ەل پرەزيدەنتى قاسىم-جومارت توقاەۆ ازيا ويىندارىنىڭ جۇلدەگەرلەرىن قابىلدادى. بۇل تۋرالى اقوردا رەسمي حابارلادى.

اقوردا تاراتقان اقپارات بويىنشا، مەملەكەت باسشىسى سپورتشىلاردى جۇلدەلەرىمەن قۇتتىقتاپ، ريزابەك ايتمۇحاننىڭ ەركىن كۇرەستەن قازاقتان شىققان تۇڭعىش الەم چەمپيونى ەكەنىن ايتتى.

ەستەرىڭىزدە بولسا، قازاقستان ۇلتتىق قۇراماسى ازيادا ويىندارىندا ەل قۇراماسى 10 التىن، 22 كۇمىس، 48 قولا مەدال يەلەنگەن ەدى. اتلەتتەرىمىز نىسانا كوزدەۋ، ەسكەك ەسۋ، ۆەلوجارىس، دجيۋ-دجيتسۋ سپورتىنان ۇزدىك شىقتى. قاسىم-جومارت كەمەلۇلى كاراتەدەن جالپى كوماندالىق ەسەپتە ءبىرىنشى ورىن العان قازاقستان قۇراماسىن ەرەكشە اتاپ ءوتىپ، وسى سپورت تۇرىنەن ازياداعا قاتىسقان 8 سپورتشىنىڭ ءبارى جەڭىس تۇعىرىنا كوتەرىلگەنىنە نازار اۋداردى.

سونىمەن قاتار، پرەزيدەنت سپورتشىلارىمىزدىڭ جەڭىسكە جەتۋىنە باپكەرلەر جانە باسقا دا ماماندار ايرىقشا ۇلەس قوسقانىنا توقتالدى. وسى ورايدا مەملەكەت باسشىسى سپورتتا جەڭىس پەن جەڭىلىس قاتار جۇرەتىنىن اتاپ ءوتتى.

«قاجىرلى ەڭبەك پەن جەڭىسكە دەگەن مۇقالماس ەرىك-جىگەردىڭ ارقاسىندا ارقايسىڭىز جوعارى ناتيجەگە قول جەتكىزدىڭىزدەر. الايدا ەلىمىزدىڭ جالپى كورسەتكىشى وتكەن وليمپيادا مەن ازيادا ويىندارىنان دا وتە جاقسى بولۋى مۇمكىن ەدى. مۇنى اشىق ايتۋىمىز كەرەك. بوكس، اۋىر اتلەتيكا، ەركىن جانە گرەك-ريم كۇرەسى ءداستۇرلى تۇردە ەل قۇراماسىنىڭ قورجىنىنا جۇلدە سالىپ، ايتارلىقتاي ۇلەس قوساتىن. جەڭىل اتلەتيكا، سپورتتىڭ كوماندالىق تۇرلەرى جانكۇيەرلەرىمىزدى كوبىرەك قۋانىشقا بولەيتىن. بارلىق سپورت ءتۇرى بويىنشا كەتكەن قاتەلىكتەردى تۇزەتۋ ءۇشىن اۋقىمدى جۇمىس اتقارۋ قاجەت»، – دەدى ول.

قاسىم-جومارت توقاەۆ سپورت سالاسى ءاردايىم مەملەكەتتىڭ نازارىندا بولاتىنىن ايتتى. جىل سايىن سپورتتى دامىتۋ ءۇشىن قوماقتى قارجى بولىنەدى. الايدا، پرەزيدەنتتىڭ پىكىرىنشە، ەلىمىزدىڭ كاسىبي سپورتتاعى كورسەتكىشتەرى اسا جوعارى دەڭگەيدە ەمەس.

«اشىعىن ايتۋىمىز كەرەك، ناتيجەمىز مەملەكەتتەن ءبولىنىپ جاتقان قاراجاتتىڭ بارىنشا ءتيىمدى جۇمسالمايتىنىن كورسەتەدى. مۇنداي جاعدايعا جول بەرۋگە بولمايدى. سپورت سالاسىنا تۇبەگەيلى وزگەرىستەر، ياعني رەفورما قاجەت. ءتيىستى مينيسترلىك وسى ماسەلەنى جان-جاقتى قاراپ، سپورتتى دامىتۋدىڭ مۇلدە جاڭا جولدارىن ۇسىنۋى كەرەك»، – دەدى مەملەكەت باسشىسى.

Abai.kz