قوستانايدا Kia اۆتوموبيلدەرى ءوندىرىسىنىڭ تولىق تسيكلىن قامتيتىن زاۋىتتىڭ قۇرىلىسى باستالدى
![](https://abai.kz/content/uploads/2023/11/dop-kia-3.jpg)
قوستانايدا Kia اۆتوموبيلدەرى ءوندىرىسىنىڭ تولىق تسيكلىن قامتيتىن زاۋىتتىڭ قۇرىلىسى باستالدى. قۇرىلىس جۇمىستارىن رەسمي باستاۋ راسىمىنە قر پرەمەر-ءمينيسترىنىڭ ءبىرىنشى ورىنباسارى رومان سكليار جانە قوستاناي وبلىسىنىڭ اكىمى قۇمار اقساقالوۆ قاتىستى.
وسىنداي ءىرى ونەركاسىپ نىسانىنىڭ قۇرىلىسى مەملەكەت باسشىسى قاسىم-جومارت توقاەۆتىڭ وڭتۇستىك كورەيا كومپانياسىنىڭ باسشىلىعىمەن ۋاعدالاستىقتارى ناتيجەسىندە باستالىپ وتىر. ەسكە سالا كەتەيىك، وسى جىلدىڭ قاڭتار ايىندا پرەزيدەنت قوستانايدا Kia اۆتوموبيلدەرىنىڭ شاعىن توراپتىق ءوندىرىسىن ىسكە قوسۋ راسىمىنە قاتىسا وتىرىپ، ونەركاسىپ كووپەراتسياسىن ودان ءارى كەڭەيتۋ جانە ينجەنەرلىك بازانى قالىپتاستىرۋدىڭ ماڭىزىن اتاپ وتكەن بولاتىن.
جوعارى جالاقى تولەنەتىن 1 500 جۇمىس ورنىن قۇرۋعا مۇمكىندىك بەرەتىن جاڭا زاۋىتتىڭ وندىرىستىك قۋاتى جىلىنا 70 مىڭ اۆتوكولىك بولماق. جوباعا شامامەن $250 ملن تىكەلەي شەتەلدىك ينۆەستيتسيالار سالىناتىن بولادى.
رومان سكليار ءوز سوزىندە Kia كومپانياسى العاش رەت كورەيا رەسپۋبليكاسىنان تىس جەردە بىرلەسكەن كاسىپورىن مەن زاۋىت سالۋعا تىكەلەي ينۆەستيتسيا سالىپ وتىرعانىن اتاپ ءوتتى.
«قوستانايدا KIA اۆتوموبيلدەرىن شىعاراتىن تولىق تسيكلدى زاۋىت سالۋدى ماشينا جاساۋ سالاسى ءۇشىن شىن مانىندە سەرپىندى جوعارى تەحنولوگيالىق جوبا دەپ اتاۋعا بولادى. بۇل جوبا ناقتى مۋلتيپليكاتيۆتى اسەر بەرەدى، ينجەنەرلىك جانە تەحنيكالىق كادرلاردىڭ جاڭا بۋىنىن دايارلاۋ دەڭگەيىن ارتتىرۋعا، سونداي-اق لوكاليزاتسيالاۋدىڭ كەلەسى كەزەڭىنە كوشۋدى ايتارلىقتاي جەدەلدەتۋگە مۇمكىندىك بەرەدى»، — دەدى رومان سكليار.
پرەمەر-ءمينيستردىڭ ءبىرىنشى ورىنباسارىنىڭ ايتۋىنشا، وسىنداي نەگىزگى ينۆەستورى بار زاۋىتتىڭ پايدا بولۋى وتاندىق ونەركاسىپتى دامىتۋدىڭ ماڭىزدى كەزەڭى، ەكونوميكانىڭ بارلىق سالالارىندا وڭتۇستىك كورەيامەن بولاشاق بىرلەسكەن ينۆەستيتسيالىق جوبالار ءۇشىن ايقىن ۇلگى بولادى.
قۇرىلىس جۇمىستارى 2024 جىلى اياقتالادى دەپ كۇتىلۋدە، سودان كەيىن جابدىقتار ورناتىلا باستايدى. 2025 جىلدىڭ ءبىرىنشى توقسانىندا زاۋىت پيلوتتىق رەجيمدە ىسكە قوسىلماق، ال ەكىنشى توقسانىندا ءوندىرىستىڭ تولىق تسيكلى اشىلادى.
