بيىل 8 ايدا ەل ەكونوميكاسى 4,9 پايىزعا ءوستى. بۇل تۋرالى ۇكىمەت وتىرىسىندا ۇلتتىق ەكونوميكا ۆيتسە-ءمينيسترى ازامات ءامرين ايتتى.

«بيىل قانتار-تامىز ايلارىنىڭ قورىتىندىسى بويىنشا قازاقستان ەكونوميكاسىنىڭ ءوسۋ قارقىنى 4,9 پايىزدى قۇرادى. ونىڭ ىشىندە ناقتى سەكتور – 4,4, ال قىزمەت كورسەتۋ سالاسى 4,8 پايىزعا ءوستى. نەگىزگى سالالاردىڭ بارلىعىندا وڭ ديناميكا بايقالۋدا، اسىرەسە قۇرىلىس، ساۋدا، سونداي-اق اقپارات جانە بايلانىس ەڭ جوعارى ءوسىمدى كورسەتتى. نەگىزگى كاپيتالعا سالىنعان ينۆەستيتسيالاردىڭ ءوسۋ قارقىنى 12,2 پايىزدى قۇرادى. ينۆەستيتسيالار اعىنى كولىك جانە قويمالاۋدا – 49, ءبىلىم بەرۋدە – 31,9, ساۋدادا – 30,1, اۋىل شارۋاشىلىعىندا – 20,7, سونداي-اق ونەركاسىپتە – 8,5, ونىڭ ىشىندە تاۋ-كەن ءوندىرۋ ونەركاسىبىندە 5,7 پايىزعا ارتتى»، - دەدى ول.

ۆيتسە-مينيستر دەرەگىنشە، وڭىرلەر اراسىندا ەڭ جوعارعى ءوسىم ماڭعىستاۋ، اباي، تۇركىستان جانە پاۆلودار وبلىستارىندا بايقالدى.

«الدىن الا قورىتىندى بويىنشا 2023 جىلعى قاڭتار-شىلدەدە سىرتقى ساۋدادا تاۋار اينالىمى 5,7 پايىزعا ءوسىپ، 79,5 ملرد دوللاردى قۇرادى. ەكسپورت 44,8 ملرد دوللاردى قۇراپ، ونىڭ ىشىندە وڭدەلگەن تاۋارلار ەكسپورتى 14,2 ملرد دوللارعا جەتتى. تاۋارلار يمپورتى 34,7 ملرد دوللاردى قۇرادى. جالپى، وڭ ساۋدا بالانسى 10 ملرد دوللارعا تەڭ»، - دەدى ازامات ءامرين.

Abai.kz