وتكەن جىلدىڭ قورىتىندىسى بويىنشا قازاقستاندا ىشكى تۋريستەر سانى ءوسىپ، 8,5 ملن ادامعا جەتتى. بۇل تۋرالى Jibek Joly تەلەارناسىنا سۇحبات بەرگەن مادەنيەت جانە سپورت ءمينيسترى اسحات ورالوۆ ءمالىم ەتتى.

ۆەدومستۆو باسشىسىنىڭ ايتۋىنشا، بىلتىرعى ىشكى ءتۋريزمنىڭ ءوسىمى پاندەمياعا دەيىنگى كەزەڭمەن سالىستىرعاندا 2 ملن ادامعا ارتىق.

«ۇلتتىق ستاتيستيكا بيۋروسىنىڭ دەرەگىنشە، وتكەن جىلى ىشكى تۋريستەردىڭ سانى 8,6 ملن ادامعا جەتتى. بۇل ناتيجەنى جاقسارتا ءتۇسۋ ءۇشىن مادەنيەت جانە سپورت مينيسترلىگى 10 نەگىزگى باعىتتى انىقتادى. قازاقستاننىڭ ءار وڭىرىندە، اتاپ ايتقاندا 3 مەگاپوليستە جانە 17 وبلىستا ءوزىمىزدىڭ بىرەگەي، ەرەكشە ورىندارىمىز بار. پاندەميانىڭ سالدارى ىشكى ءتۋريزمنىڭ دامۋىنا ىقپال ەتكەنىن كورىپ وتىرمىز. قازاقستاندىقتار ەلىمىزدىڭ وزگە وڭىرلەرىنە ءجيى ساياحاتتاي باستادى»، - دەدى اسحات ورالوۆ.

مينيستر اتاپ وتكەندەي، بۇل رەتتە رەسەيلىك تۋريستەر سانى دا ۇلعايعان.

«بىزگە ارقاشان رەسەيلىك تۋريستەر ءجيى كەلىپ تۇرادى. دەگەنمەن قازىر ولاردىڭ سانى ارتىپ كەلەدى. بۇل اسىرەسى شەكارا ماڭىنداعى ايماقتاردا ايقىن بايقالادى. سونداي-اق، ماڭعىستاۋ وبلىسىنا يراننان كەلەتىن تۋريستەردىڭ قاتارى كۇرت ارتتى. مەملەكەت باسشىسىنىڭ يران رەسپۋبليكاسىنا جاساعان ساپارىنىڭ قورىتىندىسى بويىنشا ۆيزاسىز رەجيمگە قول قويىلدى. بۇل ۇلكەن جاڭالىق. وسى جىلدىڭ ناۋرىز ايىندا، ياعني ناۋرىز مەرەكەسى قارساڭىندا العاشقى 300 تۋريست ماڭعىستاۋ وبلىسىنا، اتاپ ايتقاندا اقتاۋ قالاسىنا كەلدى»، - دەپ توقتالدى مينيستر.

قوسا كەتسەك، بىلتىر ەلىمىزدە تۋريزمنەن تۇسەتىن سالىق كولەمى 1,5 ەسە وسكەن.

فوتو: عالامتوردان

Abai.kz