بۇل تۋرالى ونىڭ جۇبايى، جۋرناليست ينگا يمانباي ءمالىم ەتتى، دەپ حابارلايدى Ulysmedia.kz.

ونىڭ ايتۋىنشا، كەشە بوستاندىق اۋداندىق سوتى جانبولات مامايدىڭ «قوعامدىق ساياسي جانە پۋبليتسيستيكالىق قىزمەتكە تىيىم سالۋ بويىنشا» تۇسىندىرمە بەرۋدى سۇرايتىن ءوتىنىش حاتى نەگىزىندە وتىرىس وتكىزگەن.

“جانبولات مىناداي سۇراقتاردى قويدى: وعان جابىق عيماراتتا ترەنينگ وتكىزۋگە رۇقسات ەتىلە مە; وقىعان كىتاپتارى بويىنشا ونلاين ەفيرلەر جۇرگىزە الا ما; ەلدىڭ قاتارداعى ازاماتى رەتىندە اقپارات قۇرالدارىنا سۇحبات بەرە الا ما; قۇقىق قورعاۋ قىزمەتىمەن اينالىسىپ، سوتتارعا مونيتورينگ جاساپ، ءتۇرلى جيىندارعا قاتىسا الا ما; الەۋمەتتىك جەلىگە ساياسي ەمەس تاقىرىپتارمەن شىعىپ، ەفير جۇرگىزە الا ما; كىتاپ جازىپ، ونى شىعارىپ، كوپشىلىككە تانىستىرا الا ما. سوت ەلەنا كۆان بارلىق سۇراقتاردى قاراستىرعان سوڭ وعان ناقتى جاۋاپ بەردى: جوعارىدا اتالعان ءىس ارەكەتتەردى جۇرگىزۋگە جانبولاتقا تىيىم سالىنعان. جانبولاتتىڭ «كىتاپ جازۋعا جانە ونى شىعارۋعا نەگە تىيىم سالاسىز؟» دەگەن سۇراعىنا سوت «مۇنى دا قوعامدىق ساياسي ءىس ارەكەت دەپ سانايمىن» دەدى. سوت وتىرىسىنىڭ سوڭىندا ول جانبولاتقا جازاسىن ءتارتىپ بۇزۋشىلىقسىز وتەۋگە، ولاي بولماعان جاعدايدا تۇرمەگە قامالاتىنىن جەتكىزدى”، – دەپ جازدى ينگا يمانباي.

ءبىر سوزبەن ايتقاندا، 2029 جىلعا دەيىن جانبولات مامايعا قوعامدىق كەڭىستىكتە قانداي دا ىسپەن شۇعىلدانۋعا تولىق تىيىم سالىندى.

ەسكە سالايىق، سوت جانبولات مامايدى 6 جىلعا شارتتى تۇردە سوتتادى. وعان قوعامدىق-ساياسي جۇمىسپەن اينالىسۋعا تىيىم سالىندى. جانبولات مامايعا «قاساقانا جالعان اقپارات تاراتۋ» (274-باپ), «بيلىك وكىلىن قورلاۋ» (378-باپ) جانە «جاپپاي تارتىپسىزدىكتەر ۇيىمداستىرۋ» (272-باپ) بويىنشا ايىپتار تاعىلعان ەدى. العاشقى ەكى ايىپتاۋ 2021 جىلعى وقيعالارعا، ال ءۇشىنشىسى 2022 جىلعى قاڭتارداعى وقيعالارعا قاتىستى.

ماۋسىمدا اپەللياتسيالىق سوت تىركەلمەگەن دەمپارتيا كوشباسشىسىنا شىعارىلعان ۇكىمدى وزگەرىسسىز قالدىرعان بولاتىن.

ماماي ءىسىن زەردەلەگەن بۇۇ جۇمىس توبى قازاقستان ۇكىمەتىنە ۇندەۋ جولداپ، بەلسەندىنىڭ نەگىزسىز سوتتالعانىن مالىمدەگەن.

Abai.kz