«اق جول» مەديتسينالىق ساقتاندىرۋ تولەمدەرىن 5 ەسە كوتەرۋگە قارسى! بۇگىن ءماجىلىستىڭ جالپى وتىرىسىندا «اق جول» فراكتسياسىنىڭ دەپۋتاتتىق ساۋالىن ەرجان بەيسەنباەۆ جاريالادى. 

 قر دەنساۋلىق ساقتاۋ ءمينيسترى

ا. النازاروۆاعا

پرەزيدەنت قاسىم-جومارت توقاەۆ 1 قىركۇيەكتەگى جولداۋىندا جانە 7 اقپانداعى جاڭا ۇكىمەتتىڭ وتىرىسىندا مىندەتتى مەديتسينالىق ساقتاندىرۋ جۇيەسىنىڭ ءتيىمسىز جۇمىسىن سىنعا الىپ، قولدانىستاعى مەديتسينالىق ساقتاندىرۋ جۇيەسىندە ساقتاندىرۋ مودەلى جوق ەكەنىن اتاپ ءوتتى.

«اق جول» دەمپارتياسىنىڭ فراكتسياسى 2022 جىلعى 13 ساۋىردەگى ساۋالىندا سالىمشىلاردىڭ الەۋمەتتىك مەديتسينالىق ساقتاندىرۋ قورىندا ءوز قاراجاتىن باقىلاي المايتىنى جونىندەگى پروبلەماسىن كوتەردى، قور اتاۋىنداعى "ساقتاندىرۋ" ۇعىمى دا پروفاناتسياعا اينالعان.

سونىمەن قاتار، تابىسى 850 مىڭ تەڭگەدەن اساتىن تۇلعالار ءۇشىن مىندەتتى الەۋمەتتىك مەديتسينالىق ساقتاندىرۋ جارنالارىن بەس ەسەگە ۇلعايتۋ تۋرالى زاڭ جوباسى "اشىق نورماتيۆتىك-قۇقىقتىق اكتىلەر" پورتالىندا ورنالاستىرىلدى.

ولاردىڭ دەرەگى بويىنشا، 2025 جىلدان باستاپ، بۇل – جالدامالى قىزمەتكەرلەردىڭ جالپى سانىنىڭ 9 پايىزىنا، ياعني 502 مىڭ ادامعا، اسەر ەتەدى.

ايتا كەتۋ كەرەك، اتالعان پورتالدا جوبانى ونلاين تالقىلاۋعا ءبىر ساعات قانا ۋاقىت بولىنگەن!

بىراق بۇل رەتتە جۇزدەگەن ازامات بۇعان قارسى پىكىر ءبىلدىردى، ال مىندەتتى الەۋمەتتىك مەديتسينالىق ساقتاندىرۋ بويىنشا اۋدارىمداردى ۇلعايتۋ جونىندەگى باستاما بيزنەس وكىلدەرىنە ۇناماي، ولار دا نارازى ەكەنىن كورسەتتى.

مەديتسينالىق ساقتاندىرۋدىڭ قولدانىستاعى مودەلى ەكونوميكانىڭ بارلىق قاعيداتتارىنا قايشى كەلەدى، ءارى ءار ازاماتتىڭ ءوز دەنساۋلىعى ءۇشىن دەربەس جاۋاپكەرشىلىكتى جانە ەمدەلۋگە دەربەس جيناقتاردى قامتىمايدى. ادام ءوز دەنساۋلىعىنا قالاي قارايتىنىنا قاراماستان تولەۋگە مىندەتتى بولىپ شىعادى. ياعني، جامان ادەتتەرى جوق، سپورتپەن شۇعىلداناتىن جانە اۋدارىمدارىن ەمدەۋگە جۇمسامايتىندار دەنساۋلىعىنا ءمان بەرمەيتىندەر، تەمەكى شەگەتىندەر، ىشەتىندەر جانە ودان ۇنەمى ءدارى-دارمەكتەر مەن دارىگەرلەرگە اقشا جۇمسايتىندارمەن بىردەي تولەۋى كەرەك.

