قازىرگى تاڭدا ەلىمىزدە 25 مىڭنان استام كىتاپحاناشى، 11 مىڭعا جۋىق كىتاپحانا، 328 ميلليوننان استام كىتاپ قورى بار. بۇل ەلىمىز ءۇشىن باعا جەتپەس رۋحاني بايلىق. بۇل تۋرالى اقپارات جانە قوعامدىق دامۋ ءمينيسترى ايدا بالاەۆا كىتاپحاناشىلاردى مەرەكەسىمەن قۇتتىقتاۋ كەزىندە ايتتى.

«ۇكىمەت قاۋلىسىمەن بەكىتىلگەن بۇگىنگى داتا كەزدەيسوق ەمەس. ەلىمىزدەگى ەڭ العاشقى كىتاپحانا باتىس قازاقستان وبلىسىندا وسىدان 152 جىل بۇرىن 24 قازان كۇنى ەسىگىن اشقان. بۇگىندە جۇبان مولداعاليەۆ اتىنداعى امبەباپ عىلىمي كىتاپحانا وڭىردەگى 360 كىتاپحانانىڭ ادىستەمەلىك ورتالىعى سانالادى.

جالپى قازاقستان بويىنشا ەڭ ۇلكەن كىتاپحانا – الماتى قالاسىنداعى ۇلتتىق كىتاپحانا. مۇندا قازىر 7 ميلليوننان استام كىتاپ قورى بار.

سوڭعى كەزدە كىتاپ وقۋ ترەندى قايتا جاڭعىرىپ، وقىرماندار سانى 9,5 ميلليونعا جەتتى. اسىرەسە، اتا-انالار بالا تاربيەلەۋدە كىتاپتىڭ كومەگىنە كوبىرەك جۇگىنەدى. بۇلدىرشىندەردى وسى كۇندەرى فانتاستيكا جانە كوميكس جانرى ەرەكشە قىزىقتىرادى. بۇل رەتتە وتاندىق باسپاحانالارعا ايتارىم، بالالار كىتاپحاناسىن دامىتۋعا بەت بۇرۋ كەرەك. بۇل نارىقتىڭ سۇرانىسى.

ودان باسقا، كەيىنگى 5 جىلدا كىتاپحانالار قورى تەك مەملەكەتتىك تاپسىرىسپەن شىققان 4,5 ميلليوننان استام كىتاپپەن تولىقتىرىلدى. بۇل باعىتتا جۇمىستار جالعاسادى»،-دەدى مينيستر.

بالاەۆانىڭ حابارلاۋىنشا، قازىرگى ۋاقىتتا زامانعا ساي ەلەكتروندىق كىتاپحانانى دامىتۋ جۇمىسى قارقىن الدى. الداعى ۋاقىتتا ەلىمىزدىڭ بارلىق كىتاپحانالارى ءبىرتۇتاس اقپاراتتىق جۇيەگە قوسىلاتىن بولادى. وقىرماندار ەلىمىزدىڭ كەز-كەلگەن كىتاپحاناسىنان قاجەتتى كىتاپتى «بىرىڭعاي بيلەت» ارقىلى وقي الادى.

Abai.kz