بۇگىن ازەربايجان رەسپۋبليكاسى پرەزيدەنتىنىڭ شاقىرۋىمەن ەۆلاح قالاسىندا قاراباقتاعى ارميان تۇرعىندارىمەن بايلانىسقا جاۋاپتى رامين مامەدوۆ قاراباقتاعى ارميان تۇرعىندارىنىڭ وكىلدەرى سەرگەي مارتيروسيان جانە داۆيد مەلكۋميانمەن كەزدەستى. بۇل تۋرالى ازەرتادج حابارلادى.

ءمالىم ەتىلگەندەي، كەزدەسۋ سىندارلى جانە ءپوزيتيۆتى سيپاتتا وتكەن.

ازەربايجان وكىلى ر. مامەدوۆ قاتىسۋشىلاردى قاراباقتاعى ارميان حالقىن رەينتەگراتسيالاۋ، ينفراقۇرىلىمدى قالپىنا كەلتىرۋ جانە ازەربايجان رەسپۋبليكاسىنىڭ كونستيتۋتسياسى مەن زاڭدارى نەگىزىندە ءىس-شارالاردى ۇيىمداستىرۋ جوسپارىمەن تانىستىرعان.

سونداي-اق ازەربايجان قورعانىس مينيسترلىگىنىڭ تەرروريزمگە قارسى شارالاردى توقتاتۋ تۋرالى 20 قىركۇيەكتەگى مالىمدەمەسىندە كورسەتىلگەن ماسەلەلەردى تەز ارادا جۇزەگە اسىرۋدىڭ ماڭىزدىلىعى اتاپ وتىلگەن.

ءوز كەزەگىندە قاراباقتاعى ارميان تۇرعىندارىنىڭ وكىلدەرى وڭىردە جانار-جانارماي تاپشىلىعى بار ەكەنىن جەتكىزگەن. سونىمەن قاتار ولار ازىق-تۇلىك تۇرىندەگى گۋمانيتارلىق كومەك سۇرادى.

«كەزدەسۋ قورىتىندىسى بويىنشا ولاردىڭ ءوتىنىشى وڭ قابىلداندى. اتاپ ايتقاندا، جاقىن ارادا بالاباقشالار مەن مەكتەپتەردى جىلۋ جۇيەلەرىمەن قامتاماسىز ەتۋ، سونداي-اق جەدەل مەديتسينالىق كومەك پەن ورتكە قارسى قىزمەتتەردى وتىنمەن قامتاماسىز ەتۋ جانە گۋمانيتارلىق قولداۋ كورسەتۋ جوسپارلانىپ وتىر»، - دەلىنگەن اگەنتتىك اقپاراتىندا.

ارميان تاراپى كەلىسسوز ناتيجەسى بويىنشا باكۋمەن ەشبىر تۇپكىلىكتى شەشىم قابىلدانباعانىن، ماسەلەلەر بويىنشا كەلىسىم قاجەت ەتىلەتىنىن مالىمدەگەن.

تاراپتار الداعى ۋاقىتتا كەزەكتى كەزدەسۋ وتكىزۋگە كەلىستى.

فوتو: اشىق دەرەككوزدەن

Abai.kz