رەسەي پرەزيدەنتى ۆلاديمير پۋتين "ۆاگنەر" جەكە اسكەري كومپانياسىنا قاتىستى جاڭا مالىمدەمە جاسادى.

پۋتين قارۋلى كوتەرىلىس ءبارىبىر باسىلاتىن ەدى دەپ مالىمدەدى. «پريگوجين مەن باسقا دا بۇلىكشىلەر ساتقىندىق جاسادى»، - دەپ ايىپتادى.

«كوتەرىلىستى ۇيىمداستىرۋشىلار ەلىنە، حالقىنا وپاسىزدىق جاسادى. دۇشپاندارىمىز قوعامىمىزدىڭ ەكىگە ءبولىنۋىن قالادى»، - دەدى رەسەي فەدەراتسياسىنىڭ باسشىسى.

ۆلاديمير پۋتين كوتەرىلىسشىلەردىڭ جولىنا تۇسكەندەردىڭ بارلىعىنا العىس ايتىپ، بەلارۋس پرەزيدەنتى الەكساندر لۋكاشەنكوعا «ۆاگنەر» جاك-نا قاتىستى جاعدايدى رەتتەۋگە قوسقان ۇلەسى ءۇشىن العىسىن ءبىلدىردى.

ءوز سوزىندە ول 24 ماۋسىمداعى كوتەرىلىس كەزىندە رەسەي قورعانىس مينيسترلىگىنىڭ اسكەري قىزمەتشىلەرىنىڭ "ۆاگنەرمەن" قاقتىعىسى كەزىندە ۇشقىشتاردىڭ قازا تاپقانىن مويىندادى. دەسە دە پۋتين قايتىس بولعانداردىڭ سانىن جانە باسقا مالىمەتتەردى ناقتىلامادى.

رەسەي پرەزيدەنتى "ۆاگنەر" جاك جاۋىنگەرلەرىنە رەسەي قورعانىس مينيسترلىگىمەن كەلىسىمشارتقا وتىرۋدى جانە ۇيلەرىنە قايتۋدى نەمەسە بەلارۋسكە بارۋدى ۇسىندى.

ەسكە سالايىق، 24 ماۋسىمعا قاراعان ءتۇنى "ۆاگنەر" جاك باسشىسى ەۆگەني پريگوجين «ادىلەت مارشىن» باستاپ، ماسكەۋگە اتتانعان، بىراق استاناعا از قالعاندا بەلورۋس پرەزيدەنتىنىڭ اراعايىندىعىمەن اسكەرىن كەرى قايتارعان. پۋتين  «ۆاگنەر» باسشىسىنىڭ ارەكەتىن «ارقادان پىشاق سۇعۋ» دەدى. رەسەي فەدەراتسياسىنىڭ فەدەرالدى قاۋىپسىزدىك قىزمەتى قارۋلى كوتەرىلىسكە قاتىستى قىلمىستىق ءىس قوزعادى.

كەيىن كرەمل ەۆگەني پريگوجينگە قاتىستى قىلمىستىق ءىس توقتاتىلاتىنىن، ونىڭ بەلارۋسكە كەتەتىنىن حابارلادى. ال بيلىك كوتەرىلىسكە قاتىسقان «ۆاگنەر» جاساعىن قۋدالامايتىنىن ايتتى.

Abai.kz