جۋرناليست دۋمان مۇحاممەدكارىم 48 ساعاتقا قاماۋعا الىندى، بۇگىن كەشكە نە ەرتەڭ ونى 2 ايعا قاماۋ تۋرالى سوت وتەدى. بۇل جونىندە ءجۋرناليستىڭ ادۆوكاتى عالىم نۇرپەيىسوۆ حابارلاعان.

ونىڭ ايتۋىنشا، جۋرناليست "ەكسترەميزمدى قارجىلاندىرۋ" جانە "تىيىم سالىنعان ۇيىمنىڭ ىسىنە ارالاسۋ" بابى بويىنشا كۇدىكتى دەپ تانىلعان. ءىستىڭ قوزعالۋىنا ءجۋرناليستىڭ قۋعىنداعى ەكس-بانكير مۇحتار ءابليازوۆتان سۇحبات الۋى تۇرتكى بولعان دەپ ايتىلادى.

ادۆوكات عالىم نۇرپەيىسوۆتىڭ ايتۋىنشا، جۋىردا عانا اشتىعىن توقتاتقان دۋمان مۇحاممەدكارىمنىڭ دەنساۋلىعى ناشارلاعان. ءبىر كۇن بۇرىن يزولياتوردا بۇيرەگىنەن “پريستۋپ” ۇستاعان. وعان مەديتسينالىق تەكسەرۋدەن وتۋگە رۇقسات بەرىلمەگەن. قازىر جۋرناليست ىلە اۋداندىق پوليتسيا باسقارماسىنىڭ ۋاقىتشا قاماۋ يزولياتورىندا وتىر.

بۇگىن، 22 ماۋسىمدا ول 25 كۇن اكىمشىلىك قاماۋدان كەيىن شىعۋى ءتيىس بولاتىن. الايدا “ەكسترەميزمدى قارجىلاندىرۋ” جانە “تىيىم سالىنعان ۇيىمنىڭ ىسىنە ارالاسۋ” باپتارى بويىنشا قىلمىستىق ىستە كۇدىكتى تانىلعان ءجۋرناليستى تەرگەۋشىلەر يزولياتوردان جىبەرمەگەن.

پوليتسيا باسقارماسىنىڭ الدىندا تۋىستارى مەن جاقتاستارى ءجۋرناليستى بوساتۋدى تالاپ ەتكەن. جاقتاستارى باسقارمادان شىققان كولىكتى شىعارماي، جولىن بوگەۋگە تىرىسقان. ءبىر ءسات ەكى جاق جۇلقىسىپ تا قالدى. كەيىن پوليتسيا قىزمەتكەرلەرى جينالعانداردى ەكى جاققا يتەرىپ، كولىكتىڭ شىعۋىنا جاعداي جاساعان.

YouTube جەلىسىندەگى Ne deidi? ارناسىنىڭ اۆتورى دۋمان مۇحاممەدكارىم ناۋرىزداعى پارلامەنت سايلاۋىنان بەرى ءۇش رەت قامالدى. ول سوڭعى رەت مامىردىڭ سوڭىندا YouTube-ارناسىنداعى ۆيدەودا ايتقاندارىنا بايلانىستى 25 تاۋلىككە قامالعان. قۇقىق قورعاۋشىلار بيلىكتى قاتاڭ سىناپ جۇرگەن جۋرناليستكە اشىلعان ءىستىڭ ساياسيلانعانىن ايتادى.

دەرەككوز: centralasian.org

Abai.kz