ەل پرەزيدەنتىنىڭ جۇلدەسى ءۇشىن قازاق كۇرەسىنەن ءۇشىنشى رەت وتكەن «قازاقستان بارىسى» ءتۋرنيرىنىڭ جەڭىمپازى، «التىن بەلبەۋ» مەن اۋىسپالى «التىن تايتۇياقتىڭ» يەگەرى ايبەك نۇعىماروۆ كەشە تاڭەرتەڭ استانادان تۋعان جەرىنە ۇشىپ كەلدى. ەلوردا تورىندەگى ءدۇبىرلى دودادا شىعىستىڭ نامىسىن ابىرويمەن قورعاعان بالۋان ۇلدارىن وسكەمەن اۋەجايىندا وبلىس اكىمى بەردىبەك ساپارباەۆ كۇتىپ الدى.

ايماق باسشىسىمەن بىرگە قارسى الۋشىلاردىڭ قاتارىندا ايبەكتىڭ اتا-اناسى، دوستارى، سپورتتاعى سەنىمدى سەرىكتەرى ءھام باپكەرلەرى، قاي كەزدە دە قيقۋ قوسىپ، قولداپ جۇرەتىن جانكۇيەر جەرلەستەرى ءبارى، ءبارى وسى اۋەجايدان تابىلدى. تۋعان جەرگە تابانى تيگەن ساتتە-اق كوكىرەگىن ەرەكشە سەزىم بيلەگەن «قازاقستان بارىسى» قاۋمالاعان بۇقارالىق اقپارات قۇرالدارى وكىلدەرىنە سۇحبات بەرىپ، قۋانىشىن ءبولىستى.    

ەل پرەزيدەنتىنىڭ جۇلدەسى ءۇشىن قازاق كۇرەسىنەن ءۇشىنشى رەت وتكەن «قازاقستان بارىسى» ءتۋرنيرىنىڭ جەڭىمپازى، «التىن بەلبەۋ» مەن اۋىسپالى «التىن تايتۇياقتىڭ» يەگەرى ايبەك نۇعىماروۆ كەشە تاڭەرتەڭ استانادان تۋعان جەرىنە ۇشىپ كەلدى. ەلوردا تورىندەگى ءدۇبىرلى دودادا شىعىستىڭ نامىسىن ابىرويمەن قورعاعان بالۋان ۇلدارىن وسكەمەن اۋەجايىندا وبلىس اكىمى بەردىبەك ساپارباەۆ كۇتىپ الدى.

ايماق باسشىسىمەن بىرگە قارسى الۋشىلاردىڭ قاتارىندا ايبەكتىڭ اتا-اناسى، دوستارى، سپورتتاعى سەنىمدى سەرىكتەرى ءھام باپكەرلەرى، قاي كەزدە دە قيقۋ قوسىپ، قولداپ جۇرەتىن جانكۇيەر جەرلەستەرى ءبارى، ءبارى وسى اۋەجايدان تابىلدى. تۋعان جەرگە تابانى تيگەن ساتتە-اق كوكىرەگىن ەرەكشە سەزىم بيلەگەن «قازاقستان بارىسى» قاۋمالاعان بۇقارالىق اقپارات قۇرالدارى وكىلدەرىنە سۇحبات بەرىپ، قۋانىشىن ءبولىستى.    

– استاناداعى بايراقتى باسەكەگە ۇكىلەپ ءۇمىت ارتىپ، شىعارىپ سالىپ، جارىستىڭ باسىنان اياعىنا دەيىن ماعان جانكۇيەرلىك تانىتىپ، قولداعان جەرلەستەرىمە ريزاشىلىعىمدى بىلدىرەمىن. «قازاقستان بارىسى» تۋرنيرىنە باراتىن كەزدە وبلىسىمىزدىڭ باسشىسى بەردىبەك ماشبەكۇلى سەمەيدەگى ستاديونعا ارنايى كەلىپ، 15 مىڭ ادامنىڭ الدىندا بىزگە اق باتاسىن بەرىپ، اق جول تىلەپ، شىعارىپ سالىپ تۇرىپ، ماعان: «ەڭ تومەنگى ورىن ءبىرىنشى ورىن بولسىن!» دەپ مىندەت جۇكتەگەن. مەن وسى مىندەتتىڭ ۇدەسىنەن شىعۋعا، جەرلەستەرىمنىڭ سەنىمىن اقتاۋعا بار كۇشىمدى سالدىم. ەڭ اۋەلى جاراتۋشى اللا جولىمدى وڭعارىپ، ەكىنشى، سىزدەردىڭ تىلەۋ-نيەتتەرىڭىز ورىندالىپ، وسىنداي جەڭىسكە جەتتىم. مەن بۇل جەڭىسىمدى تۇڭعىش پرەزيدەنتىمىز نۇرسۇلتان نازارباەۆتىڭ جانە ەلىمىزدىڭ ورداسى استانامىزدىڭ تۋعان كۇنىنە ارنايمىن! – دەپ اعىنان جارىلعان ول ءتۋرنيردىڭ ءوتۋ بارىسى تۋرالى دا ءوزىنىڭ وي-پىكىرىن ورتاعا سالدى.

