استانانىڭ قىلمىستىق ىستەر جونىندەگى اۋدانارالىق سوتى كاسىپكەر قايرات بورانباەۆتىڭ نەمەرە ءىنىسى ءابىلحان بورانباەۆقا ۇكىم شىعاردى، دەپ حابارلايدى Ulysmedia.kz.

وعان قىلمىستىق كودەكستىڭ 367-بابىنىڭ 2-بولىگى (پارا بەرۋ) بويىنشا ايىپ تاعىلعان.

سوتتا انىقتالعانداي، بورانباەۆ اعا جەدەل ۋاكىلى داۋرەن قازبەك پەن ش.-عا (تەرگەۋ كەزىندە قايتىس بولۋىنا بايلانىستى ءىس توقتاتىلدى) جالپى سوماسى 1,6 ملن تەڭگەدەن استام پارا بەرگەن.

قازبەك جانە ش. ادامدار توبىندا الدىن الا ءسوز بايلاسۋ ارقىلى پارا الىپ، قاماۋعا الىنعان بورانباەۆقا ءموبيلدى بايلانىس، كەزدەسۋلەر، تۋعان كۇنىن الكوگولدى ىشىمدىكتەردى قولدانۋ ارقىلى تويلاۋ ءۇشىن باسقا ادامدارمەن بايلانىسقا تۇسۋىنە زاڭسىز مۇمكىندىك بەرگەن.

مەملەكەتتىك ايىپتاۋشى بورانباەۆتى 4 جىل 6 اي مەرزىمگە، ال سوتتالۋشىعا قازبەكتى 7 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى. قورعاۋشى تاراپ ەكى سوتتالۋشىعا ايىپپۇل تۇرىندە جازا تاعايىنداۋدى سۇرادى.

سوت ءابىلحان بورانباەۆتىڭ 4 جاستاعى بالاسىنىڭ بولۋىن، كىناسىن مويىنداۋىن، وكىنۋىن، قىلمىستىق قۇقىق بۇزۋشىلىقتى اشۋعا جانە قىلمىستىق قۇقىق بۇزۋشىلىقتىڭ باسقا دا قاتىسۋشىلارىن اشكەرەلەۋگە بەلسەندى ىقپال ەتكەنىن، ال داۋرەن قازبەكتىڭ 3 جاستاعى بالاسىنىڭ بولۋىن، كىناسىن مويىنداۋىن جانە وكىنۋىن قىلمىستىق جاۋاپتىلىق پەن جازانى جەڭىلدەتەتىن ءمان-جايلار رەتىندە تانىدى، - دەلىنگەن سوت حابارلاماسىندا.

سوت ۇكىمىمەن ءابىلحان بورانباەۆ مەملەكەتتىك قىزمەتتە جانە كۆازيمەملەكەتتىك سەكتوردا لاۋازىمداردى اتقارۋ قۇقىعىنان ءومىر بويىنا ايىرىلىپ، 4 جىل 6 ايعا باس بوستاندىعىنان ايىرىلدى.

داۋرەن قازبەك مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋ قۇقىعىنان ءومىر بويىنا ايىرىلىپ، 7 جىلعا سوتتالدى.

ۇكىم زاڭدى كۇشىنە ەنگەن جوق.

ەسكە سالايىق، جۋىردا بەلگىلى كاسىپكەر قايرات بورانباەۆ ءىسى بويىنشا اپەللياتسيالىق سوت ۇكىمى شىقتى. سوت كاسىپكەردىڭ جازاسىن جەڭىلدەتتى. ول 6 جىلعا باس بوستاندىعىنان ايىرىلدى.

بورانباەۆتان مەملەكەت كىرىسىنە:

الماتىداعى ءال-فارابي داڭعىلىنداعى كوممەرتسيالىق ءۇي-جاي جانە 686 ملن تەڭگەنىڭ جەر ۋچاسكەسى;

بانك شوتىنداعى 1 ملرد 270 ملن 190 مىڭ تەڭگە مولشەرىندەگى اقشالاي قاراجات;

حالىق بانكىندەگى ءتۇرلى شوتتارداعى 5 ملن 685 مىڭ 727 دوللار، 1 ملن 170 مىڭ 329 دوللار، 755 ملن 859 مىڭ 601 تەڭگە، 193 ملن 170 مىڭ 137 تەڭگە مولشەرىندەگى اقشالاي قاراجات تاركىلەندى.

سونداي-اق، قايرات بورانباەۆ مەملەكەتكە قۇنى 1,4 ملرد تەڭگەدەن اساتىن قوناقۇيدى تاپسىردى، ءبىلىم بەرۋ ينفراقۇرىلىمىن قولداۋ قورىنا 30 ملرد تەڭگەدەن استام قارجى اۋداردى جانە ءوزىنىڭ مەنشىگىندەگى ساۋدا ورتالىعى مەن فيتنەس جەلىسىن مەملەكەت مەنشىگىنە وتكىزدى.

بۇدان بولەك، كاسىپكەردىڭ جالپى قۇنى 58 ملرد تەڭگە بولاتىن كەن ورنى، زاۋىتى پەن كومپانياسى مەملەكەتكە ءوتتى.

20 قاراشادا بورانباەۆتىڭ تۇرمەدەگى جازاسى باس بوستاندىعىن شەكتەۋگە الماستىرىلعانى بەلگىلى بولدى. سوتتالۋشى پروباتسيالىق باقىلاۋدا بولادى.

Abai.kz