«استانا جاستارى» جاستار رەسۋرستىق ورتالىعىنىڭ ەرىكتىلەرى 15 ناۋرىز كۇنى قايىرىمدىلىق اكتسياسىن وتكىزدى، دەپ حابارلايدى ەلوردا اكىمدىگىنىڭ رەسمي سايتى.

قازاقستاندا ناۋرىزنامنىڭ ونكۇندىگى ءوتىپ جاتىر. بۇگىن قايىرىمدىلىققا، جاناشىرلىققا ۇندەيتىن مەيىرىمدىلىك كۇنى اتاپ وتىلەدى. وسىعان بايلانىستى ەرىكتىلەر كوممۋنالدىق قىزمەتكەرلەرگە باۋىرساق، شوكولاد جانە ىستىق شاي ۇلەستىردى.

«بۇگىنگى اكتسيامەن ءبىز ادامداردى مەيىرىمدىلىككە، جاناشىرلىققا جانە جاقسى قارىم-قاتىناسقا ۇندەگىمىز كەلەدى»، - دەپ ءبولىستى ەرىكتى ارۋجان داۋلەتياروۆا.

«استانا جاستارى» ەرىكتىلەر قوزعالىسىن دامىتۋ ءبولىمىنىڭ باسشىسى ەلۆيرا ەسمۇحانوۆا مۇنداي اكتسيالاردى وتكىزۋدىڭ جانە قايىرىمدىلىق كۇنىن اتاپ ءوتۋدىڭ ماڭىزدىلىعىنا توقتالىپ ءوتتى.

«استانا جاستارى» ەرىكتىلەرىمەن بىرگە ءتىپتى از مۇمكىندىكپەن دە ءبىر-بىرىمىزگە كومەكتەسۋگە بولاتىنىن كورسەتكىمىز كەلدى. وقۋشىلار كوممۋنالدىق قىزمەتكەرلەرگە ارناپ اكتسيا وتكىزۋ باستاماسىن كوتەردى. ولار اۋا رايىنىڭ قولايسىزدىعىنا قاراماستان قالادا ءتارتىپ پەن تازالىقتى ساقتايدى»، - دەدى ەلۆيرا ەسمۇحانوۆا.

ءوز كەزەگىندە تازالىق ماماندارى جاستارعا العىس ايتىپ، ناۋرىز مەرەكەسىمەن قۇتتىقتادى.

ايتا كەتەيىك، «استانا جاستارى» جاستار رەسۋرستىق ورتالىعىنىڭ قاتارىندا 5000-نان استام ەرىكتى بار.

ەرىكتىلەر ىستىق شاي مەن باۋىرساقتاردى تاراتۋمەن قاتار، قار كۇرەۋگە كومەك كورسەتەدى، حالىقتىڭ الەۋمەتتىك وسال توپتارىنان شىققان وتباسىلارعا ازىق-تۇلىك سەبەتتەرىن تاسىمالدايدى. ەلوردادا يگى ىستەر مارافونى جالعاسىپ جاتىر. اكتسيانىڭ باستى ماقساتى – بارىنشا كومەك كورسەتۋ.

ەستەرىڭىزگە سالا كەتەيىك، «ناۋرىز مەيرامىن» مەرەكەلەۋ اياسىندا ەلوردادا 200-گە جۋىق ءىس-شارا وتەدى. قالا تۇرعىندارى كونتسەرتتەرگە، مەرەكەلىك باعدارلامالارعا، كورمەلەرگە، قويىلىمدارعا، ۇلتتىق سپورت تۇرلەرى بويىنشا سپورتتىق جارىستارعا، حالىقتىق مەرەكەلەرگە جانە ت.ب. قاتىسا الادى.

ەسكەرتۋ: سۋرەت استانا قالاسى اكىمدىگىنىڭ سايتىنان الىندى.

Abai.kz