جۋرناليستەردىڭ «بۇل جولعى «قازاقستان بارىسى» قالاي ءوتتى؟ بىلتىرعى چەمپيون بەيبىت ىستىباەۆتىڭ اقتىق سىنعا شىعا الماي قاپى قالۋىن قالاي قابىلدادىڭىز؟» دەگەن ساۋالدارىنا ول بىلايشا جاۋاپ بەردى: – قازاق كۇرەسىنىڭ مەرەيىن تاسىتقان «قازاقستان بارىسى» ءتۋرنيرى جوعارى دەڭگەيدە ءوتتى. قارسىلاستارىم وسال بولعان جوق. نەگىزى مەن اقتىق سىندا بەيبىت ىستىباەۆتى كۇتكەن ەدىم. بىراق قاراعاندىلىق بالۋاننىڭ باعى جانىپ، ەرجان شىنكەەۆپەن كەزدەستىم، جالپى، «ناعىز بالۋانعا وڭ-سولى بىردەي» دەمەكشى، شەشۋشى سايىستا كىممەن بەلدەسسەم دە مەن ءۇشىن باستى ماقسات جەڭىسكە جەتۋ ەدى.

– بۇدان ءبىر جىل بۇرىن ءدال وسى اۋەجايدا لوندون وليمپياداسىنىڭ چەمپيونى ولگا رىپاكوۆانى قارسى العان ەدىك. ەندى، مىنە، سول جەڭىستى جول جالعاسىپ، ايبەك ۇلىمىز تۋعان جەرىنە «قازاقستان بارىسى» اتانىپ كەلىپ وتىر. ونى بۇل ۇلكەن جەتىستىگىمەن جانە وسى قۋانىشتى ساتپەن قاتار كەلگەن بۇگىنگى تۋىلعان كۇنىمەن وبلىس جۇرتشىلىعى اتىنان قۇتتىقتايمىن. ايبەكتى جارىسقا شىعارىپ سالعان كەزدە ءبارىمىز وعان ۇلكەن سەنىم ارتىپ، جەڭىسپەن ورالۋىنا تىلەكتەستىك بىلدىرگەنبىز. مىنەكي، جەرلەستەرىنىڭ سول تىلەكتەرى قابىل بولىپ، اۋىسپالى تايتۇياق شىعىس قازاقستانعا بۇيىردى، - دەدى وبلىس باسشىسى بەردىبەك ساپارباەۆ.

2013 جىلدىڭ «قازاقستان بارىسىن» القالاۋ ءراسىمى وسى كۇنى تۇستەن كەيىن دە جالعاسىن تاپتى. وسكەمەننىڭ ورتالىق الاڭىنداعى ۇلى ابايدىڭ ەسكەرتكىشىنە گۇل شوقتارىن قويىپ، تاعزىم ەتۋ سالتاناتى جاسالعاننان كەيىن مەرەكەلىك شارا ەركە ەرتىستىڭ جاعالاۋىندا ورنالاسقان امفيتەاترداعى كونتسەرتتىك باعدارلاماعا ۇلاستى. اشىق اسپان استىنداعى امفيتەاترعا جينالعان قالا تۇرعىندارى مەن قوناقتارى الدىندا ءوڭىرىمىزدىڭ ماقتانىشىنا اينالعان ايبەك نۇعىماروۆتى قۇتتىقتاعان وبلىس اكىمى بەردىبەك ساپارباەۆ: – ەڭ الدىمەن وسىنداي ۇلدى دۇنيەگە اكەلىپ، ءوسىرىپ-جەتكىزگەن ايبەكتىڭ اتا-اناسىنا راقمەت ايتامىن. ەكىنشى كەزەكتە كۇندىز-ءتۇنى تىنىم كورمەي، تەر توككەن باپكەرلەرىنىڭ ەڭبەگى زور ەكەنىن ايتۋىمىز كەرەك، – دەدى.

