الەمگە ەسىمى تانىمال ءانشى ديماش قۇدايبەرگەن «قازاقستاننىڭ حالىق ءارتىسى» اتاعى الۋىنا قاتىستى پىكىر ءبىلدىردى.

«پرەزيدەنتىمىز اۋەدە ۇشىپ كەلە جاتقان كەزدە ماعان وسىنداي تاماشا جاڭالىقتى جەتكىزگەن بولاتىن. ەڭ باستىسى – حالىقتىڭ ىقىلاسى، حالىقتىڭ پەيىلى. ول ەشقانداي ماراپاتپەن ولشەنبەيدى دەپ ويلايمىن. سول سەبەپتى بۇل اتاققا لايىقپىن با، لايىق ەمەسپىن بە، ونى كوزىقاراقتى حالىق شەشەدى. مەنىڭ ءاربىر اياق الىسىم، ءاربىر جەتكەن جەتىستىگىم، ءاربىر ماراپاتقا يە بولعان ءساتىم كوزىقاراقتى حالىقتىڭ شەشىمىمەن بولۋى كەرەك. وسى ۋاقىتقا دەيىن مەنى قولداپ كەلە جاتقان تىڭدارمان قاۋىمعا باسىمدى ءيىپ، راحمەتىمدى ايتقىم كەلەدى. ەل امان، جۇرت تىنىش بولعاي! الەمدە بەيبىتشىلىك بولسىن! وسكەلەڭ ۇرپاق قازاقتىڭ مارتەبەسىن بۇكىل الەم الدىندا رۋحاني تۇرعىدا كورەتەتىندەي دەڭگەيگە كوتەرىلە بەرسىن!»، - دەدى ديماش قۇدايبەرگەن اقورداداعى ماراپاتتاۋ راسىمىنەن كەيىن باق وكىلدەرىنە بەرگەن سۇحباتىندا.

ايتا كەتەرلىگى، مەملەكەت باسشىسى قاسىم-جومارت توقاەۆ «قازاقستاننىڭ حالىق ءارتىسى» اتاعىن ديماشتان بولەك اتاقتى ءانشى رامازان ستامعازيەۆ پەن كۇيشى ايگۇل ۇلكەنباەۆاعا بەرگەن ەدى.

Abai.kz