ءماجىلىستىڭ جالپى وتىرىسىندا دەپۋتات نارتاي سارسەنعاليەۆ قازاقستاندا اجىراسقان ءار ون وتباسىنىڭ جەتەۋىندە جانجال لۋدومانيا سالدارىنان بولاتىنىن، قۇمار ويىندارعا جارناما جاسالىپ جاتقانىن ايتتى، دەپ حابارلادى Halyq Uni.

قازىر ەلىمىزدە 350 مىڭنان اسا ادام قۇمار ويىننىڭ «ينەسىنە» وتىرعان.

«2019 جىلمەن سالىستىرعاندا، بىلتىر قۇمار ويىندارعا ءباس تىگۋ ەلىمىزدە 40 ەسە كوبەيگەن. بۋكمەكەر كەڭسەلەرىنىڭ ءبىر جىلدىق قارجى اينالىمى 1 ترلن تەڭگە بولعان. لۋدومانيا دەرتىنە شالدىققان 174 مىڭ جاس قازاقستاندىق 36 ملرد تەڭگەگە ءباس تىككەن.

بۇگىندە قۇمار ويىننىڭ شىرماۋىنا تۇسكەندەر شەتىنەن قىلمىسكەر بولىپ جاتىر. بىلتىر 157 مىڭنان اسا قىلمىس جاسالسا، سونىڭ 20 پايىزى قۇمار ويىنعا قۇننىققانداردىڭ موينىندا.

سۋيتسيد جاساعان 3 676 وتانداسىمىزدىڭ ءار بەسىنشىسى لۋدومانيا دەرتىنە شالدىققان دەگەن دەرەك بار. بۇل لۋدومانيا ءبىر ادامنىڭ تاعدىرىن ەمەس، تۇتاس وتباسىلاردى بۇلدىرەدى. ەلىمىزدە اجىراسقان ءار 10 وتباسىنىڭ جەتەۋىندە جانجال لۋدومانيا سالدارىنان شىققان. بىز وسىمەن قالاي كۇرەسەمىز؟ ەلىمىزدە قوعامدىق كولىكتەردىڭ سىرتىن، تۇرعىن ۇيلەردىڭ قاسبەتىن تۇگەلدەي قۇمار ويىنداردىڭ جارناماسىنا بەردىك، - دەدى نارتاي سارسەنعاليەۆ.

ول ۇلتتىق سپورت الاڭدارى، كوكپار مەن بايگەنىڭ بارلىعى توتاليزاتوردىڭ ورنىنا اينالعانىن جەتكىزدى.

«ۇلتىمىزدى ساقتايمىز دەپ جۇرگەندە، ۇلتتىق سپورتىمىزدى قۇمار ويىننىڭ الاڭىنا اينالدىرۋ كىمگە كەرەك بولعانىن سۇراعىم كەلەدى. ۇلتىمىزدى، جۇرتىمىزدى قۇرتىپ جاتقان قۇمار ويىنداردى تۇگەل توقتاتاتىن كەز كەلدى عوي؟!» - دەدى دەپۋتات.

سۇراققا پرەمەر-ءمينيستردىڭ ورىنباسارى تامارا دۇيسەنوۆا جاۋاپ بەردى.

«بۇل – وتە وزەكتى ماسەلە. ويىن بيزنەسى تۋرالى زاڭ 2007 جىلى قابىلدانعان. ونداعى نورمالار قازىرگى وزگەرىستەرگە جاۋاپ بەرە المايدى. ماسەلەن، جارناماعا قارسى، بالالاردىڭ ويىنىنا ەشقانداي شەكتەۋ جوق. سوندىقتان پارلامەنت دەپۋتاتتارىنىڭ باستاماسىمەن ەنگىزىلىپ جاتقان تۇزەتۋلەردىڭ بارلىعىن قۇزىرەتتى ورگاندارمەن بىرگە قاراپ شىقتىم.

بيزنەسكە ءتيىستى شەكتەۋ سالاتىن 16 ۇسىنىستى ۇلتتىق ەكونوميكا مينيسترلىگىمەن پىسىقتاپ جاتىرمىز. بۇل تۇرعىدا 8 شەكتەۋ بويىنشا جۇمىستار اياقتالۋعا جاقىن. قالعان 8-ءى كەلەر ايدا قارالىپ بولادى. وسىنىڭ ءبارىن جيناقتاپ، پارلامەنتكە كەلەمىز.

نەگىزگى ماسەلە نەدە؟ قازىر شەتەل تاجىريبەسىن زەرتتەپ شىقتىق. جالپى، ويىن ءتارتىبى بار ەكەن. وعان سايكەس ويىننىڭ ۋاقىتىنا، ستاۆكا دەڭگەيىنە قاتىستى ءليميتى بولۋى كەرەك. سوندىقتان بۇل باعىتتا ءتيىستى شەكتەۋلەردى قويىپ جاتىرمىز»، - دەدى ول.

تامارا دۇيسەنوۆا قۇمار ويىننىڭ جارناماسىنا تىيىم سالىنۋى مۇمكىن ەكەنىن دە اتاپ ءوتتى.

«شەتەل تاجىريبەسىنە قاراساق، بىردە-ءبىر سىرتقى جارنامادا قۇمار ويىندارىن كورسەتپەۋى كەرەك. سوندىقتان جارناماعا شەكتەۋ جونىندە ءتيىستى نورمانى بەلگىلەدىك. ەندى تەك بۋكمەكەرلىك كەڭسەنىڭ ىشىندە، سونداي-اق سپورت تەلەارنالارىندا جارناما جاساۋعا بولادى دەگەن ۇسىنىستى قاراستىرىپ وتىرمىز. سونداي-اق ولاردىڭ جۇمىسىندا كولەڭكەلى جاعداي بار. ءاربىر توتاليزاتور قارجى مينيسترلىگىنە ينتەگراتسيالانۋى كەرەك. وسىلايشا، قانشا ادام (قۇمار ويىنىن) ويناپ جاتىر، قانشا قارجى ءتۇستى، قانشا سالىق تۇسۋىنە قاتىستى تۇزەتۋلەردى جاسادىق. ارينە، بيزنەسپەن كەلىسۋ قيىنداۋ بولدى. 4-5 اي بيزنەستىڭ وزىمەن ايتىستىق. قازىر ۇلتتىق ەكونوميكا مينيسترلىگى ءبىزدى قولداپ وتىر»، - دەدى ۇكىمەت باسشىسىنىڭ ورىنباسارى.

Abai.kz