مەملەكەت باسشىسى قاسىم-جومارت توقاەۆ قازاقستان حالقىن العىس ايتۋ كۇنىمەن قۇتتىقتادى. 

پرەزيدەنتتىڭ قۇتتىقتاۋى:

قۇرمەتتى وتانداستار!

سىزدەردى العىس ايتۋ كۇنىمەن قۇتتىقتايمىن!

بۇل – بەرەكە-بىرلىگىمىزدى بەكەمدەي تۇسەتىن مەرەكە. وسى كۇنى ەلىمىزدىڭ ازاماتتارى ءبىر-بىرىنە ەرەكشە ءىلتيپات كورسەتىپ، ريزاشىلىعىن بىلدىرەدى. سونداي-اق تاتۋلىق، ىنتىماق، دوستىق سىندى قاستەرلى قۇندىلىقتار جان-جاقتى دارىپتەلەدى. مۇنىڭ ءبارى ۇلتتى ۇيىستىرۋدىڭ ۇتىمدى جولى ەكەنى ءسوزسىز.

حالقىمىزدىڭ ۋاقىت سىنىنان وتكەن جاناشىرلىق، قامقورلىق، مەيىرىمدىلىك سياقتى اسىل قاسيەتتەرى، اسىرەسە قيىن-قىستاۋ كەزدەردە ايقىن كورىنەدى. بۇگىندە مەملەكەتىمىزدە اۋقىمدى وزگەرىستەر بولىپ، ادىلەتتى قازاقستاندى قۇرۋ جولىندا ناقتى قادامدار جاسالىپ جاتىر. وسىنداي سىندارلى ساتتە ەلدىك مۇددەنى بارىنەن بيىك قويىپ، ىرىس-ىنتىماعىمىزدى ساقتاۋ وتە ماڭىزدى.

ءبىز وزىق ويلى ۇلت رەتىندە كوزدەگەن بارلىق بيىك ماقساتتارعا قول جەتكىزەتىنىمىزگە كامىل سەنەمىن. وسى ورايدا تىنىمسىز تەر توگىپ، قازاقستاندى كوركەيتۋگە ءوز ۇلەسىن قوسىپ جۇرگەن ازاماتتارعا العىس ايتامىن.

بارشاڭىزعا باق-بەرەكە جانە مول يگىلىك تىلەيمىن! ەلىمىز امان، جۇرتىمىز تىنىش بولسىن!

قاسىم-جومارت توقاەۆ

Abai.kz