قارتتارعا، مۇگەدەكتەرگە جانە توتەنشە جاعدايلارعا قاتىستى ىنتىماقتى قاعيدات جۇمىس ىستەۋى كەرەك ەكەنى تۇسىنىكتى. بىراق تولىققاندى ادامدار دەنساۋلىعىنا جاۋاپ بەرۋى كەرەك. ال ءاربىر جارنا تولەۋشىنىڭ ءوز جارنالارىن ءوز بەتىنشە بيلىك ەتۋگە قۇقىعى بولۋعا ءتيىس.

ايتپەسە، ولاردىڭ مەديتسينالىق كومەككە جۇگىنبەستەن اي سايىن قورعا تولەيتىن اقشاسى  ءۇشىنشى تۇلعالاردىڭ مەديتسينالىق قىزمەتتەرىن تولەۋگە كەتىپ، قوردىڭ ءوزى ول قارجىنى سالىمشىعا بەلگىسىز كۇيدە جاراتادى.

اقيقاتىندا، بۇل ساقتاندىرۋ ەمەس، سالىقتىڭ قوسىمشا ءتۇرى.

بىراق سالىقتاردى اشىق تۇردە پايدالانۋ كەرەك، ال مىندەتتى الەۋمەتتىك مەديتسينالىق ساقتاندىرۋ قورىنىڭ جۇمىسى –ۇلكەن جۇمباق جانە ءبىر ۇلكەن ءتۇبى جوق «قارا قۇردىم».

مۇنداي جاعدايلاردا الدىڭعى جۇزدەگەن ميللياردتاردىڭ قالاي جانە نەگە جۇمسالعانىن تۇسىنبەي تۇرىپ، قورعا تولەمدەردى بەس ەسە ارتتىرۋ قوعام ءۇشىن تىم قىمبات جانە بيزنەسكە شامادان تىس جۇكتەمە بولىپ تابىلادى.

جوعارىدا ايتىلعاندارعا بايلانىستى مەملەكەت باسشىسىنىڭ مەديتسينالىق ساقتاندىرۋ جۇيەسىن رەفورمالاۋعا قاتىستى تاپسىرمالارىن ىسكە اسىرۋ كەزىندە «اق جول» فراكتسياسى كەلەسى ۇسىنىستارىمىزدى ەسكەرۋدى سۇرايدى:

1. ءمامس تولەمدەرىن ارتتىرۋدان باس تارتۋ

2. مەديتسينالىق ساقتاندىرۋ جۇيەسىن مونوپولياسىزداندىرۋ جانە وسى سالادا نارىقتىق جانە باسەكەلەستىك تەتىكتەردى ەنگىزۋ.

3. ازاماتتاردىڭ ساقتاندىرۋ ۇيىمدارىنداعى شوتتارىن اشىقتىق پەن ەرىكتىلىك نەگىزىندە دەربەستەندىرۋ.

4. ءاربىر ناقتى ازاماتتىڭ دەنساۋلىق جاعدايى مەن ءومىر سالتىنا بايلانىستى ساقتاندىرۋ سىيلىقاقىلارىن تولەۋ سومالارىن ايقىنداۋ ادىستەمەسىن ازىرلەۋ.

5. مىندەتتى الەۋمەتتىك مەديتسينالىق ساقتاندىرۋدى ساقتاندىرۋ جانە ىنتىماقتاستىق بولىكتەرىنە قاراي ءبولۋ.

قۇرمەتپەن، «اق جول» فراكتسياسىنىڭ دەپۋتاتتارى:

ە.بەيسەنباەۆ

ا.پەرۋاشەۆ

د.ەسپاەۆا

ك.يسا

ە.بارلىباەۆ

ا.سادىكوۆ

Abai.kz