وبلىس اكىمدىگىنىڭ مالىمەتىنە سۇيەنسەك، اۋىل تۇرعىنى تاپسىرعان پتر ناتيجەسىندە ءسىبىر جاراسى انىقتالماعان.

«قازىرگى تاڭدا بەسقاراعاي اۋدانى جەتىجار اۋىلىنىڭ تۇرعىنى ەم قابىلداۋىن جالعاستىرىپ جاتىر. ناۋقاستىڭ جاعدايى تۇراقتى، دەنە قىزۋى قالىپتى»، - دەلىنگەن اقپاراتتا.

جەتىجار اۋىلىندا مىندەتتى تۇردە تەرمومەتريا جۇرگىزىلىپ، كۇن سايىن بارلىق مال باسى كلينيكالىق تۇردە تەكسەرىلىپ جاتىر. بۇگىندە ءتورت تۇلىكتەن ەشقانداي اۋرۋ انىقتالعان جوق.

«بەسقاراعاي-ۆەت» مەملەكەتتىك كاسىپورنىنىڭ ماماندارى زالالسىزداندىرۋ جۇمىستارىن جالعاستىرىپ جاتىر.

ەسكە سالساق، وسىعان دەيىن اباي وبلىسىنداعى ءبىر اۋىلدا توتەنشە جاعداي جاريالانعان ەدى.

جەتىجار اۋىلىنىڭ تۇرعىنى ءسىبىر جاراسى اۋرۋىنا شالدىققان دەگەن كۇدىككە ىلىنگەن.

اۋىلدىڭ كىرە بەرىسىنە سانيتارلىق بەكەت ورناتىلىپ، اۋىلدان اۋىل شارۋاشىلىعى ونىمدەرىن شىعارۋعا ۋاقىتشا شەكتەۋ قويىلدى.

Abai.kz