زاڭ جوباسىن 66 دەپۋتات قولدادى، 5 دەپۋتات قارسى شىقتى. "شەتەل وكىلدەرى تۋرالى" زاڭ جوباسى جوگوركۋ كەڭەشتىڭ 14 ناۋرىز كۇنگى كۇن تارتىبىندە بولماعان، دەپ جازدى ازاتتىقتىڭ قىرعىز قىزمەتى. قۇجات سپيكەردىڭ ورىنباسارى نۇربەك سىدىعاليەۆتىڭ وتىنىشىمەن كۇن تارتىبىنە ەنگىزىلىپ، دەپۋتاتتار ونىڭ ۇسىنىسىن قولداعان. ازاتتىقتىڭ قىرعىز قىزمەتى قۇجات اسىعىس قابىلدانعانىن جازدى.

بۇعان دەيىن قۇجاتتى كونستيتۋتسيالىق زاڭناما جانە مەملەكەتتىك ۇيىمداستىرۋ كوميتەتى ماقۇلداعان. جوگوركۋ كەڭەس قۇجاتتى كوميتەت ەنگىزگەن وزگەرىستەرمەن بىرگە قابىلداعان. 20 اقپاندا كوميتەت زاڭ جوباسىنان "شەتەل وكىلدەرىن قىلمىستىق جاۋاپكەرشىلىككە تارتۋ تۋرالى" نورمانى الىپ تاستاعان.

"شەتەل وكىلدەرى" تۋرالى زاڭ جوباسىن 30 دەپۋتاتتان قۇرالعان توپ ازىرلەگەن. زاڭ جوباسى جاريالانعاننان كەيىن قۇجات سىنعا ۇشىراپ، دەپۋتاتتاردىڭ ءبىراز بولىگى قولدارىنان باس تارتقان. زاڭ جوباسىن بەلسەندى قولداعان دەپۋتات ناديرا نارماتوۆا ۇكىمەتتىك ەمەس جانە كوممەرتسيالىق ەمەس ۇيىمدار جىل سايىن گرانت الىپ، ونى نەگە جۇمساپ جاتقانى جونىندە ەسەپ بەرمەيتىنىن العا تارتقان.

جەرگىلىكتى بەلسەندىلەر، ۇكىمەتتىك ەمەس ۇيىمدار جانە حالىقارالىق ۇيىمدار زاڭ جوباسىن تالاي سىناعان. Human Rights Watch (HRW) ۇيىمى دا بىشكەكتى زاڭ جوباسىن كەرى قايتارۋعا ۇندەگەن.

ەۋرووداق مۇنداي زاڭ قابىلدانعان جاڭدايدا قىرعىزستان حالىقارالىق دونورلاردان ايىرىلىپ قالۋى مۇمكىن ەكەنىن ەسكەرتكەن.

Abai.kz