دەپۋتات ەرمۇرات باپي 4 قازان كۇنى ءماجىلىس وتىرىسىندا يسلام ءدىنىنىڭ جات اعىمدارىنىڭ قازاق قوعامىنا قاۋپى تۋرالى ءسوز ەتىپ، قر پرەمەر-ءمينيسترى مەن ۇلتتىق قاۋىپسىزدىك كوميتەتىنىڭ توراعاسىنا ساۋال جولدادى، دەپ حابارلايدى "ادىرنا" ۇلتتىق پورتالى. 

ەرمۇرات باپي قازىرگى تاڭدا قوعامنىڭ شىرقىن بۇزىپ، ءتۇرلى دۇربەلەڭ تۋدىرىپ جاتقان ماسەلەلەردىڭ كوپشىلىگى تەرىس ءدىني اعىم وكىلدەرىنىڭ ءىسى ەكەنىن ايتا ءوتتى. ءدىني ءۇردىستىڭ ساياسي سيپات الىپ، ماسەلەنىڭ  ءتۇبىن قازعان جاندارعا ءتۇرلى شابۋىلداردىڭ جاسالىپ جاتقانىن دا قوسا كەتتى.

"پارلامەنت دەپۋتاتى رينات زايىتوۆتىڭ ازاماتتىق پىكىرىنە قارسى شابۋىلدار وسىنداي ساياسي قاتەردىڭ سيپاتىن سەزدىرسە كەرەك. قوعامدى ارابتىق-ۋاحابتىق ءدىني ۇستانىم نەگىزدە بولشەكتەۋگە باعىتتالعان بۇل ارەكەتتەرگە بىزدەر – دەپۋتاتتار جايباراقات قاراپ وتىرا المايمىز! ءبىز مىڭجىلدىق دومبىرانى حارام قىلۋعا جول بەرمەيمىز! بۇل ارەكەتتەر ەلدىڭ ۇلتتىق قۇندىلىقتار جۇيەسى مەن رۋحاني نەگىزىنە جاسالىپ جاتقان شابۋىل دەپ ءتۇسىنۋ كەرەك!" دەدى ول.

سونىمەن قوسا، ءدىني سەكتالاردىڭ قازاقستاننىڭ ءتۇرلى ايماعىندا، اتاپ ايتقاندا اتىراۋ، اقتوبە، ماڭعىستاۋ، ۇلىتاۋ، الماتى وڭىرىندە ەتەك جايىپ باراتىنىن ايتتى.

پرەمەر-مينيستر ءاليحان ساميىلوۆقا بىرقاتار ماسەلەلەر بويىنشا شارا قولدانۋ قاجەتتىگىن جەتكىزدى ول:

"بىرىنشىدەن، ءسىز جانە ءسىزدىڭ كابينەتىڭىز قالىپتاسقان كۇردەلى جاعدايدى ءتۇيسىنىپ وتىر ما؟ قوعامنىڭ ءدىني نەگىزدە بولشەكتەنۋ قاۋپىنە قارسى ءىس-قيمىل جوسپارى بار ما؟ ەكىنشىدەن، ۇكىمەت پەن ۇلتتىق قاۋىپسىزدىك كوميتەتى جانە ۋاكىلەتتى ورگاندار بىرلەسىپ، تەرىس ءدىني اعىمدار تۋدىرىپ جاتقان ۇلتتىق الاۋىزدىقتى شۇعىل توقتاتۋدىڭ امال-ارەكەتتەرى ەل پرەزيدەنتىنىڭ نازارىنا ۇسىنىلدى ما؟ ۇشىنشىدەن، بۇدان 12 جىل بۇرىن – 2011 جىلدىڭ 11 قازانىندا قابىل­­دانعان «ءدىني قىزمەت جانە ءدىني بىرلەس­تىكتەر تۋرالى» زاڭعا ءتيىستى وزگەرىستەر مەن تولىقتىرۋلار ەنگىزۋدىڭ قوعامدىق قاجەتتىلىگىن كوتەرەتىن كەز كەلگەن جوق پا؟  تورتىنشىدەن، قالىپتاسقان وسى قوعامدىق جاعدايدا ءبىز بارلىق كۇش-جىگەرىمىزدى بىرىكتىرىپ، ۇلت بىرلىگى مەن مەملەكەتتىڭ تۇراقتى دامۋ جاعدايىن ساقتاۋعا ۇكىمەت پەن پارلامەنت مۇددەلى بولۋى كەرەك دەپ ەسەپتەيمىز. ەگەر ۇكىمەت تاراپىنان قانداي دا ءبىر ءتيىستى قۇجات قابىلداۋ باستاماسى تۋاتىن بولسا، دەپۋتاتتار ونى قولدايدى دەگەن سەنىمىم زور" دەدى ەرمۇرات باپي.