بۇگىن سەناتتىڭ جالپى وتىرىسىندا پالاتا دەپۋتاتتارى «زاڭسىز يەمدەلگەن اكتيۆتەردى مەملەكەتكە قايتارۋ تۋرالى» زاڭدى ماقۇلدادى.

زاڭنىڭ نەگىزگى ماقساتى – قازاقستان رەسپۋبليكاسىنىڭ اۋماعىندا دا، ودان تىس جەرلەردە دە زاڭسىز يەمدەلگەن اكتيۆتەردى قايتارۋ ءۇشىن زاڭنامالىق پارامەترلەردى ايقىنداۋ، سونداي-اق ولاردى زاڭسىز يەمدەنۋگە جانە شىعارۋعا ىقپال ەتكەن جاعدايلاردى جويۋ.

سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مالىمەتىنە قاراعاندا، قۇجات اياسىندا اكتيۆتەردى شىعارۋ سالاسىنداعى قۇقىق بۇزۋ دەرەكتەرىن انىقتاۋ، جولىن كەسۋ، اشۋ جانە تەرگەپ-تەكسەرۋ، اكتيۆتەردى قايتارۋ جونىندەگى حالىقارالىق-قۇقىقتىق ىنتىماقتاستىقتى دامىتۋ، قايتارىلعان قاراجاتتى قوعامنىڭ يگىلىگى ءۇشىن ءتيىمدى پايدالانۋ، ەكونوميكالىق رەسۋرستاردىڭ زاڭسىز شوعىرلانۋىنا، اكتيۆتەردى زاڭسىز شىعارۋعا ىقپال ەتكەن سەبەپتەر مەن جاعدايلاردى انىقتاۋ ەسكەرىلگەن.

زاڭ مىناداي نەگىزگى ەرەجەلەر قاراستىرىلعان:

- زاڭمەن رەتتەلەتىن قۇقىقتىق قاتىناستار سۋبەكتىلەرىن انىقتاۋ;

- زاڭسىز يەمدەنىلگەن اكتيۆتەردى اشۋ، پايدا بولۋىن راستاۋ جانە قايتارۋ تەتىكتەرىن رەگلامەنتتەۋ;

- زاڭسىز يەمدەنىلگەن اكتيۆتەردى قايتارۋ راسىمدەرىنىڭ اشىقتىعىن قامتاماسىز ەتۋ;

- ونىڭ وكىلەتتىكتەرىن ايقىنداي وتىرىپ، زاڭسىز يەمدەنىلگەن اكتيۆتەردى قايتارۋ ماسەلەلەرى بويىنشا كوميسسيا قۇرۋ;

- زاڭسىز يەمدەنىلگەن اكتيۆتەردى مەملەكەتكە ەرىكتى تۇردە بەرۋدى ىنتالاندىرۋ;

- اكتيۆتەردى زاڭسىز يەمدەنۋگە جانە شىعارۋعا ىقپال ەتكەن سەبەپتەر مەن جاعدايلاردى جويۋعا باعىتتالعان جۇيەلى شارالار قابىلداۋ;

- ءوز وكىلەتتىكتەرىن ايقىنداي وتىرىپ، زاڭسىز شىعارىلعان اكتيۆتەردى قايتارۋ ماسەلەلەرى جونىندەگى ۋاكىلەتتى ورگاندى قۇرۋ;

- وكىلەتتىكتەرىن ايقىنداي وتىرىپ اكتيۆتەردى قايتارۋ جونىندەگى ۋاكىلەتتى ورگاندى قۇرۋ;

- قايتارىلعان اكتيۆتەردى شوعىرلاندىرۋ جانە قازاقستان حالقىنىڭ

ءال-اۋقاتىن ارتتىرۋعا باعىتتالعان الەۋمەتتىك جانە ەكونوميكالىق جوبالاردى قارجىلاندىرۋ ءۇشىن ارناۋلى مەملەكەتتىك قور مەن باسقارۋشى كومپانيانى قۇرۋ.

زاڭدا اكتيۆتەردى قايتارۋدىڭ ەرىكتى نەمەسە ءماجبۇرلى ءتارتىبى كوزدەلگەن.

ەرىكتى قايتارۋ ادامداردىڭ وزدەرىنە تيەسىلى مۇلىكتى مەملەكەتكە ەرىكتى تۇردە قايتارۋ تۋرالى كەلىسىمدەر جاساسۋ ارقىلى (ياعني ارناۋلى مەملەكەتتىك قورعا) وتەۋسىز بەرۋى جولىمەن جۇزەگە اسىرىلادى.

زاڭدى ماقۇلداۋ ناتيجەسىندە قوعامداعى الەۋمەتتىك ادىلەتتىلىكتى قالپىنا كەلتىرۋ، زاڭسىز يەمدەنىلگەن جانە شىعارىلعان اكتيۆتەردى مەملەكەتكە قايتارۋ ارقىلى قازاقستان حالقىنىڭ ءال-اۋقاتىن ارتتىرۋ، اكتيۆتەردى ەرىكتى تۇردە قايتارۋدى ىنتالاندىرۋ، اكتيۆتەردى زاڭسىز ساتىپ الۋعا ىقپال ەتكەن سەبەپتەر مەن جاعدايلاردى جويۋ قامتاماسىز ەتىلمەك.

زاڭ اياسىندا ازاماتتىق تارتىپتە اكتيۆتى تاركىلەۋدىڭ جاڭا ينستيتۋتى ەنگىزىلدى، ونى قازىرگى كەزدە شەت ەلدەردە كەڭىنەن قولدانىپ كەلەدى.

بۇدان بۇرىن حابارلانعانداي، باس پروكۋراتۋرانىڭ قۇرىلىمىندا زاڭسىز شىعارىلعان اكتيۆتەردى قايتارۋ جونىندەگى جەكە ۆەدومستۆو قۇرىلادى.

ول وسى سالاداعى ۋاكىلەتتى ورگاننىڭ فۋنكتسيالارىن ورىندايدى.

Abai.kz