توتەنشە جاعدايلار ءمينيسترى سىرىم ءشارىپحانوۆتىڭ سوزىنشە، ءورت ساراپشىلارى شاحتادا قىسقا تۇيىقتالۋ مەن قاساقانا ءورت قويىلعانىن جوققا شىعارعان. بۇعان دەيىن وسىنداي قاۋەسەت تە تاراعان.

- كىنالى جۇمىسشىلار ەمەس، جۇمىس بەرۋشى ەكەنى 100 پايىز انىق،- دەگەن ءمينيستردىڭ سوزىنشە، 28 جاۋاپتى تۇلعا انىقتالعان. اپات كەزىندە قولدانىلعان تەحنيكا مەن قۇرال-جابدىقتارعا ساراپتاما جاسالعان. ۇكىمەت كوميسسياسىنىڭ ويىنشا، كومىر كونۆەيەرىندەگى ءورت توقتاپ قالعان روليك لەنتاسىنىڭ قىزۋىنان شىققان. لەنتا ءبىر جارىم اي عانا جۇمىس ىستەگەن.

سىرىم ءشارىپحانوۆتىڭ ايتۋىنشا، قاۋىپتىلىگىنە بايلانىستى كوميسسيا مۇشەلەرىنىڭ ءبارى بىردەي شاحتاعا تۇسە الماعان. ەكى مۇشەسى ءتۇسىپ، اپات ورنىنا مەيلىنشە جاقىنداعان، بىراق سوڭىنا دەيىن جەتە الماعان.

ءمينيستردىڭ سوزىنشە، شاحتانىڭ ينجەنەرلىك-تەحنيكالىق قۇرامى تاراپىنان جەتكىلىكتى وندىرىستىك باقىلاۋ بولماعان، قاۋىپسىزدىك تەحنيكاسى ساقتالماعان، تاعى دا بىرنەشە وسىعان ۇقساس سەبەپتەر ءورت شىعۋىنا تۇرتكى بولعان.

- كونۆەيەر روليكتەرى كەي تۇستا مايىسقان، ونداعى كومىر لەنتادان اسىپ تۇسكەن. لەنتا اينالماعان سوڭ، قىزىپ ءورت شىققان. تەحنيكالىق باقىلاۋ ءتيىستى دەڭگەيدە جۇرگىزىلمەگەنىن كەيىنگى ەكى اپتاداعى تىركەۋ جۋرنالى دا راستاپ تۇر، - دەيدى سىرىم ءشارىپحانوۆ.

بريفينگتەى اقپاراتقا قاراعاندا، شاحتاداعى ءورت ءالى وشپەگەن. ءورت شىققان ۋچاسكەنى وقشاۋلاۋ جۇمىستارى جالعاسىپ جاتىر.

"ارسەلورميتتال تەمىرتاۋ" اق اتقارۋشى ديرەكتورى ۆيكتور گافيۋلوۆتىڭ سوزىنشە، تاۋ-كەن جۇمىستارىن جالعاستىرۋدىڭ ءتۇرلى نۇسقالارى ويلاستىرىلعان، ازىرگە شىعىن تۋرالى ايتۋعا ەرتە. شاحتا جۇمىسشىلارى كومپانيانىڭ وزگە شاحتالارىنا اۋىستىرىلعان.

بريفينگتە سويلەگەن قاراعاندى وبلىسى اكىمىنىڭ ورىنباسارى ۆاديم ءباسيننىڭ ايتۋىنشا، "جۇمىستاعى كەمشىلىكتەر ءبىر، ءبىر جارىم جىلدا تۇزەلە سالمايدى". باسين بۇل قىزمەتىنە دەيىن "ارسەلور ميتتال تەمىرتاۋ" كومپانياسىنداعى باسشىلىق قىزمەتتە بولعان.

17 تامىزدا "كازاحستانسكايا" شاحتاسىنان ءورت شىققان بولاتىن. اپاتتان بەس ادام ءولىپ، 16 ادام جارالانعان.

دەرەككوزى: centralasian.org

Abai.kz