ەڭبەك جانە حالىقتى الەۋمەتتىك قورعاۋ مينيسترلىگى 2022 جىلى اتاۋلى الەۋمەتتىك كومەك العان 100,4 مىڭ وتباسى 2023 جىلى كەدەيلىك جاعدايىنان شىققانىن مالىمدەدى، دەپ حابارلايدى Ulysmedia.kz.

“2022 جىلى ااك الۋشىلار سانى 141,5 مىڭ وتباسىن (728,7 مىڭ ادام) قۇرادى، وسى جىلدىڭ 1 تامىزىندا 102,7 مىڭ وتباسى ااك (538,9 مىڭ ادام) الدى”، – دەلىنگەن حابارلامادا.

وڭىرلىك بولىنىستە بيىلعى 1 تامىزداعى جاعداي بويىنشا ااك الۋشىلاردىڭ ەڭ كوپ سانى تۇركىستان وبلىسىندا – 25,1 مىڭ وتباسى نەمەسە 24,4%، شىمكەنت قالاسىندا – 11,1 مىڭ وتباسى نەمەسە 10,8%، قىزىلوردا وبلىسىندا – 8,8 مىڭ وتباسى نەمەسە 8,6%، الماتى وبلىسىندا – 8,6 مىڭ وتباسى نەمەسە 8,4%، جامبىل وبلىسىندا – 7,2 مىڭ وتباسى نەمەسە 7%، جەتىسۋ وبلىسىندا – 6,2 مىڭ وتباسى نەمەسە 6% تىركەلگەن.

ااك الۋشىلاردىڭ قۇرىلىمىندا باسىم كوپشىلىگى بالالاردىڭ ۇلەسىندە – 65,9% نەمەسە 355,2 مىڭ ادام، 14,9% نەمەسە 80,1 مىڭ ادام – جۇمىس ىستەيتىن ازاماتتار; 13% نەمەسە 70 مىڭ ادام – بالالارعا، قارتتارعا، مۇگەدەكتىگى بار ادامدارعا كۇتىم جاسايتىن ادامدار; قالعان 6,2% – ازاماتتاردىڭ باسقا ساناتتارىنا تيەسىلى.

ايتا كەتەيىك، قازاقستاندىقتاردىڭ 90%-ىنىڭ جان باسىنا شاققانداعى تابىسى 151 مىڭ تەڭگەدەن اسپايدى.

بۇدان بۇرىن ەلىمىزدە 355 مىڭنان استام بالا كەدەيلىك شەگىندە ءومىر ءسۇرىپ جاتقانى حابارلانعان.

قازاقستان ينفلياتسيا دەڭگەيى جونىنەن ەاەو ەلدەرىنەن الدا تۇر. مامىر ايىنىڭ قورىتىندىسى بويىنشا قازاقستاندا باعانىڭ جىلدىق ءوسۋى 14,6 پايىزدى قۇرادى. ال قىرعىزستاندا نەبارى 10,5 پايىز.

جۋىردا دەپۋتات ءمادي تاكيەۆ قازاقستاندىقتاردىڭ جالاقىسىنىڭ كۇندەلىكتى قاجەتتىلىكتەرىنەن ارتىلمايتىنىن مالىمدەگەن.

ال ونىڭ ارىپتەسى ەلنۇر بەيسەنباەۆ حالىقتىڭ ورتاشا تابىسى مەن قىمباتشىلىق جايلى رەسمي ستاتيستيكا شىندىققا ساي كەلمەيتىنىن ايتتى.

Abai.kz