2023 جىلعى 8 قىركۇيەكتە وتباسى كۇنى قارساڭىندا «مەرەيلى وتباسى» ۇلتتىق كونكۋرسى لاۋرەاتتارىن ح مەرەيتويلىق سالتاناتتى ماراپاتتاۋ ءراسىمى ءوتتى. 

جىل سايىن وتكىزۋ يگى داستۇرگە اينالعان ۇلگىلى وتباسىلار بايقاۋى – ەلىمىزدە جانۇيا قۇندىلىقتارىنىڭ ءرولىن ارتتىرىپ، وتباسى مەن نەكەنىڭ وڭ ءيميدجىن دارىپتەيتىن اۋقىمدى دا ماڭىزدى وقيعالاردىڭ ءبىرى. كونكۋرسقا 10 جىل ىشىندە قازاقستاننىڭ بارلىق وڭىرىنەن 20 مىڭنان استام وتباسى قاتىستى.

قازاقستان رەسپۋبليكاسى مادەنيەت جانە اقپارات ءمينيسترى، پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا سالتاناتتى شارانىڭ اشىلۋ بارىسىندا بايقاۋ جەڭىمپازدارىنا مەملەكەت باسشىسىنىڭ قۇتتىقتاۋىن وقىدى.

- قۇرمەتتى قاۋىم! «مەرەيلى وتباسى» بايقاۋىنىڭ جەڭىمپازدارىن شىن جۇرەكتەن قۇتتىقتايمىن! بۇل - ءتول قۇندىلىقتارىمىزدى دارىپتەپ، ۇلتتىڭ جاڭا ساپاسىن قالىپتاستىرۋعا جول اشاتىن ماڭىزدى جوبا. ءار ايماقتارى ونەگەلى وتباسىلاردىڭ بايقاۋعا بەلسەنە قاتىسۋىنان ەلىمىزدە بەرەكە-بىرلىگى جاراسقان قۇتتى شاڭىراق يەلەرى از ەمەس ەكەنىنە كوز جەتكىزدىك. ولاردىڭ اراسىندا بەلگىلى ءبىر ماماندىقتى اتا كاسىپكە اينالدىرعان ازاماتتاردىڭ كوپ بولۋى - قۋانتارلىق جايت. وسىنداي ۇلگىلى اۋلەتتەر قوعامدا ۇرپاقتار ساباقتاستىعىن ساقتاۋعا ىقپال ەتەدى. حالقىمىزدا «ۇيادا نە كورسەڭ، ۇشقاندا سونى ىلەرسىڭ» دەگەن جاقسى ءسوز بار. وتانشىلدىق، بىلىمپازدىق، ەڭبەكقورلىق، ۇنەمشىلدىك، جاناشىرلىق، ادىلدىك سياقتى «ادال ازاماتقا» ءتان قاسيەتتەر، ەڭ الدىمەن، وتباسىندا قالىپتاسادى. ادىلەتتى قازاقستاندى وسىنداي جاندار قۇرادى. مەملەكەت وتباسى ينستيتۋتىن دامىتۋعا، انا مەن بالانى قورعاۋ ماسەلەسىنە ءاردايىم ايرىقشا نازار اۋدارادى. وسى باعىتتا اۋقىمدى ىستەر اتقارىلىپ جاتىر. بۇل جۇمىس الداعى ۋاقىتتا دا جالعاسىن تابادى. ءار شاڭىراقتىڭ ىرىسى ارتىپ، مەرەيى تاسي بەرسىن! بارشاڭىزگا زور دەنساۋلىق، باق-بەرەكە تىلەيمىن!، - دەلىنگەن قۇتتىقتاۋ حاتىندا.

بيىل كونكۋرسقا 3 344 وتباسى قاتىستى. ولاردىڭ 40% قالالىق جانە 60% اۋىلدىق وتباسىلار.

ءتۇرلى كاسىپ پەن ەڭبەك اۋلەتتەرىنەن قۇرالعان 20 وتباسى – ءوڭىر جەڭىمپازدارى اتاندى. ولاردىڭ قاتارىندا ۇستازدار، قولونەرشىلەر، مەتاللۋرگتەر، اسكەري قىزمەتشىلەر، كاسىپكەرلەر، اگروونەركاسىپ سالاسىنىڭ ماماندارى بار.

وتباسىنىڭ ءاربىر مۇشەسى – اۋىلداستارىنىڭ، قالا تۇرعىندارىنىڭ، ارىپتەستەرىنىڭ، كورشى-قولاڭنىڭ قۇرمەتىنە بولەنگەن، وتانىنا ادال قىزمەت ەتىپ جۇرگەن ەڭبەك ادامى، اۋىلدىڭ، قالانىڭ قاراپايىم ەڭبەككەرلەرى.

ماراپاتتاۋ راسىمىنە مەملەكەتتىك ورگانداردىڭ وكىلدەرى، پارلامەنت سەناتى مەن ءماجىلىسىنىڭ دەپۋتاتتارى، قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى قاتىستى.

لاۋرەات وتباسىلار ديپلومدارمەن جانە ەستەلىك سىيلىقتارمەن ماراپاتتالدى. ماراپاتتاۋ ءراسىمى قازاق ەسترادا جۇلدىزدارىنىڭ قاتىسۋىمەن وتكەن مەرەكەلىك كونتسەرتپەن جالعاستى.

Abai.kz