قازاقستاندىقتار كىمگە قارسى پەتيتسيا جازا المايدى؟
مادەنيەت جانە اقپارات ۆيتسە-ءمينيسترى دانيار قادىروۆ قازاقستاندا قانداي تاقىرىپتار بويىنشا پەتيتسيا بەرۋگە بولمايتىنىن ءتۇسىندىردى.
اتاپ ايتقاندا، بۇگىن سەناتتىڭ جالپى وتىرىسىندا «قوعامدىق باقىلاۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق باقىلاۋ، اكىمشىلىك راسىمدەردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارى ماقۇلداندى.
بۇل قۇجاتتاردا پەتيتسيا ينستيتۋتىن رەگلامەنتتەۋ جونىندەگى تۇزەتۋلەر قامتىلعان. ۋاكىلەتتى ورگان پەتيتسيا جاريا بولعانشا ونىڭ زاڭدا بەكىتىلگەن شارتتارعا سايكەستىگىن انىقتايدى.
بۇل رەتتە باسقارۋ نىسانىن، رەسپۋبليكانىڭ اكىمشىلىك-اۋماقتىق قۇرىلىمى مەن شەكارالارىن، سوت تورەلىگىن، راقىمشىلىقتى، ۇلتتىق قاۋىپسىزدىكتى جانە ت.ب. وزگەرتۋ سياقتى ماسەلەلەر بويىنشا پەتيتسيا بەرىلمەيدى.
«تىيىم سالىنعان» تاقىرىپتاردىڭ تىزبەسى كونستيتۋتسيالىق جانە قىلمىستىق قۇقىق، رەفەرەندۋم تۋرالى زاڭ نەگىزىندە قالىپتاستىرىلعان.
«اكىمشىلىك-اۋماقتىق قۇرىلىم، شەكارا، ءتىل ماسەلەسى، كونستيتۋتسيالىق زاڭدار، ارنايى قىزمەتتەردىڭ جۇمىسى قاراستىرىلمايدى. سونىمەن قاتار، مەملەكەتتىك قۇپيا ساناتىنداعى ماسەلەلەر پەتيتسيادا قارالمايدى. مۇنىمەن قوسا، پرەزيدەنت، پارلامەنتتىڭ قوس پالاتاسى جانە ۇكىمەتتىڭ قۇزىرەتىنە كىرەتىن لاۋازىمداردى تاعايىنداۋ مەن بوساتۋ ماسەلەلەرى قارالمايدى. ويتكەنى بۇل تاقىرىپ ءتيىستى زاڭناما اياسىندا ىسكە اسادى. اتاپ ايتقاندا، ادامنىڭ قۇقىعى مەن بوستاندىعىنا نۇقسان كەتىرەتىن تاقىرىپتار پەتيتسيادا قارالمايدى»، - دەدى دانيار قادىروۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، بۇعان دەيىن پەتيتسيا ورنالاستىرۋ پلاتفورمالارى رەسمي بولمادى.
بۇگىن زاڭ جوبالارى كۇشىنە ەنگەن جاعدايدا رەسمي اقپاراتتىق پلاتفورما پايدا بولادى. ول «ە-وتىنىشتە» جەكە مودۋل بولىپ بەلگىلەنەدى.
وسى ورايدا تىلشىلەر ۆيتسە-مينيستردەن «قازاقستاندىقتار تىكەلەي اكىمدەر مەن مينيسترلەرگە قارسى پەتيتسيا بەرە الا ما؟» دەپ سۇرادى.
«بۇل ماسەلەلەر زاڭدا انىق كورسەتىلگەن. قارسى پەتيتسيا بەرە المايدى. ويتكەنى كونستيتۋتسيالىق زاڭ بار، پرەزيدەنتتىڭ، ۇكىمەتتىڭ جانە پارلامەنتتىڭ قوس پالاتاسىنىڭ كونستيتۋتسيالىق قۇقىقتارى بار. ال باسقا جاعدايلاردا ۇسىنۋعا بولادى. بىراق پرەزيدەنت، پارلامەنتتىڭ قوس پالاتاسى جانە ۇكىمەت تاعايىندايتىن لاۋازىمدار بويىنشا پەتيتسيا جاسالمايدى»، -دەدى دانيار قادىروۆ.
Abai.kz
