قازاقتا تامىرىن تەرەڭىنەن الاتىن داستۇرلەر كوپ. ءاربىر سالت-ءداستۇردىڭ ءوز زامانىنا ساي ءمان-ماعىناسى بار. ولاردىڭ ۇرپاقتان-ۇرپاققا قالىپ بىزگە جەتكەنىنەن بولەك، جەتپەگەنى قانشاما. سولاردىڭ ءبىرى – قىز الىپ قاشۋ.

بۇگىنگى ءوتىپ جاتقان قۇرىلتايدا پرەزيدەنت قىز الىپ قاشۋدى، كوپ ايەل الۋدى ۇلتتىق ءداستۇر ساناپ، ەل ىشىندە دارىپتەگىسى كەلەتىندەردى قولدامايتىنىن ءبىلدىردى.

«ەلىمىزدە قىز الىپ قاشۋدى، كوپ ايەل الۋدى ۇلتتىق ءداستۇر ساناپ، ەل ىشىندە دارىپتەگىسى كەلەتىندەر بار. بۇل – مۇلدەم اقتاۋعا بولمايتىن زاڭسىزدىق، قاراڭعىلىق، ءتىپتى، ماسقارا تىرلىك. وركەنيەتتى قوعامدا ءار ازاماتتىڭ ابىرويى، قۇقىعى جانە بوستاندىعى باعا جەتپەس قۇندىلىق بولۋى كەرەك. سوندىقتان مۇنداي اقىلعا سىيمايتىن ارەكەتتەردى قاتاڭ سىنعا الۋ جەتكىلىكسىز. وعان قۇقىقتىق باعا بەرىلىپ، ءبىرجولا توسقاۋىل قويىلۋعا ءتيىس.
«ءداستۇردىڭ وزىعى بار، توزىعى بار». اتا جولىن ساقتايمىز دەسەك، عاسىرلار بويى بابالارىمىز ۇستانعان اسىل ءدىنىمىزدى ساقتايىق. ءداستۇرلى يسلام – حالقىمىزدىڭ ۇلتتىق بىرەگەيلىگىن تانىتاتىن باستى قۇندىلىقتىڭ ءبىرى. ءبىز ونى بەرىك ۇستانۋ ارقىلى ەكسترەميزمگە جانە كەرتارتپالىققا قارسى تۇرا الامىز. جۇرتىمىزدىڭ وزىنە عانا ءتان ەرەكشەلىگى بار. ءبىز وسى مادەني كودىمىزدى ساقتاپ، بابالار جولىمەن ءجۇرۋىمىز كەرەك»، – دەيدى توقاەۆ اتىراۋدا وتكەن ۇلتتىق قۇرىلتايدا.

Abai.kz