الدەقاشان ساۋداسى بىتكەن نازارباەۆ اۋلەتىنىڭ ساياسي ساحناعا قايتا ورالۋىنان قاۋىپتەنەتىن كەيبىر وقىرمان باتكانىڭ ءابىشۇلىنا تەلەفون سوققانىنان سەكەم الىپ قالدى, - دەپ جازادى Dala Inside ارناسى.

پريگوجين بۇلىگىن باسۋعا دانەكەر بولعان لۋكاشەنكو بۇگىن ءتۇس اۋا ءابىشۇلىنا قوڭىراۋ شالىپ، كەشەگى دۇربەلەڭدى مايىن تامىزىپ اڭگىمەلەپ بەرگەنگە ۇقسايدى.

پەنسياداعى ادامعا ەرمەك كەرەك. ەسكى دوسپەن ەسى كەتىپ سىرلاسقان نازارباەۆ «پۋتين مەن پريگوجيننىڭ اراسىنداعى جانجالعا» قاتىستى ءبىراز ينسايد اقپاراتقا قانىققانى انىق.

ەكس-پرەزيدەنتتى ەلەپ-ەسكەرەتىن جالعىز ادام - لۋكاشەنكو. بەلارۋس پرەزيدەنتى ساياساتتىڭ كارى سىرتتانىمەن نازارباەۆ وتستاۆكاعا كەتكەلى حات-حابار الماسىپ تۇرادى.

ەسەسىنە، رەسەيلىك پروپاگاندا الاقانىن ىسقىلاپ وتىر. بۇگىنگى جاعداي «ءپۋتينشىل» مەديا ءۇشىن بىرتالايعا دەيىن ازىق بولماق.

كرەمل يدەولوگتارى «پريگوجين بۋنتى رەسەيدىڭ ىشكى شارۋاسى ەكەنىن» شەگەلەپ ايتقان توقاەۆتىڭ كەشەگى مالىمدەمەسىن تارازىلاۋ ۇستىندە.

پرەزيدەنت وسى ارقىلى ودكب-نىڭ رەسەيگە بارمايتىنىن اڭعارتقان ەدى.

بىرقاتار پروپاگانديستەر مۇنى ساتقىندىققا بالاپ، «كەمەلۇلى ءپۋتيننىڭ جون ارقاسىنا قانجار قادادى» دەگەن سارىندا سارناي باستادى.

توق ەتەرىن ايتقاندا، توقاەۆقا ءتىسىن قايراپ جۇرگەندەر ءۇشىن بۇگىنگى ينفا ىزدەگەنگە سۇراعان بولدى.

الداعى 24-48 ساعاتتا:

«لۋكاشەنكو قيىن ساتتە تەرىس اينالعان توقاەۆقا قىر كورسەتتى»; «نازارباەۆتىڭ ابىرويى قازىرگى پرەزيدەنتتەن اسىپ تۇر»; «قوس بيلىك ەشقايدا جوعالعان جوق»; «ەكس-پرەزيدەنتكە حابارلاسۋدى پۋتين بۇيىردى، ونىڭ توقاەۆتان كوڭىلى قالدى...» دەگەن سىڭايداعى پروۆوكاتسيالىق كونتەنت كۇرت كوبەيەدى.

Abai.kz