قازاقستان وقۋشىلارى روبوتوتەحنيكا جارىسىندا چەمپيون اتاندى
قازاقستاندىق وقۋشىلار سينگاپۋردا وتكەن FIRST Global Challenge روبوتوتەحنيكادان ەڭ ءىرى چەمپيوناتتا رەكوردتىق ناتيجەلەرگە قول جەتكىزدى. وسى جەڭىسى ارقىلى ۇلتتىق قۇراما وتكەن جىلى جەنەۆادا العان چەمپيوندىق اتاعىن تاعى ءبىر مارتە راستادى.
قازاقستان قۇراما كومانداسىندا الماتى قالاسىنداعى فمب نزم ستۋدەنتتەرى نۇريسلام تۇرعىنباي، نۇرسۇلتان جانزاقوۆ، سەرگەي گاپونوۆ، دامەلى شايمەردەنوۆا جانە ءيمانالى كوكسال بولدى. ۇلتتىق قۇرامانىڭ باپكەرلەرى - بەكزات ىڭكاروۆ پەن نۇرداۋلەت دوسماعامبەت.
«ءبىز سينگاپۋرعا قازاقستاننىڭ تۇكپىر-تۇكپىرىنەن 200 وقۋشىنىڭ ىشىنەن ۇلتتىق كەزەڭدە ىرىكتەلگەن مىقتى كوماندانى الىپ كەلدىك. ءبىزدىڭ كوماندانىڭ الدىندا وتكەن جىلعى جەنەۆاداعى تاريحي جەڭىستى قايتالاۋ مىندەتى تۇردى جانە ولار مۇنى ويداعىداي ورىندادى، ۇپاي سانى بويىنشا الەمدىك رەكورد ورناتتى. بۇدان باسقا، كوماندامىز حالىقارالىق ىنتىماقتاستىق ءۇشىن تورەشىلەردىڭ ماراپاتتارىنا يە بولدى، بۇل ءبىز ءۇشىن ۇلكەن ماقتانىش. قازاقستانداعى روبوتوتەحنيكا جىل سايىن حالىقارالىق برەندكە اينالىپ كەلەدى»، - دەپ ءبولىستى USTEM Foundation قوعامدىق قورىنىڭ جەتەكشىسى اسىلبەك مىرزاحمەتوۆ.
FIRST Global Challenge – جىل سايىن ءارتۇرلى ەلدەردە وتەتىن وليمپيادالىق ۇلگىدەگى جاھاندىق روبوتوتەحنيكا چەمپيوناتى. وسى جىلعى چەمپيوناتقا الەمنىڭ تۇكپىر-تۇكپىرىنەن 190-نان استام ەل قاتىستى.
ەسكە سالايىق، ۇلتتىق قۇراما روبوتوتەحنيكا وليمپياداسىنىڭ ىرىكتەۋ كەزەڭدەرى شەڭبەرىندە قر وقۋ-اعارتۋ مينيسترلىگىنىڭ قولداۋىمەن جاساقتالدى.
فوتو: عالامتوردان
Abai.kz
