روستوۆتاعى وقيعالاردان كەيىن توبە كورسەتكەن "ۆاگنەردىڭ" نەگىزىن قالاۋشى ەۆگەني پريگوجين ءوزىنىڭ جەكە اسكەري كومپانياسىن تاراتقىسى كەلگەنىن، وسى جايت بۇلىككە تۇرتكى بولعانىن ايتتى، دەپ حابارلايدى Zakon.kz.

ەۆگەني پريگوجيننىڭ ءباسپاسوز قىزمەتى "ۆاگنەر" جاك باسشىسىنىڭ "بولعان وقيعالارعا قاتىستى" بەرگەن تۇسىنىكتەمەسىنىڭ اۋديوسىن جاريالادى.

بۇل پريگوجيننىڭ بۇلىك باسىلعاننان كەيىنگى جاساعان العاشقى مالىمدەمەسى:

"ۆاگنەر" جاك - رەسەيدەگى ەڭ تاجىريبەلى بولىمشە، ول داۋرىقپا، الىپ-قاشپا سوزدەرگە بايلانىستى 1 شىلدەدە تاراۋى كەرەك بولاتىن. كومانديرلەر كەڭەسى اقپاراتتى جاۋىنگەرلەرگە جەتكىزدى، ەشكىم قورعانىس مينيسترلىگىمەن كەلىسىمشارتقا وتىرۋعا كەلىسپەدى.

قورعانىس مينيسترلىگى قاتارىنا وتكەن جاۋىنگەرلەر سانى از، شامامەن – 2%.

ەشقانداي اگرەسسيا كورسەتپەسەك تە، بىزگە زىمىرانمەن سوققى بەرىلدى. 30 ادام قازا تاپتى. كەيبىرەۋلەرى جاراقات الدى. وسى جايت شالت قيمىل جاساپ، العا جىلجۋىمىزعا تۇرتكى بولدى.

كوللونانىڭ ءبىرى روستوۆقا، ەكىنشىسى ماسكەۋگە قاراي باعىت الدى. جولداعى ساربازداردىڭ ءبىر دە بىرىنە ەشكىم تيىسپەدى. ءبىز اۆياتسياعا سوققى بەرۋگە ءماجبۇر بولعانىمىزعا وكىنىش بىلدىرەمىز، بىراق ولار بىزگە بومبا تاستادى.

جاساقتىڭ جىلجۋداعى ماقساتى ۋكرايناداعى قاقتىعىس كەزىندە قاتەلىك جىبەرگەن ادامداردى جاۋاپقا تارتۋ بولدى. مۇنى حالىق پەن اسكەري قىزمەتكەرلەر تالاپ ەتتى.

ءبىزدىڭ ادىلەتتىلىك شەرۋى بۇكىل ەل بويىنشا قاۋىپسىزدىكتىڭ ماڭىزدى ماسەلەلەرىنىڭ بەتىن اشىپ بەردى.

پريگوجيننىڭ ايتۋىنشا، "مۇنى قوعام تالاپ ەتتى. شەرۋ كەزىندە كەزدەسكەن بارلىق اسكەري قىزمەتشى ءبىزدى قولدادى".

جاك باسشىسى ءبىرىنشى شابۋىلداۋشى جاساق ماسكەۋگە 200 شاقىرىم قالعاندا ۆاگنەرشىلەردىڭ كىلت توقتاعانىن باسا اتاپ ءوتتى. وسى كەزدە ولار اتالعان ايماققا بارلاۋ جۇرگىزىپ، كوپ قان توگىلەتىنىن بىلگەن.

وسى ۋاقىتتا لۋكاشەنكو بايلانىسقا شىعىپ، "ۆاگنەر" جاك-ءتىڭ ودان ارى قاراي زاڭدى جۇمىس ىستەۋ جولىن تابۋدى ۇسىنعان.

ء"بىز 24 ساعات ىشىندە 2022 جىلى 24 اقپاندا رەسەي اسكەرىنىڭ كيەۆكە دەيىنگى جانە سول نۇكتەدەن قالاعا دەيىنگى قاشىقتىققا سايكەس كەلەتىن قاشىقتىقتى ءجۇرىپ وتتىك، سوندىقتان ەگەر 2022 جىلى 24 اقپانداعى ارنايى وپەراتسيا بويىنشا ۇرىس-قيمىلداردى "ۆاگنەر" جاك قاتارىنداعىداي وقىتىلعان، مورالدىق دايىندىق دەڭگەيى جوعارى بولىمشە ورىنداسا، وندا، مۇمكىن بۇل ءبىر كۇنگە عانا سوزىلار ما ەدى".ەۆگەني پريگوجين

ول جولعا ەلدەگى بيلىكتى قۇلاتۋ ءۇشىن شىقپاعانىن باسا اتاپ ءوتتى.

Abai.kz