13 قىركۇيەكتە مولدوۆا وكىمەتى ەلدەن شىعارىپ، ون جىلعا دەيىن قايتا كىرۋگە تىيىم سالعان "Sputnik مولدوۆا" اقپارات اگەنتتىگىنىڭ باسشىسى ۆيتالي دەنيسوۆ رەسەي ارناۋلى قىزمەتىندەگى 72-ورتالىقتىڭ قىزمەتكەرى بولىپ شىققان. مۇنى The Insider باسىلىمى جاريالادى.

"شەتەل اۋديتورياسىنا رەسەي ارناۋلى قىزمەتىنىڭ مۇددەسىنە ساي كەلەتىن اقپارات تاراتۋمەن شۇعىلدانعان" دەيدى باسىلىم.

ۋكراينادا تۋىپ-ءوسىپ، 1992 جىلى لۆوۆ جوعارى اسكەري-ساياسي ۋچيليششەسىن بىتىرگەن دەنيسوۆ ۋكرايناعا انت بەرۋدەن باس تارتىپ، ماسكەۋگە كەتكەن" دەپ جازادى The Insider. رەسەيدە ونى ارناۋلى قىزمەتتىڭ شتاب-پاتەرىنە جاقىن ماڭداعى وفيتسەرلەر جاتاقحاناسىنا ورنالاستىرعان.

سودان سوڭ رەسەي قورعانىس مينيسترلىگىنىڭ نەگىزگى ءباسپاسوز ءۇنى - "كراسنايا زۆەزدا" گازەتىنىڭ قىزمەتكەرى بولعان. ارناۋلى قىزمەتتىڭ باقىلاۋىنداعى "تريبۋنە زا رۋبەجوم" باسىلىمىنا دا جازىپ تۇرعان.

2005 جىلى رەسەي قورعانىس مينيسترلىگىنەن قىزمەت پاتەرىن العان، 2013 جىلى ماسكەۋ وبلىسىنىڭ باس تەرگەۋ باسقارماسىندا جۇمىس ىستەگەن.

رەسەي قورعانىس مينيسترلىگىندەگى دەرەككوزدەرىنە سۇيەنگەن The Insider دەنيسوۆ تەرگەۋ كوميتەتىنەن ارناۋلى قىزمەتتىڭ شەتەل اۋديتورياسىنا جالعان اقپارات تاراتۋمەن اينالىساتىن 72-ورتالىعىنا اۋىسقان دەپ جازادى. 2016 جىلى پولكوۆنيك شەنىن العان. 2019 جىلى وڭتۇستىك وسەتياداعى، كەيىن ازەربايجانداعى، 2022 جىلدان مولدوۆااعى Sputnik باسىلىمىنا جەتەكشىلىك ەتكەن. بۇل اقپاراتتار جونىندە دەنيسوۆتىڭ ءوزى ازىرگە تۇسىنىك بەرمەگەن.

مولدوۆانىڭ كوشى-قون قىزمەتىنىڭ قىزمەتكەرلەرى دەنيسوۆتى مولدوۆادان شىعارىپ، 10 جىلعا دەيىن قايتا كىرۋگە تىيىم سالعان. دەنيسوۆتىڭ سوزىنشە، "وعان زاتتارىن جيناۋعا دا مۇمكىندىك بەرمەي ۇشاققا وتىرعىزىپ جىبەرگەن".

دەنيسوۆتىڭ دەپورتاتسيالانعانىنا "Sputnik مولدوۆا" دا كىرەتىن "روسسيا سەگودنيا" مەدياتوبىنىڭ جەتەكشىسى دميتري كيسەلەۆ نازار اۋدارىپ، "مولدوۆا بيلىگى حالىقارالىق قاتىناستاردىڭ بارلىق شەگىنەن اتتاپ ءوتتى" دەپ سيپاتتاعان.

2022 جىلى اقپاندا رەسەي ۋكرايناعا باسىپ كىرگەن سوڭ مولدوۆانىڭ اقپارات جانە قاۋىپسىزدىك قىزمەتى "Sputnik مولدوۆا" سايتىن بۇعاتتاعان. 2023 جىلى 7 ناۋرىزدا اتالعان اقپارات اگەنتتىگىنىڭ تاعى دا بەس سايتىن بۇعاتتاعان.

2023 جىلى شىلدەدە The Insider مەن Jurnal TV كيشينەۆتەگى رەسەي ەلشىلىگىندە ىستەيتىن ارناۋلى قىزمەت وكىلدەرى تۋرالى زەرتتەۋىن جاريالاعان. وسىدان كەيىن مولدوۆا رەسەيدىڭ 45 ديپلوماتىن ەلدەن شىعارعان.

دەرەككوز: centralasian

Abai.kz