استاناداعى "قازاقستان" كونتسەرت زالىنىڭ باسشىلىعى 30 قىركۇيەكتە سۋ قۇبىرىنا جوندەۋ جۇمىسى جۇرگىزىلەتىنىن، ال 1 قازاندا الماتىداعى رەسپۋبليكا سارايى ساحنا بۇزىلعانىن حابارلادى.

ينستاگرامداعى اككاۋنتىندا رەسپۋبليكا سارايى "ساحنا مەحانيكاسىنىڭ اپاتتى جاعدايىنا بايلانىستى كونتسەرت وتكىزۋ شۇعىل توقتاتىلعانىن" جازدى. ولارعا 30 قىركۇيەكتە الماتى قالاسىنىڭ مەدەۋ اۋداندىق توتەنشە جاعداي باسقارماسىنىڭ باسشىلىعى وسىنداي ۇيعارىم بەرگەن.

جوندەۋ جۇمىستارى ەكى اپتاعا سوزىلادى دەپ ايتىلادى.

ماكسيم گالكيننىڭ كونتسەرتىن ۇيىمداستىرۋى ءتيىس بولعان استاناداعى "قازاقكونتسەرت" 4-10 قازاندا "استانا سۋ ارناسى" مەملەكەتتىك كوممۋنالدى كاسىپورنى قالا اۋماعىنىڭ سۋ قۇبىرىن جوندەيتىنىن ايتتى.

اقپاراتقا قاراعاندا، "قازاقكونتسەرت" ماكسيم گالكينگە تۋىنداعان جاعداي جونىندە حابارلاعان.

گالكيننىڭ كونتسەرتى استانادا – 8 قازاندا، الماتىدا 9 قازانعا جوسپارلانعان ەدى.

بۇعان دەيىن ماكسيم گالكين بىرنەشە ايدان بەرى قازاقستاندا كونتسەرت وتكىزە الماي جۇرگەنىن ايتقان. بيىل 30 تامىزدا Instagram-پاراقشاسىندا جاريالاعان ۆيدەوسىندا گالكين الماتى مەن استانادا جوسپارلاعان كونتسەرتىنە قازاقستاندا "مەملەكەتتىك دەڭگەيدە كەدەرگى كەلتىرىپ جاتقانىن" ايتا كەلە، "شەنەۋنىكتەر كومانداما ۇنەمى قارسىلىق تانىتادى" دەگەن.

كەيىن قازاقستاندىق قولدانۋشىلار گالكيننىڭ قازاقستاندا ونەر كورسەتۋىن قولداعان، ارتىنشا بيلەتتەر قايتا ساتىلا باستاعان.

رەسەي ۋكرايناعا باسىپ كىرگەننەن كەيىن ماكسيم گالكين مەن اللا پۋگاچەۆا بالالارىمەن بىرگە رەسەيدەن كەتكەن. گالكين شەتەلدە ءجۇرىپ، رەسەيدىڭ ارەكەتىن قاتاڭ سىناعان.

سوعىس باستالعالى بەرى رەسەيلىك ارتىستەردىڭ كوبى بۇرىنعىداي جەر-جەردە كونتسەرت وتكىزۋ مۇمكىندىگىنەن ايىرىلدى. قازاقستاندا رەسەي انشىلەرىنىڭ كونتسەرتىنە جاپپاي ەمەس، ءىشىنارا تىيىم سالىنادى. مىسالى، "تانىمال Z-ءارتىس" دەگەن اتاققا يە پولينا گاگارينانىڭ كونتسەرتى كوپشىلىكتىڭ تالابىمەن وتپەي قالدى. بىراق كيركوروۆتىڭ استانا مەن الماتىداعى كونتسەرتىنە رەسمي قارسىلىق بولمادى.

الەۋمەتتىك جەلىدەگى جاپپاي نارازىلىققا بايلانىستى لاريسا دولينا قازاقستانعا كەلە المادى. كونتسەرت وتەتىن ورىننىڭ اكىمشىلىگى الەۋمەتتىك جەلىدە "قاراعاندى وبلىسى تۇرعىندارىنىڭ نەگاتيۆ رەاكتسياسىنا بايلانىستى ۇيىمداستىرۋشىعا لاريسا دولينانىڭ كونتسەرتىن وتكىزۋگە ورىن بەرىلمەيدى" دەپ جازدى.

بيىل 15 اقپاندا الماتىدا رەسەيلىك انشىلەر قاتىساتىن "جارا" فەستيۆالى وتپەي قالعان. ۇيىمداستىرۋشىلار ەلدەگى جانە الەمدەگى ساياسي جاعدايعا بايلانىستى مۋزىكالىق شارا كەيىنگە قالاتىنىن حابارلاعان. رەسەيلىك شوۋ-بيزنەس وكىلدەرى، ىشىندە سوعىستى قولدايتىن گريگوري لەپس تە بار، 2022 جىلدىڭ جازىنان بەرى قازاقستاندا كونتسەرت وتكىزۋگە تالپىنىپ كەلەدى.

دەرەككوزى: centralasian.org

Abai.kz