ءماجىلىس دەپۋتاتى ەرمۇرات باپي زاڭسىز شىعارىلعان اكتيۆتەردى قايتارۋ جونىندەگى ورگانداردىڭ جۇمىسىن سىنعا الدى، دەپ حابارلايدى Ulysmedia.kz.

“زاڭسىز شىعارىلعان اكتيۆتەردى قايتارۋ جونىندەگى كوميسسيا مۇشەلەرىنىڭ ءتىزىمىن كورسەتپەيمىز، ويتكەنى ولارعا سىرتتان قىسىم بولادى دەگەن – بىلجىراق ءسوز، بۇعان بەسىكتەگى ءسابي دە سەنبەيدى. بۇل – حالىقتى الدارقاتۋ، ويتكەنى كوميسسيا قۇرامىندا ازاماتتىق قوعام وكىلدەرى جوق. كوميسسيا كىمدەردى تەكسەرۋ كەرەك، كىمدەردىڭ اقشاسىن مەملەكەتكە قايتارۋ كەرەك – سونىڭ ءتىزىمىن جاسايتىن ادامدار ەمەس پە؟ ول دەرەكتەر كوميتەتكە بەرىلەدى، كوميتەت ءارى قاراي سول جۇمىستى جۇزەگە اسىرۋى كەرەك. ال ەندى كوميسسيا قۇرامىندا ازاماتتىق قوعام وكىلدەرى بولماسا، حالىق ونىڭ سوزىنە قالاي سەنەدى؟”، – دەدى دەپۋتات.

ەرمۇرات ءباپي قابىلدانعان زاڭنىڭ ارتى سيىرقۇيىمشاقتانىپ كەتتى دەپ ەسەپتەيدى.

“بيلىك تاراپىنان زاڭسىز شىعارىلعان اكتيۆتەردى قايتارۋعا مۇددەلىلىك سۇيىلىپ كەتتى. مۇنىڭ سەبەبى – مۇددەلى ورگاندار اراسىندا تالاس-تارتىس بولدى دەپ ويلايمىن، اركىم كورپەنى وزىنە قاراي تارتقان بولى كەرەك. ەكىنشىدەن، ەڭ باستى سەبەپ – ەسكى قازاقستاننىڭ قىسىمى. ەلدەن ميللياردتاردى اكەتكەن وليگارحتاردىڭ كوكەلەرى وتىر وسىندا، سولاردىڭ قىسىمىنىڭ سالدارىنان اركىمگە ءبىر جالتاقتاعان وكىلەتتى ورگاندار تولىققاندى جۇمىس ىستەي الماي وتىر. ءاۋ باستا پرەزيدەنت جارلىعى بويىنشا اكتيۆتەردى قايتار جونىندەگى كوميتەت قۇرامىندا 130 ادام بولادى دەلىنگەن، قازىر مەنىڭ قولىما تۇسكەن اقپارات بويىنشا، ونىڭ قۇرامىندا 40-اق ادام بار. بۇل  بىر اۋدان اكىمدىگىنىڭ شتاتىنان اسپايتىن دۇنيە. دۇنيە جۇزىنە اعىلعان، وففشورلارعا تىعىلعان اكتيۆتەردى جيناۋعا 40 ادامنىڭ قاۋقارى جەتە مە؟”، – دەيدى دەپۋتات.

ماجىلىسمەننىڭ پىكىرىنشە، تالان-تاراجعا تۇسكەن اكتيۆتەردى قايتارۋ – مەملەكەتتىك دارەجەدە جۇرگىزىلۋى ءتيىس، ءبىر جىل ەمەس، بىرنەشە جىلعا سوزىلۋى ءتيىس ناۋقان بولۋى كەرەك.

بۇدان بۇرىن  ەرمۇرات ءباپي ءدال شەتەلگە زاڭسىز شىعارىلعان اكتيۆتەردى قايتارۋ جونىندەگى زاڭ جوباسىنىڭ تاقىرىبى مىندەتىنە ساي ەمەس ەكەنىن مالىمدەگەن.

ايتا كەتەيىك، جۋىردا قازاقستاندا اكتيۆتەردى قايتارۋ جونىندەگى كوميتەت قۇرىلدى. كوميتەتتىڭ فۋنكتسيالارىنا اكتيۆتەر تۋرالى اقپاراتتى مونيتورينگىلەۋ جانە تالداۋ، اكتيۆتەردىڭ شىعۋ كوزدەرىنىڭ زاڭدىلىعىن تەكسەرۋ، كوميسسيانىڭ شەشىمى بويىنشا ارنايى تىزىلىمگە ەنگىزىلگەن ادامداردان اكتيۆتەردى اشىپ كورسەتۋ تۋرالى دەكلاراتسيالاردى قابىلداۋ جانە قاراۋ كىرەدى.

سونداي-اق، قايتارىلعان اكتيۆتەردى باسقاراتىن كومپانيا قۇرىلدى.باسقارۋشى كومپانيانىڭ مىندەتتەرى – مەملەكەتكە قايتارىلعان اكتيۆتەردى ونىڭ اتىنان مەنشىگىنە قابىلداۋ، مەملەكەت كىرىسىنە اينالدىرىلعان اكتيۆتەردىڭ ساقتالۋىن جانە ۇستالۋىن قامتاماسىز ەتۋ، اكتيۆتەرگە بيلىك ەتۋ، اكتيۆتەردى وتكىزۋدەن تۇسكەن قاراجاتتى ارناۋلى مەملەكەتتىك قورعا اۋدارۋ.

قارجىلىق مونيتورينگ اگەنتتىگىنىڭ ەسەبىنشە، جىل باسىنان بەرى مەملەكەتكە جالپى سوماسى 217 ميلليارد تەڭگە بولاتىن اكتيۆتەر قايتارىلدى.

فوتو: عالامتوردان

Abai.kz