قۇتتىقتاۋ سوزدەن كەيىن ايماق باسشىسى ايبەكتىڭ قولىنا «ازيا اۆتو» زاۋىتىندا قۇراستىرىلىپ شىعارىلعان سۋداي جاڭا تەمىر تۇلپاردىڭ كىلتىن ۇستاتتى. بۇعان قوسا سەمەي قالاسىنىڭ اكىمى ايبەك كارىموۆ بالۋانعا ءۇش بولمەلى پاتەر سىيعا تارتاتىنىن دا جەتكىزدى. ال جەڭىمپازدىڭ باپكەرلەرى سەرىك قوجىكەنوۆ پەن شىڭعىس تۇرسىنوۆقا 2 مىڭ دوللاردان اقشالاي سىيلىق بەرسە، الىپ ۇلدى ومىرگە اكەلگەن اتا-اناسىنىڭ يىعىنا قىمبات شاپان جاۋىپ، قۇرمەت كورسەتتى.

سالتاناتتى شارانىڭ قىزىعىنا جينالعان كوپشىلىك تە قۇر قالعان جوق. چەمپيونمەن تىلدەسىپ، قۇتتىقتاۋلارىن ارنادى. جاستار جاعى ەستەلىك ءۇشىن فوتوسۋرەتكە ءتۇسىپ، قولتاڭبا الىپ جاتتى. ساحنا تورىندە اۋەلەپ ءان شىرقالىپ، كۇمبىرلەپ كۇي توگىلدى.

شالقار جولامانوۆ، 2012 جىلعى «قازاقستان بارىسى» ءتۋرنيرىنىڭ كۇمىس جۇلدەگەرى:

– وتكەندە قازاقستان تەلەارناسىنداعى «ايتۋعا وڭاي» باعدارلاماسىندا ايبەككە «سىزدەردىڭ قورجىندا كۇمىس جانە قولا جۇلدە بار، ەندى جەتىسپەي تۇرعانى التىن مەدال» دەگەن بولاتىن. سول كەزدە ايبەك «بۇيىرتسا، وسى جولى التىندى الامىز» دەپ جاۋاپ بەرگەن ەدى. مىنە، ول سوزىندە تۇرىپ، ەل-جۇرتتىڭ تىلەۋى قابىل بولىپ، «التىن بەلبەۋ» مەن اۋىسپالى «التىن تايتۇياقتى» شىعىسقا الىپ كەلدى. بۇل تايتۇياق ەندى ءبىراز جىلعا دەيىن ءبىزدىڭ وبلىستا قالۋى ءۇشىن ايبەك باستاعان جىگىتتەر نامىستى قولدان بەرمەۋگە تىرىساتىن بولادى. مەن ولارعا سەنەمىن.

ءجانادىل اتاەۆ، قازاقستاننىڭ ەڭبەك سىڭىرگەن جاتتىقتىرۋشىسى:       

– ەلىمىز تاۋەلسىزدىك العالى وسىنداي بايراقتى باسەكەلەردە سپورتشىلارىمىزدىڭ جۇلدىزى جارقىراپ جانىپ كەلەدى. بۇل ورايدا قازاقتىڭ ءتول كۇرەسىن دامىتۋعا باعىتتالعان «قازاقستان بارىسى» ءتۋرنيرىنىڭ دە ماڭىزى زور.

بۇگىندە سپورتقا مەملەكەت تاراپىنان باسا كوڭىل ءبولىنىپ، جاعداي جاسالۋدا. شىعىستى عانا الساق، بەردىبەك ماشبەكۇلى وڭىرگە اكىم بولىپ كەلگەلى بىرنەشە دۇنيەجۇزىلىك ءدۇبىرلى دودالاردا جۇلدەلى ورىنداردان كورىنىپ كەلەمىز. ايتالىق، لوندوندا توپ جارعان ولگا رىپاكوۆا، شاڭعىشى الەكسەي ءپولتورانيننىڭ جەڭىستى جولىن ايبەك باۋىرىمىز دا جالعادى. وسىنداي جەڭىستەردىڭ ناتيجەسىندە وڭىرىمىزدە سپورتتىق نىساندار كوپتەپ بوي كوتەرىپ، سپورتتى دامىتۋعا قىرۋار قارجى بولىنۋدە. الداعى ۋاقىتتاردا دا ءبىزدىڭ شىعىستىڭ سپورتى بيىكتەن تۇسپەيدى دەگەن سەنىمدەمىن.

Abai.kz