تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تۇركىستان وبلىسىندا مۇعالىمدەردىڭ ەلەكتروندى كۇندەلىك تولتىرۋ ءۇشىن دالا كەزىپ جۇرگەنى بەينەلەنگەن سۋرەتكە پىكىر ءبىلدىردى.

مينيسترلىكتىڭ مالىمەتىنشە، سۋرەت تۇركىستان وبلىسىنىڭ قازىعۇرت اۋدانىنا قاراستى اققۇم اۋىلىندا تۇسىرىلگەن. وبلىستىق اكىمدىك ۇسىنعان اقپاراتقا قاراعاندا، بۇل اۋىلدا 432 ادام تۇرادى. اۋىل تۇرعىندارىنا «كسەلل» كومپانياسى ۇيالى بايلانىستىڭ 2G جانە ءموبيلدى ينتەرنەتتىڭ 3G بۋىنى بويىنشا قىزمەت كورسەتەدى.

دەگەنمەن، تۇركىستان وبلىسىنىڭ اكىمدىگى بايلانىس وپەراتورىمەن بىرگە اۋىلدارداعى ينتەرنەت قىزمەتتەرىن جاقسارتۋ جانە قامتاماسىز ەتۋ جونىندەگى جول كارتاسىن ازىرلەپ جاتىر. اتالعان جول كارتاسىنا اققۇم اۋىلى دا كىرەدى.

«وسى جول كارتاسى اياسىندا بايلانىس ساپاسىن جاقسارتۋ ءۇشىن انتەننا-دىڭگەك قۇرىلىسىن سالۋ جوسپارلانعان. سودان كەيىن بايلانىس وپەراتورى - «كسەلل» اق بازالىق ستانسا ورناتادى. بايلانىس وپەراتورىنان بازالىق ستانسا ورناتۋدىڭ ناقتى داتاسىنا قاتىستى اقپارات كۇتىلىپ وتىر. بۇعان قوسا، مينيسترلىك بايلانىس سالاسىندا «قولجەتىمدى ينتەرنەت» ۇلتتىق جوباسىن ازىرلەدى. اتالعان جوبا اياسىندا اققۇم اۋىلىن قوسا العاندا تالشىقتى-وپتيكالىق بايلانىس جەلىسىنىڭ 3 مىڭنان استام قىزمەتىمەن قامتاماسىز ەتۋ جونىندەگى ءىس-شارا قاراستىرىلعان»، - دەپ اتاپ وتەدى ۆەدومستۆودان.

Abai.kz