مەملەكەت قايراتكەرى، عالىم جاقسىبەك قۇلەكەەۆ ەكس پرەزيدەنت نۇرسۇلتان نازارباەۆتى كەشىرۋدى سۇرادى، - دەپ حابارلايدى Dalanews.kz.

جاقسىبەك قۇلەكەەۆ نازارباەۆتىڭ 30 جىل بويى اتقارعان ەڭبەگى زور ەكەنىن ايتادى.

ء"بارى بىردەي ول كىسىدەن تەرىس اينالىپ كەتتى دەپ ايتۋ قيىن شىعار. جانىندا جۇرگەن ازاماتتار بار. نازارباەۆتىڭ ءوزىن دە كەزەڭ-كەزەڭگە ءبولىپ قاراۋ كەرەك. العاش ەگەمەندىك العان كەزدە 2005 جىلعا دەيىن ەلباسى وتە ۇلكەن قىزمەت جاسادى. جالپى ەگەمەندىكتىڭ 30 جىلدىعىندا ەلباسىنىڭ اتقارعان ەڭبەگى زور. قازاقستاندى دۇنيەجۇزىنە تانىتتى، شەكارامىزدى بەكىتتى، ول كىسىنىڭ قابىلەتى وتە زور ازامات.

ال سوڭعى 10 شاقتى جىلدا ول كىسى ءوزىنىڭ بەدەلىن، بيلىگىن جەكە باسىنا، وتباسىنا كوبىرەك پايدالانىپ كەتتى. سودان حالىق شارشادى", - دەيدى قۇلەكەەۆ "سۇراۋى بار" YouTube-ارناسىنا بەرگەن سۇحباتىندا.

جاقسىبەك قۇلەكەەۆ نۇرسۇلتان نازارباەۆتى كەشىرۋدى سۇرادى.

"ەلباسى دا پەندە، ول دا اكە. ول دا اتا. نەمەرە، شوبەرە ءسۇيىپ وتىر. وتباسىنىڭ اينالاسىنداعىلارعا قاتىستى قوعامدا ايتىلىپ جاتقان پىكىرلەرگە و كىسى الاڭدامايدى ەكەن، قىنجىلمايدى ەكەن دەپ ايتۋ وتە قيىن. ول دا ەت پەن سۇيەكتەن جارالعان ادام عوي. مەنىڭشە، و كىسىنى ءدال قازىر تابالاۋدىڭ قاجەتى جوق. قولىمىزدان كەلەتىن بولسا، ەگەمەندىك ءۇشىن، كەلەشەك ۇرپاق ءۇشىن و كىسىنىڭ جاقسى اتىن ساقتاپ قالعان دۇرىس.

ەلباسى مەن ونىڭ اينالاسىندا جۇرگەن ادامداردىڭ وزبىرلىعىن نەمەسە قىلمىستىق ارەكەتىن ءبولىپ قاراعان ءجون دەپ ويلايمىن. پرەزيدەنتتىڭ ۇستاپ وتىرعان ساياساتى دا سونداي. مەملەكەت ءۇشىن، بولاشاق ۇرپاقتار ءۇشىن، ەگەمەندىكتىڭ تۋىن بەرىك قىلۋ ءۇشىن نازارباەۆتىڭ اتقارعان ءرولى وتە جوعارى. و كىسىنى قازىر قورلايتىن بولساق، ول – ەگەمەندىكتى قورلاعانمەن بىردەي نارسە.

سوندىقتان بۇل تۇرعىدا مەن حالىقتىڭ ەلباسىعا كەشىرىمدى بولعانىن قالار ەدىم. ال وتباسىنىڭ جاقىن مۇشەلەرى مەن وتباسىعا جاقىن ازاماتتار، جاقىندىعى بولماسا دا سول كىسىنىڭ جانىندا ءجۇرىپ كوپ پايداسىن كورگەن ازاماتتار بار. سولاردىڭ ءىسىن كەشىرۋ-كەشىرمەۋ جاساعان ءىس-ارەكەتتەرىنە، قىلمىسىنا بايلانىستى", - دەدى قۇلەكەەۆ.

ايتا كەتەيىك، قاڭتار وقيعاسىنان كەيىن اۋەجايعا اسىققان داريعا نازارباەۆا شەشەسىن ۇمىتىپ كەتكەن دەگەن اقپار تاراعان بولاتىن. DALA INSIDE تەلەگرام ارناسى وسى تۋراسىندا وي ءوربىتىپ، بىرقاتار قىزىقتى تەزيستەردى ورتاعا سالعان تانىمال ساياساتكەر جاقسىبەك قۇلەكەەۆتىڭ كىتابىنا قايتا ۇڭىلگەن بولاتىن.

قاڭتاردىڭ قارساڭىندا ەكس-پرەزيدەنت گەرمانيادا وتا جاساتقان "سانتەحنيك" ءىنىسى بولاتتىڭ كوڭىلى سۇراۋ ءۇشىن شامالعانعا كەلگەن.

جاعداي ۋشىققان تۇستا نازارباەۆ پەن كەيبىر اۋلەت وكىلدەرى بروندالعان كولىكپەن قىرعىز شەكاراسىن كەسىپ وتكەن. قىرعىز جەرىنە تابانى تيگەسىن، قاۋىپ بۇلتى سەيىلىپ، نازارباەۆ كلانى سول ارادان اۋەجايعا جەتكىزىلگەن، ءارى قاراي دۋباي قايداسىڭ دەپ اراب جەرىنە تارتىپ وتىرعان.

قۇلەكەەۆتىڭ ايتۋىنشا ءاليا اۋەلدەن-اق اراب امىرلىگىندە بولعان. بۇعان ونىڭ كەيىننەن ءوشىرىپ تاستاعان الەۋمەتتىك جەلىدەگى اككاۋنتى دالەل.

"سەرۆيس ءاليانىڭ ورنالاسقان جەرىن اۆتوماتتى تۇردە اراب امىرلىگى دەپ انىقتادى. جاريا تۇلعانىڭ اككاۋنتى كوكپەن بەلگىلەنسە، مۇنداي انىقتاما قويىلادى", – دەيدى ول.

قاڭتار كەزىندە نازارباەۆتىڭ باسقان كەشكەندەرىن كوزى قاراقتى قاۋىم شەت-شاعالاي بىلەدى. ال ەكس-پرەزيدەنتتىڭ تۇلا بويى تۇڭعىشى داريعانىڭ الماتىدان شىعا الماي، سورى قايناعانىن بىرەۋ بىلسە، بىرەۋ بىلمەس.

Abai.kz