قازاقستان سىرتقى ىستەر مينيسترلىگى ەل تۋرالى جاعىمسىز پىكىر ايتقانداردىڭ ءتىزىمىن جاساپ جاتىر. تىزىمدەگىلەر ەلگە كىرگىزىلمەيدى. بۇل تۋرالى 2 قازانداعى بريفينگتە مينيسترلىكتىڭ رەسمي وكىلى ايبەك سمادياروۆ مالىمدەدى.

"ارينە، مۇنداي ءتىزىمدى جاساپ جاتىرمىز، بىراق بۇل مينيسترلىكتىڭ ىشكى ءتىزىمى، سوندىقتان ونى جاريالامايمىز. [قازاقستان تۋرالى جاعىمسىز] مالىمدەمەلەردى نازاردان تىس قالدىرمايمىز. تىزىمدەگىلەردىڭ سانىن دا ايتا المايمىن. تىزىمدەگىلەر ءۇشىن شەكارا جابىلادى دا، ولار ەلگە كىرە المايدى" دەدى سمادياروۆ.

ءسىم رەسمي وكىلى بۇل ءسوزىن جۋرناليستەردىڭ رەسەيلىك دارىگەر ءارى بلوگەر يليا ماگەردىڭ سوزىنە قاتىستى سۇراعىنا جاۋاپ بەرگەندە ايتتى. ماگەر قازاقستان مەن رەسەي اراسىندا سوعىس بولۋى مۇمكىن دەگەن ەدى.

ايبەك سمادياروۆ ماگەرگە "سالەم" جولداپ، وعان "قاجەتسىز سوزدەردى ايتقانشا" ادامداردى ەمدەۋمەن اينالىسۋعا شاقىردى.

كەيىنگى جىلدارى رەسەي ساياساتكەرلەرى مەن ساراپشىلارىنىڭ قازاقستانعا قاتىستى ارانداتۋ سيپاتىنداعى مالىمدەمەلەرى جيىلەي ءتۇستى. قازاقستان حالقىنىڭ بەلسەندى بولىگى مۇنداي مالىمدەمەلەردى قوقان-لوقى، ەلدىڭ اۋماقتىق تۇتاستىعىنا قول سۇعۋ دەپ باعالايدى. بىلتىر ماسكەۋ قالالىق دۋماسىنىڭ دەپۋتاتى سەرگەي ساۆوستيانوۆ ۋكراينا ۇلگىسى بويىنشا قازاقستاندى دا "دەناتسيفيكاتسيالاۋ" جانە "دەميليتاريزاتسيالاۋعا" شاقىرعان.

2022 جىلى قاراشادا كرەملشىل ساراپشى دميتري دروبنيتسكي رەسەيلىك پروپاگانديست ۆلاديمير سولوۆەۆتىڭ باعدارلاماسى كەزىندە "ۋكراينادان كەيىنگى ماسەلە - قازاقستان", "ول جاقتا دا ۋكرايناداعىداي ناتسيستىك پروتسەستەر ورىستەۋى مۇمكىن" دەپ ايتقان.

كەيىن قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو "بۇل رەسەي بيلىگىنىڭ رەسمي ۇستانىمى ەمەس" ەكەنىن ايتىپ، دەگەنمەن مەملەكەتتىك ارنادا ايتىلعاننان كەيىن وعان رەسەي بيلىگى رەاكتسيا بىلدىرگەنى ءجون دەگەن.ال رەسەي پرەزيدەنتىنىڭ ءباسپاسوز حاتشىسى دميتري پەسكوۆ سولوۆەۆ باعدارلاماسىندا ايتىلعان جايتتار كرەملدىڭ پوزيتسياسى ەمەس ەكەنىن ايتقان.

2023 جىلى مامىر ايىندا "قازاقستان ۋكراينانىڭ كەبىن كيۋى مۇمكىن" دەپ مالىمدەگەن رەسەي مەملەكەتتىك دۋماسىنىڭ دەپۋتاتى كونستانتين زاتۋلين رەسەي ءسىم ارالاسقاننان كەيىن قازاقستان اۋماعىنا كىرە العان.

2022 جىلى ماۋسىمدا قازاقستان سىرتقى ىستەر مينيسترلىگى رەسەيدىڭ پروپاگانديسى تيگران كەوسايان ەلگە كىرە المايتىنداردىڭ تىزىمىنە ەنگەنىن ايتقان. كەوسايان YouTube-ارناسىندا جەڭىس كۇنى پاراد وتكىزۋدەن باس تارتقان قازاقستانعا قاراتا زىلدەنىپ سويلەگەن. "ۋكراينانىڭ كۇنى قازاقستانعا دا تۋى مۇمكىن" دەپ دوق كورسەتىپ، قازاقستانمەن "قارىم-قاتىناستى قايتا قاراۋعا" ۇندەگەن.

Abai.kz