«قازاقستان بارىسى» رەسپۋبليكالىق ءتۋرنيرىن وتكىزۋگە بولىنگەن قارجىنىڭ قانشالىقتى زاڭدى جۇمسالعانى تەكسەرىلىپ جاتىر.

«قارجى مونيتورينگى اگەنتتىگىنىڭ تەكسەرۋى تۋرالى ەستىدىك. اتالعان تەكسەرىس 2011-2019 جىلدار ارالىعىندا وتكەن «قازاقستان بارىسى» تۋرنيرىنە قاتىستى ءجۇرىپ جاتىر. ول بويىنشا ءبىز جاۋاپ بەرە المايمىز، قۇزىرەتىمىزگە جاتپايدى. ال ءبىز ءوز قىزمەتىمىزدى 2019 جىلدان باستادىق، قايتا قۇرىلدىق. وسى كۇنگە دەيىن ءۇش ۇلكەن تۋرنير وتكىزدىك. ەكى رەت «قازاقستان بارىسى» جانە ءبىر رەت «تۇران» ازيا چەمپيوناتى. ياعني ول جىلدارى قوردا باسقا ادامدار جۇمىس ىستەدى، سوندىقتان ءبىز جاۋاپ بەرە المايمىز»، - دەدى «قازاقستان بارىسى» قورىنىڭ رەسمي وكىلى دياس احمەتشاريپ ءباسپاسوز ءماسليحاتىندا.

سونداي-اق، تۋرنير ۇيىمداستىرۋشىلارى بيۋدجەت ماسەلەسىنە كەلگەندە قوردىڭ جۇمىسى اشىق ەكەنىن ايتتى.

ەسكە سالساق، 21 ماۋسىم كۇنى قارجى مونيتورينگى اگەنتتىگىنىڭ الماتى قالاسى بويىنشا دەپارتامەنتى سوتقا دەيىنگى تەرگەۋ اياسىندا «قازاقستان بارىسى» قازاق كۇرەسىنەن تۋرنير وتكىزۋگە بولىنگەن 1,075 ملرد تەڭگە بيۋدجەت قاراجاتىنىڭ جۇمسالۋ زاڭدىلىعىن تەكسەرۋ ءجۇرىپ جاتقانىن حابارلاعان ەدى.

«باسشىلاردان، مەردىگەر وكىلدەرىنەن جاۋاپ الۋ، ءتىنتۋ جانە قۇجاتتاردى الۋدى قامتيتىن تەرگەۋ ءجۇرىپ جاتىر. تەرگەۋ مۇددەسىن كوزدەيتىن باسقا اقپارات جاريالانبايدى»، - دەلىنگەن رەسمي مالىمەتتە.

Abai.kz