ادۆوكات جالعاس ساپارحانوۆا ازاپتاۋ ءىسى بويىنشا ەڭ اۋقىمدى جانە ەلىمىزدە رەزونانس تۋدىرعان باتىر ازامات باتىرباەۆتىڭ ارىزى بويىنشا ازاپتاۋ ءىسى سوتقا جەتكەنىن الەۋمەتتىك جەلىدە جازدى. ول ازاپتاۋ ىستەرى دەگەندە ەڭ ءبىرىنشى ەسكە ءوز قورعاۋىنداعى تالدىقورعاندىق قاڭتارشى ازامات باتىرباەۆتىڭ ەسكە بىردەن تۇسەتىنىن جازادى.

– ەرتەڭ تالدىقورعان قالالىق سوتىندا ازەكەڭنىڭ ارىزى نەگىزىندە قوزعالعان، تەرگەلگەن ازاپتاۋ ءىسى بويىنشا سوت باستالادى. قاڭتار قىرعىنى كەزىندە ەڭ ءبىرىنشى بولىپ ازاپتاۋدى اشىق جەتكىزگەن - ازامات باتىرباەۆ بولدى. ازاپتاعان ءاربىر قىزمەتكەرلەر ءوز جازاسىن زاڭ بويىنشا الۋ كەرەك! قاتاڭ جازالانۋى ءتيىس، – دەيدى ول.

ەسكە سالا كەتەيىك، قاڭتار وقيعاسىنان كەيىن تالدىقورعاندا تەرگەۋشىلەر دەنەسىنە ىستىق ۇتىك باسىپ، ازاپتاپ-قيناعان ازامات باتىرباەۆتىڭ سۋرەتتەرى الەۋمەتتىك جەلىدە تاراپ، قوعامدا رەزونانس تۋدىرعان ەدى. ازامات قۇقىق قورعاۋ قىزمەتكەرلەرىنىڭ ۇستىنەن بىرنەشە رەت شاعىم تۇسىرگەن. الايدا وسى كۇنگە دەيىن ءىس سوتقا جەتپەگەن. وسى ۋاقىت ىشىندە بيلىك ازامات باتىرباەۆقا قاڭتاردا "جاپپاي تارتىپسىزدىككە قاتىستى" دەگەن ايىپ تاعىپ، جاۋاپقا تارتقان. باتىرباەۆ "كىناسىن مويىنداپ", تەرگەۋمەن پروتسەستىك كەلىسىمگە كەلگەن سوڭ، تالدىقورعان قالاسىنىڭ سوتى وعان 4,5 جىل شارتتى جازا كەسىپ، قاماۋدان بوساتقان.

Abai.kz