مينيستر ءوز سوزىندە بىلتىر ەلىمىزدە الەمدەگى وزىق 4 جوعارى وقۋ ورنىنىڭ فيلالى اشىلعانىن اتاپ ءوتتى. بيىل تاعى 6 جوو فيليالى اشۋ جوسپارلانىپ وتىر.

اقتوبەدە Heriot-Watt فيليالى اشىلدى. جىل سوڭىندا اقتاۋدا 4 جەتەكشى نەمىس ۋنيۆەرسيتەتتەرىنەن تۇراتىن كونتسورتسيۋم اشىلادى. سونداي-اق جاساندى ينتەللەكتپەن اينالىساتىن العاشقى ۋنيۆەرسيتەتىمىز اشىلادى. ول  الماتىدا دا، استانادا دا ەمەس، قىزىلوردادا بولادى. وڭىرلىك قورقىت اتا ۋنيۆەرسيتەتىنىڭ بازاسىندا سەۋل ۇلتتىق عىلىم جانە تەحنولوگيا ۋنيۆەرسيتەتىمەن بىرلەسىپ اشىلادى، - دەدى مينيستر.

سونداي-اق ول قاراشا ايىندا سەۋلتەحپەن بىرلەسىپ، جاساندى ينتەللەكت مەكتەبى اشىلاتىنىن ايتتى. كورەيا تاراپى جوباعا 2,5 ملن اقش دوللارىن ينۆەستيتسيالاۋدى كوزدەپ وتىر.

جاساندى ينتەللەكت بويىنشا ەكىنشى ۋنيۆەرسيتەت مامان دايارلايتىن بولادى. ءبىز 17-18 كەلىسىمگە قول قويۋ ءۇشىن پەكينگە بارامىز. گونكونگ قالالىق ۋنيۆەرسيتەتىمەن دە جاساندى ينتەللەكتتىڭ اقپاراتتىق تەحنولوگيالارى بويىنشا بىرلەسىپ مامان دايارلايمىز. بۇل – جاس ۋنيۆەرسيتەت بولعانمەن، قازىردىڭ وزىندە 52-ورىندا تۇرعان، كەلەشەگى زور ديناميكالىق ۋنيۆەرسيتەتتىڭ ءبىرى. سونىڭ ارقاسىندا ەلەكتروموبيلدەرگە ينجەنەرلەردى دايارلاۋ كوزدەلىپ وتىر، - دەدى مينيستر.

سونىمەن قاتار، ساياسات نۇربەك جاڭادان اشىلاتىن جوو-لاردا مامانداردىڭ قالاي وقىتىلاتىنىنا توقتالدى.

قورقىت اتا ۋنيۆەرسيتەتىندەگى باعدارلاما 1+3+1 مودەلىمەن وقىتىلادى. ياعني ءبىر جىل فاۋندەيشن، ءۇش جىل سەۋلتەحتىڭ باعدارلاماسى جانە ەڭ مىقتىلار سەۋلدە ءبىر جىل وقيدى. كوپتەگەن باسقا باعدارلامالاردى ءدال وسىلاي قۇرىپ جاتىرمىز»، - دەدى ساياسات نۇربەك.

ەسكە سالا كەتسەك، قازىر استانادا Nobel Fest 2023 فەستيۆالى ءوتىپ جاتىر. Nobel Fest – نوبەل سىيلىعىنىڭ لاۋرەاتتارىمەن، كورنەكتى عالىمدارمەن جانە ساراپشىلارمەن پىكىر جانە ءبىلىم الماسۋعا ارنالعان بىرەگەي پلاتفورما.

نوبەل فەستيۆالىنىڭ باستى ميسسياسى – جاھاندىق ءبىلىم مەن عىلىمدى الەمنىڭ كەز كەلگەن بۇرىشىنا قولجەتىمدى ەتۋ.