "تەرگەلىپ، يزولياتوردا وتىرعانىنا قاراماستان", قايرات ساتىبالدى "قۇجاتتارعا يە بولىپ، نوتاريۋسپەن جانە كەلىسسوز جۇرگىزۋشىلەرمەن ۇدايى بايلانىس جاساعان". ناتيجەسىندە قۇنى 6 ميلليارد تەڭگە بولاتىن ساتىپ الۋ كەلىسىمى جاسالعان.

ىزىنشە جەمقورلىققا قارسى ءىس-قيمىل اگەنتتىگى ينتەرنەتتە تالقىلانعان دەپۋتات ماقسات تولىقبايدىڭ "ەكس-پرەزيدەنتتىڭ نەمەرە ءىنىسى قايرات ساتىبالدى قاماۋدا وتىرىپ، قىمبات قوناقۇي ساتىپ الدى" دەگەن مالىمدەمەسىن جوققا شىعارعان.

ءبىر جىل بۇرىن ازاتتىق ۇشقوڭىردا 9 مىڭ گەكتاردان استام جەر بولات نازارباەۆتىڭ كومپانيالارىنا تيەسىلى ەكەنىن انىقتاعان. ول كومپانيالار بۇرىن قايرات ساتىبالدىعا قاراعان.

الماتى وبلىسىنىڭ پروكۋراتۋراسى ازاتتىققا بۇرىنعى پرەزيدەنتتىڭ تۋىستارىنان (پروكۋراتۋرا ەسىمدەرىن اتامادى) جيىنى 4569 گەكتار بولاتىن 12 جەر ۋچاسكەسى مەملەكەتكە قايتارىلعانىن حابارلاعان.

دەگەنمەن قازىر ۇشقوڭىر سارايى نۇرسۇلتان نازارباەۆتىڭ، ال اينالاسىنداعى مىڭداعان گەكتار جەر ونىڭ تۋىستارىنىڭ مەنشىگىندە. بيىل ساۋىردە سارايدىڭ مەنشىك قۇقىعى اۋىسقان ۋاقىتتا مۇنداعى جەر ۋچاسكەلەرىن يەلىك ەتىپ وتىرعان كومپانيالاردىڭ تۇپكى قۇرىلتايشىسى دا اۋىسقان.

فوتو: اشىق دەرەككوزدەن

Abai.kz