2023 جىلعى 1 قازانداعى جاعداي بويىنشا جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 14 534 شەتەل ازاماتى ەڭبەك ەتەدى، دەپ حابارلايدى Ulysmedia.kz.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، شەتەل جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 515 رۇقسات ء(بىرىنشى سانات), قۇرىلىمدىق بولىمشەلەردىڭ باسشىلارى ءۇشىن 2 717 رۇقسات (ەكىنشى سانات). تارتىلعان شجك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە ولار 6 332 جانە 680 ادام. سونداي-اق ماۋسىمدىق جۇمىستارعا 1 897 ادام، ال كورپوراتيۆتىك اۋىستىرۋ اياسىندا 2 393 ادام تارتىلدى.

قازىرگى ۋاقىتتا قازاقستاندا شەتەلدىك جۇمىس كۇشىن پايدالاناتىن 1 529 جۇمىس بەرۋشى بار. ولاردا 471,7 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ 96,9% - ى.

ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر قۇرىلىس سالاسىندا – 4 887  ادام (34,5%), اۋىل، ورمان جانە بالىق شارۋاشىلىعى – 1 637 ادام (11,5%), تاۋ-كەن ونەركاسىبى جانە كارەرلەردى قازۋ – 1 360 ادام (9,6%), وڭدەۋ ونەركاسىبى – 1 219 ادام (8,3%), كاسىبي، عىلىمي جانە تەحنيكالىق قىزمەت – 896 ادام (6,3%).

ەڭبەك ميگرانتتارى كەلەتىن نەگىزگى ەلدەر: قىتاي – 3 944 ادام (27,8%), وزبەكستان – 1 714 ادام (12,1%), ءۇندىستان – 1 326 ادام (9,3%), تۇركيا – 1 288 ادام (9,1%).

“ىشكى ەڭبەك نارىعىن قورعاۋ ماقساتىندا قر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. 2023 جىلى جالپى كۆوتا رەسپۋبليكاداعى جۇمىس كۇشىنىڭ سانىنا قاتىستى 0,24% نەمەسە 22 260 بىرلىك مولشەرىندە بەلگىلەندى”، – دەلىنگەن حابارلامادا.

ايتا كەتەيىك، بۇدان بۇرىن وڭتۇستىك كورەيادا 20 مىڭعا جۋىق قازاقستاندىق زاڭسىز ەڭبەك ەتىپ جۇرگەنى حابارلانعان.  دەپۋتات نارتاي سارسەنعاليەۆ ەڭبەك مينيسترلىگى ەكى ەل اراسىندا ورتاق كەلىسىم جاسالعانشا وڭتۇستىك كورەيادا زاڭسىز ەڭبەك ميگرانتى بوپ جۇرگەن وتانداستارىمىزدىڭ قۇقىعىن قورعايتىن زاڭدىق تەتىكتى تابۋى كەرەگىن ايتتى.

Abai.kz