جىل سوڭىنا دەيىن 19 مىڭنان اسا ازامات قارۋلى كۇشتەر مەن باسقا دا اسكەري قۇرىلىم قاتارىن تولىقتىرادى. بۇل تۋرالى قر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى گەنەرال-مايور باۋىرجان ارتىقوۆ ايتتى.

قازىرگى اسكەرگە شاقىرۋدىڭ ەرەكشەلىگى – اشىقتىقتىڭ ارتۋى. وسى ساربازدار انالارى كوميتەتى وكىلدەرى مەن حالىقتىڭ اسكەرگە شاقىرۋ كوميسسيالارىنىڭ جۇمىسىنا قاتىسۋى قامتاماسىز ەتىلەدى. جەرگىلىكتى اتقارۋشى ورگاندار، اكىم ورىنباسارلارىنىڭ توراعالىق ەتۋىمەن قالالىق جانە اۋداندىق اسكەرگە شاقىرۋ كوميسسيالارى جۇمىستارىن باستاپ كەتتى. بيىل 1 قىركۇيەكتەن 28 جەلتوقسانعا دەيىن قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارى 18 بەن 27 جاس ارالىعىنداعى 19 مىڭنان استام ساربازبەن تولىعادى، - دەدى ب. ارتىقوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

بيىل قارۋلى كۇشتەر مەن مەملەكەتتىك كۇزەت قىزمەتىنە شاقىرىلاتىن جاس ۇرپاقتىڭ سانى الدىڭعى ناۋقاندارمەن سالىستىرعاندا ۇلعايدى.

اسكەرگە شاقىرىلۋشىلاردى حاباردار ەتۋ جەكە شاقىرۋ قاعازدارىن جىبەرۋ ارقىلى جۇزەگە اسىرىلادى، ولار ءۇيى مەن جۇمىس ورنىنىڭ مەكەنجايلارىنا جەتكىزىلەدى. اسكەرگە شاقىرۋدان بوساتۋدى كەيىنگە قالدىرۋ مەملەكەتتىك قىزمەت بولىپ سانالادى جانە ازاماتتارعا ەلەكتروندى ۇكىمەت پورتالى ارقىلى ۇسىنىلادى. كەز كەلگەن ادام اقپارات الۋ ءۇشىن جۇگىنىپ، جاۋاپ الا الادى. ول ءۇشىن قورعانىس ىستەرى جونىندەگى ءاربىر دەپارتامەنتتە «قارۋلى كۇشتەر – ادالدىق الاڭى» جوبالىق كەڭسەلەرى جۇمىس ىستەيدى، ەلەكتروندىق پوشتا جاشىكتەرى مەن الەۋمەتتىك جەلىلەردە رەسمي اككاۋنتتار اشىلدى، - دەپ ءتۇسىندىردى دەپارتامەنت باسشىسى.

فوتو: اشىق دەرەككوزدەن

Abai.kz