ەلىمىزدە ءبىلىم بەرۋ ۇيىمدارىنداعى بۋللينگكە قارسى بىرىڭعاي باعدارلاما ازىرلەنىپ جاتىر. بۇل تۋرالى وقۋ-اعارتۋ ۆيتسە-ءمينيسترى ەدىل وسپان ورتالىق كوممۋنيكاتسيالار قىزمەتىندە وتكەن دوڭگەلەك ۇستەلدە ايتتى.

«بىزگە ءبىلىم بەرۋ ۇيىمدارى مەن ونىڭ سىرتىنداعى بۋللينگ پەن قۋدالاۋ فاكتىلەرى تۋرالى شاعىمدار ءتۇسىپ جاتادى. ونىڭ ىشىندە الەۋمەتتىك جەلى ارقىلى دا دەرەكتەر تىركەلۋدە. وسىعان بايلانىستى بۇكىل ەلگە ارنالعان بىرىڭعاي بۋللينگكە قارسى باعدارلاما ازىرلەۋدى باستادىق. ول باعدارلاما ەلدەگى بۇكىل ءبىلىم بەرۋ ۇيىمدارىندا قولدانىلاتىن بولادى.

باعدارلاما اياسىندا بالالارمەن بۋللينگتىڭ نە ەكەنى، ونىڭ زاردابى تۋرالى، جامان ءۇردىس ەكەنى تۋرالى اڭگىمە جۇرگىزىلەدى. بالالار مەن مۇعالىمدەر ءبىر-ءبىرىن ءتۇسىنۋدى، پروبلەمانى بىرگە ءارى بەيبىت جولمەن شەشۋدى ۇيرەنەدى»، - دەدى ەدىل وسپان.

ونىڭ ايتۋىنشا، بالالاردىڭ بۇل ماسەلەدە جالعىز ەمەس ەكەنىن ءتۇسىنۋى ماڭىزدى.

«مەكتەپتەردە بالالار پروبلەماعا تاپ بولسا، ەرەسەكتەرمەن سويلەسۋىنە ارنالعان ورىندار قۇرىلادى. وسىلايشا بالا، اتا-انا، مۇعالىم ۇشتىگى بىرگە جۇمىس ىستەپ، مەكتەپتى قاۋىپسىز ورتاعا اينالدىرۋعا كۇش سالادى.

باعدارلاماعا تاربيەلىك كومپونەنتتەر دە قوسىلادى. سىنىپ ساعاتتارى مەن اتا-انالاردىڭ جينالىستارىندا بۇل ماسەلە كوپ تالقىلانادى. بۋللينگكە قارسى باعدارلامانىڭ تيىمدىلىگىنە ونلاين مودۋل ارقىلى مونيتورينگ جۇرگىزىلەدى جانە اي سايىن ءبىلىم بەرۋ ۇيىمدارىنداعى بۋللينگ دەرەكتەرى جيناقتالىپ وتىرادى»، - دەدى ۆيتسە-مينيستر.

Abai.kz