استانا قالالىق سوتىنىڭ ءباسپاسوز قىزمەتى 20 ناۋرىزدا ازاتتىققا سامات ابىشكە ۇكىم شىققانىن راستادى، دەپ حابارلايدى ازاتتىق راديوسى. 

الايدا قۇپيا ءىس ەكەنىن العا تارتىپ، قاي كۇنى ۇكىم شىققانىن ايتپادى. سوت تاراتقان حابارلامادا سامات ءابىش "سوتتا كىناسىن تولىق مويىنداپ، شىن جۇرەكتەن وكىنگەنى" جازىلعان.

سوت ونىڭ "جاس بالالارىنىڭ بولۋىن جانە ونىڭ شىن جۇرەكتەن وكىنۋىن" ەسكەرىپ، جازاسىن جەڭىلدەتكەن. سامات ءابىش قاڭتار وقيعاسىنان كەيىن ۇقك توراعاسىنىڭ ءبىرىنشى ورىنباسارى قىزمەتىنەن بوساتىلعان.

2022 جىلى ماۋسىمدا جۋرناليستەر سۇراعىنا جاۋاپ بەرگەن باس پروكۋراتۋرا وكىلى "سامات ءابىش الدەبىر ءىس بويىنشا تەرگەۋ اياسىندا" ەكەنىن مەڭزەگەن. بىلتىر شىلدەنىڭ سوڭىندا سامات ابىشتەن "كارىم ءماسىموۆ پەن ونىڭ اينالاسىنداعى وزگە دە لاۋازىمدى تۇلعالار ءىسى" بويىنشا جاۋاپ الىنعانى تۋرالى حابار تاراعان. ول كەزدە ۆەدومستۆو سامات ءابىشتىڭ تەك قانا "كۋاگەر" ەكەنىن العا تارتىپ، ونىڭ ۇستىنەن قىلمىستىق ءىس قوزعالماعانىن مالىمدەگەن.

2023 جىلى قىركۇيەكتە سامات ءابىش قىلمىستىق كودەكستىڭ "لاۋازىمىن اسىرا پايدالانۋ" بابى بويىنشا كۇدىكتى اتانعانى بەلگىلى بولدى.

45 جاستاعى سامات ءابىش – قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ ءىنىسى ساتىبالدى نازارباەۆتىڭ ۇلى. ول 2000 جىلى ۇقك اكادەمياسىن، 2002 جىلى رەسەي سىرتقى بارلاۋ قىزمەتىنىڭ اكادەمياسىن بىتىرگەن.

2006-2010 جىلدارى ادىلەت مينيسترلىگى تىركەۋ كوميتەتىنىڭ ورىنباسارى، توراعاسى، جاۋاپتى حاتشىسى بولعان. 2013-2015 جىلدارى ۇقك توراعاسىنىڭ ورىنباسارى بولدى، 2015-2022 جىلدارى ۇقك توراعاسىنىڭ ءبىرىنشى ورىنباسارى بولعان.

Abai.kz