«جول اكتيۆتەرى ساپاسىنىڭ ۇلتتىق ورتالىعى» رمك بقو فيليالىنىڭ بۇرىنعى ديرەكتورى زاۋىربەك قىپشاقباەۆ 10 جىلعا سوتتالدى.

بقو قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى اسلانبەك دۇيسەنعاليەۆ ءمالىم ەتكەنىندەي، ز.قىپشاقباەۆ قر قىلمىستىق كودەكسىنىڭ 366-بابى 4-بولىگىنە سايكەس ايىپتى دەپ تانىلىپ، 10 جىلعا باس بوستاندىعىنان ايىرۋ جازاسىن قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەيتىن بولادى. ول سونداي-اق مەملەكەتتىك قىزمەتتە جانە باسقا ۇيىمداردا لاۋازىمدى قىزمەت اتقارۋ قۇقىعىنان ءومىر بويىنا ايىرىلدى. سونىمەن قاتار سوتتالۋشىدان ونىڭ العان 30 ملن تەڭگە پاراسى مەملەكەت پايداسىنا ءوندىرىلدى.

سوتتا انىقتالعانىنداي، مەملەكەتتىك قىزمەتتى ورىنداۋعا تەڭەستىرىلگەن ادام بولا تۇرا، ز.قىپشاقباەۆ «دسك پريوريتەت» جشس ديرەكتورى جاننا كەنجينادان اسا ءىرى كولەمدە پارا الۋدى جوسپارلاعان. وسى ماقساتتا ارنايى جوسپار-كەستە ازىرلەمەي جانە ونى تاپسىرىس بەرۋشىمەن بەكىتپەي، 2022 جىلعى 12-17 مامىر ارالىعىندا ءوز قالاۋىمەن فيليال قىزمەتكەرلەرىن «دسك پريوريتەت» جشس-نىڭ اقساي-شىڭعىرلاۋ جول قۇرىلىسى نىسانىن تەكسەرۋگە جىبەرگەن. سودان كەيىن الىنعان سىنامالاردىڭ تالاپقا ساي كەلمەيتىنى تۋرالى سىناق حاتتامالارىن اتالعان سەرىكتەستىككە جولداعان.

سوسىن ز.قىپشاقباەۆ ج.كەنجيناعا كەلىپ، جول نىساندارى بويىنشا وڭ زەرتحانالىق قورىتىندى شىعارۋ ءۇشىن جانە ماتەريالداردىڭ ساپاسىنا ءتيىستى زەرتتەۋ بويىنشا شارالار قابىلدامايمىن، جالپى قامقورلىق كورسەتەمىن دەپ ءار اي سايىن 5 ملن تەڭگە بەرۋىن تالاپ ەتكەن. ج.كەنجينا بۇل زاڭسىز تالاپتارمەن كەلىسكەن.

سول كۇنى ز.قىپشاقباەۆ ونىڭ قىلمىستىق پيعىلىنان بەيحابار بولعان ءوزىنىڭ دوسى يحسانوۆتى «دسك پريوريتەت» جشس كەڭسەسىنە جۇمساپ، ج.كەنجينادان ءساۋىر-مامىر ايلارى ءۇشىن 10 ملن تەڭگەنى العان. وعان قوسا ماۋسىم، شىلدە جانە تامىز ايلارىندا وسىنداي جولمەن 15 ملن تەڭگەگە قول جەتكىزگەن. مۇنىمەن توقتاماي، قىركۇيەكتە ءوزى بارىپ، 5 ملن تەڭگەنى الىپ كەتكەن.

قازان ايى ءۇشىن پاراسىن الماعاندىقتان، ز.قىپشاقباەۆ ىرىكتەلگەن سىنامالاردىڭ تالاپتارعا ساي كەلمەيتىنى جونىندەگى سىناق حاتتامالارىن تاعى جولداعان. اقىرى 28 قاراشا كۇنى ج.كەنجينانىڭ جۇمىس ورنىنا كەلگەن. ونى 2 ملن تەڭگە پارا الىپ جاتقان جەرىنەن قر ۇلتتىق قاۋىپسىزدىك كوميتەتى بقو بويىنشا دەپارتامەنتىنىڭ قىزمەتكەرى ۇستادى.

وسىلايشا، ز.قىپشاقباەۆ «دسك پريوريتەت» جشس ديرەكتورى ج.كەنجينادان 2022 جىلعى مامىر-قاراشا ارالىعىندا بارلىعى 32 ملن تەڭگە پارا العان.

سوت ۇكىمى زاڭدى كۇشىنە ەنگەن جوق.

Abai.kz