«بۇگىندە Kia ءۇشىن قازاقستان رەسپۋبليكاسىنىڭ ەكونوميكاسىن دامىتۋعا ۇلەس قوسۋ مۇمكىندىگىنە يە بولۋ – ۇلكەن قۇرمەت پەن ماقتانىش. قوستانايداعى جاڭا زاۋىت ازاماتتار، ۋنيۆەرسيتەت تۇلەكتەرى مەن ينجەنەرلەرگە جوعارى دەڭگەيدەگى تاجىريبە جيناۋعا مۇمكىندىك بەرەتىن بىرەگەي جۇمىس ورىندارىن ۇسىنا وتىرىپ، ماڭىزدى ءرول اتقاراتىنىنا سەنىمدىمىن»، — دەدى Kia Corporation پرەزيدەنتى جانە باس ديرەكتورى حو سۋن سون بەينەحابارلاماسىندا.
وڭتۇستىك كورەيا كومپانياسى اۆتوموبيل جاساۋداعى جەرگىلىكتى قامتۋ دەڭگەيىن ارتتىرۋ بويىنشا قازاقستاننىڭ ونەركاسىپتىك ساياساتىنا تولىق قولداۋ كورسەتۋگە دايىن ەكەنىن ءبىلدىردى. Kia قوستانايدا لوكاليزاتسيالاۋ ورتالىعىن اشۋ بويىنشا بەلسەندى تۇردە جۇمىس جۇرگىزىپ جاتىر. مۇندا شاعىن جانە ورتا بيزنەستىڭ قاتىسۋىمەن قۇرامداس بولىكتەر ءوندىرىسى جۇرگىزىلمەك.
وبلىس اكىمى قۇمار اقساقالوۆ وزىق الەمدىك تاجىريبەلەرگە جۇگىنە وتىرىپ، زاماناۋي جوعارى تەحنولوگيالىق كاسىپورىندى ىسكە قوسۋ رەسپۋبليكانىڭ اۆتوموبيل جاساۋداعى ءوندىرىس كولەمىن ۇلعايتۋعا ىقپال ەتەتىنىنە سەنىمدى.
«ماشينا جاساۋ سالاسىن دامىتۋ ءوڭىردىڭ دامۋىنا مۋلتيپليكاتيۆتىك تۇرعىدان اسەر ەتەدى. اتاپ ايتقاندا، ماشينا جاساۋ سالاسىندا ءبىر جۇمىس ورنىن قۇرۋ باسقا سالالاردا بەس-التى جۇمىس ورنىنىڭ قۇرىلۋىنا سەپتىگىن تيگىزەدى. وندىرىستەردى لوكاليزاتسيالاۋ دەڭگەيىن ارتتىرۋ ءۇشىن جاڭا زاۋىتتىڭ اينالاسىندا قۇرامداس بولشەكتەر جەتكىزۋشىلەرى رەتىندە شاعىن جانە ورتا بيزنەس بەلدەۋى قۇرىلادى»، — دەدى قۇمار اقساقالوۆ.
كورەيا رەسپۋبليكاسىنىڭ قازاقستانداعى ەلشىسى تە-يك چجو 30 جىلدان استام ۋاقىت بويى قازاقستان مەن وڭتۇستىك كورەيا ءوزارا ءتيىمدى ارىپتەستىكتى نىعايتىپ كەلە جاتقانىن اتاپ ءوتتى.
«بۇگىندە ەلدەرىمىز قر پرەزيدەنتى قاسىم-جومارت توقاەۆتىڭ قازاقستان حالقىنا جولداۋىندا ايتىلعان ەكونوميكالىق رەفورمالاردىڭ ماقساتتارىنا سايكەس كەلەتىن ەكونوميكالىق ىنتىماقتاستىقتى ءىس جۇزىندە بەلسەندى تۇردە دامىتۋدا. بۇل رەفورمالار وڭدەۋ سالاسىن دامىتۋ ارقىلى رەسپۋبليكا ونەركاسىبىن ارتاراپتاندىرۋعا باعىتتالعان»، — دەدى ول.