بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ ءمالىم ەتتى، دەپ حابارلايدى Ulysmedia.kz.

ءمينيستردىڭ دەرەگىنشە، قازاقستاندا 110 ملن توننا كومىر وندىرىلەدى. ال حالىقتىڭ تۇتىنۋىنا 9,3 ملن توننا كومىر قاجەت.

«جىل سايىن 10 ملن توننانىڭ كولەمىندە كومىر كەرەك. حالىققا جەتكىزىلەتىن كومىردىڭ باعاسى تومەن. ەكسپورتتاعى باعاسىمەن سالىستىرعاندا 5-6 ەسە تومەن. حالىققا بارىپ جاتقان كومىردى كەيبىر كاسىپكەرلەر الىپ، ونى شەتەلگە ساتىپ جاتىر. وزبەكستانعا، قىرعىزستانعا ساتۋدا. سونى بولدىرماس ءۇشىن ەلىمىزدەن اۆتوموبيلمەن كومىردى شەتەلگە شىعارۋعا تىيىم سالدىق»، - دەدى مارات قاراباەۆ ۇكىمەت كۋلۋارىندا.

دەسە دە، كاسىپكەرلەر كومىردى سىرت ەلگە شىعارۋدىڭ باسقا جولىن تاۋىپتى.

«ەندى ولار كومىردى كولىكپەن پويىزعا جەتكىزىپ، شەتەلگە پويىزبەن شىعارىپ جاتىر. ماسەلە وسىندا. كومىردى ەرتەرەك جاز ۋاقىتىندا الۋ كەرەك»، - دەدى مينيستر.

Abai.kz