سەكسەنىنشى جىلدارى رەسپۋبليكا سارايىندا اقىندار ايتىسى ءوتتى. سول ايتىستا جامبىلدان كەلگەن ءوندىر ونەرپاز ابيىربەك تىناليەۆ مۇقاعاليدىڭ فاريزاعا ارناعان ولەڭىنە جازعان "فاريزا" انىمەن بۇلتسىز كۇنى نايزاعاي ويناتقانداي جارق ەتە قالدى.سودان بەرى بۇل ءانشىنىڭ شىعارماشىلىعىن ۇدايى قاداعالاپ جۇرەمىن. "كىسى جارى", "جەلتوقسان جەلى", "تولعاناي" ت.ب اندەرى ەل نازارىن بىردەن اۋداردى. وكىنىشكە وراي، وسى ءبىر ءانشى، كومپوزيتوردىڭ كەيىنگى جىلدارى كوركەمدىك كەڭىستىگىمىزدەن كورىنبەي كەتۋى الاڭداتادى.

ابيىربەكتىڭ "انامنىڭ ءتىلى" ءانى ءتىلىم دەپ سوققان ءار جۇرەك ءۇشىن قىمبات.بۇل ءاننىڭ راديو، تەلەديداردان اندا-ساندا جىل ەتەتىنى بولماسا، كوپ ورىندالمايدى. . تىڭدارماننىڭ تالعامىن قالىپتاستىرۋدا، نامىسىن، جىگەرىن جانۋدا مۇنداي اندەردىڭ رۋحاني قۋاتى كۇشتى. اسىرەسە مىنا الاقۇيىن زامانعا دەگەن كوزقاراسى، وي-پىكىرى ەندى قالىپتاسىپ كەلە جاتقان ۇرپاقتىڭ ساناسى وسىنداي اندەرمەن نارلەنۋى كەرەك. ەلدى، جەردى، ۇلتىڭدى ءسۇيۋ، الگى ءبىز ءجيى ايتاتىن پاتريوتيزم وسى تۋىندىلار ارقىلى قالىپتاسادى. بۇل ءاننىڭ اۋەنىن بالا دا تەز قابىلدايدى.بالا ۇعىمىنا، جانىنا جاقىن.ورتا مەكتەپتەردە ءان ءپانى وتەدى. ءاننىڭ سازدىلىعى، بالا كوڭىلىنە بىردەن قونا كەتەرى ءوز الدىنا، سول ساباقتا ونىڭ اۆتورلارى تۋرالى ءبىلۋ دە بالانىڭ تۇلعا تۋرالى تانىمدىق دەڭگەيىن، وي-ءورىسىن كەڭەيتە تۇسسە كەرەك. اسىرەسە، الماتىدا قازاق مەكتەپتەرىن اشۋدا جانىن شۇبەرەككە ءتۇيىپ، كەشەگى جەلتوقساننىڭ قاھارلى كۇندەرىندە جۇرەگى قان جىلاپ وتىرىپ كۇندەلىك جازعان، باسقان ءىزى ومىردەن وزعانشا اڭدۋدا بولعان شونا ءسماحانۇلىنىڭ وسى ءاننىڭ ءسوزىن جازعانىن بۇگىنگى بالا تۇرماق، ۇلكەندەر دە بىلە بەرمەيدى.
ءتىلدى ۇيرەنۋ، قادىرلەۋ وزگە دە قۇندىلىقتاردى باعالاۋ ارقىلى جۇزەگە اسادى. بالا ساناسىندا وزگەرىس جاساپ، ونى ەلجاندى ەتىپ تاربيەلەۋ ءۇشىن، ءتىپتى ءبىر قاۋىم ەلدىڭ رۋحىن كوتەرۋ ءۇشىن ءبىر ءاننىڭ ءوزى جەتىپ جاتىر.مۇنداي اندەر قازاقتا از با؟ ءبىز ورىستان مىسال كەلتىرگەندى جاقسى كورەمىز عوي. بلانتەر تاريحتا ءبىر عانا " كاتيۋشا", "جۋراۆليىمەن",اليابەۆ "بۇلبۇلىمەن", سولوۆەۆ- سەدوي "پودموسكوۆنىە ۆەچەراسىمەن" ( وسى ءبىر انىمەن مەملەكەتتىك سىيلىق الدى) قالدى عوي. ابيىربەكتىڭ دە باسقا اندەرى ءبىر توبە دە، "انامىڭ ءتىلى" ءبىر ءوزى ءبىر توبە ەمەس پە!؟ ەڭ باستىسى بۇل ءاندى حالىق توقتاۋسىز شىرقاپ كەلە جاتقانىنا دا قىرىق جىل ال ەندى بار عوي، وسى ءاندى كىل ءبىر قارادومالاقتار بوزتورعايداي شىرىلداپ ايتقاندا جانىڭدى قويارعا جەر تاپپايسىڭ-اۋ.

ءبىر وكىنىشتى جاي، كەيبىر اندەردى ونىڭ اۆتورىنىڭ سالماعىنا، قوعامداعى ورنىنا، تانىمالدىلىعىنا قاراپ باعالايتىن، اندەرى ەل اۋزىندا جۇرگەن ازاماتتارعا اۋەسقويلىق تۇرعىدان قارايتىن ءبىر جانى ءسىرى ادەت ءالى دە قالماي كەلەدى. وسى تۇرعىدان كەلگەندە ءانىن حالىق جاپپاي ايتىپ جۇرگەن كومپوزيتوردى ول اۋەسقوي، كاسىبي دەپ بولمەي، الالاماي، ورتاق تۋىندى، تالانتتى تۋىندى دەپ قاراپ، حالىقتىڭ رۋحاني يگىلىگىنە جاراتۋدى ويلاۋ كەرەك.

ايتپاعىم نە؟ مەملەكەت باسشىسى تۇركىستاندا وتكەن ۇلتتىق قۇرىلتايدا باسقالارىمەن قاتار، قازاقستاننىڭ حالىق ءارتيسى اتاعىن قالپىنا كەلتىرۋ جونىندە ايتتى. ابيىربەكتەي ءوزى ءانشى، اكتەر، كومپوزيتور، دارىندى ازاماتتار ءار سالادا (فيلارمونيا، تەاتر ت.ب) ەل ىشىندە بارشىلىق. ەندىگى جەردە قازاقستاننىڭ حالىق ءارتيسى اتاعى سول باياعى ەسكى سۇرلەۋمەن استانا مەن الماتىنى اينالشىقتاي بەرمەي، ەل ىشىندە ەلەۋسىز جۇرگەن، ەڭبەگى ەش، تۇزى سور، ونەرىن حالىق باعالايتىن، ءانىن حالىق جاتپاي-تۇرماي ايتىپ جۇرگەن ونەرپازعا بەرىلۋى كەرەك. سولاردىڭ ءبىرى دە بىرەگەيى ءبىر-ەكى جىلدا جەتپىستىڭ قىر جەلكەسىنە شىعاتىن، ءالى كۇنگە ەلەۋلى اتاعى جوق ابيىربەك تىناليەۆ.
وسىلاي بولعان كۇندە ءبىز "ادىلەتتى قازاقستان" ۇعىمىنا ءبىرتابان جاقىنداي تۇسەتىن شىعارمىز. قايدان بىلەيىن، جول ۇستىندە جازىلعان جەدەل جازبامدا وسىلاي ءبىر دەدىم.

قالي سارسەنباي

Abai.kz