بۇگىن ەلورداداعى «ارعىماق» ات-سپورتتىق ساۋىقتىرۋ كەشەنىندە ناۋرىز مەيرامى اياسىندا ۇلتتىق سپورت كۇنىنە ارنالعان «ناۋرىزناما: ۇلتتىق سپورت كۇنى» اتتى مەرەكەلىك ءىس-شارا ءوتتى.

ءىس-شاراعا قر تۋريزم جانە سپورت ءمينيسترى ەرمەك مارجىقپاەۆ, استانا قالاسى اكىمىنىڭ ورىنباسارى ەسەت بايكەن, قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, ۇلتتىق سپورت ارداگەرلەرى، ۇلتتىق سپورت فەدەراتسيالارىنىڭ پرەزيدەنتتەرى، سپورتشىلار، ديپلوماتيالىق ميسسيالاردىڭ باسشىلارى مەن وكىلدەرى، سونداي-اق ەلوردا تۇرعىندارى مەن قوناقتارى قاتىستى.

تۋريزم جانە سپورت ءمينيسترى ەرمەك مارجىقپاەۆ ءوزىنىڭ قۇتتىقتاۋ سوزىندە بۇگىنگى تاڭدا ءبىزدىڭ ەلىمىزدە ۇلتتىق سپورت تۇرلەرىنە دەگەن ەرەكشە قىزىعۋشىلىق پەن تانىمالدىلىق ارتىپ كەلە جاتقانىن ەرەكشە اتاپ ءوتتى.

«قازاقتىڭ ۇلتتىق ويىندارى – مادەني-پاتريوتتىق تاربيە بەرۋدە ۇتىمدى قۇرال. دەنساۋلىقتى نىعايتۋعا، سالاۋاتتى ءومىر سالتىن ناسيحاتتاۋعا ەلەۋلى سەپتىگىن تيگىزەدى. بۇگىن ەل ىشىندە وتكىزىلىپ جاتقان ات جارىستار، قۇسبەگىلىك جانە اسىق اتۋ، توعىزقۇمالاق، ساداق تارتۋ سياقتى تۋرنيرلەر ازاماتتارعا شىنايى مەرەكە سالتاناتىن سەزىنۋگە مۇمكىندىك بەرۋدە» - دەدى مينيستر.

ءوز كەزەگىندە قر ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ ەلىمىزدە ناۋرىز مەيرامىن تويلاۋدىڭ جاڭا تۇجىرىمداماسى اياسىندا 20 ناۋرىزدىڭ ۇلتتىق سپورتقا ارنالۋى بۇكىل ۇلتتىق سپورت ءۇشىن قۋانىشتى جاڭالىق ەكەنىن اتاپ ءوتتى.

«سوڭعى جىلدارى مەملەكەت باسشىسى قاسىم-جومارت كەمەلۇلى توقاەۆتىڭ قولداۋىمەن ەلىمىزدە ۇلتتىق سپورت قارقىندى دامىپ كەلەدى. بيىل قىركۇيەك ايىندا ەلىمىزدە پرەزيدەنتتىڭ باستاماسىمەن، 5-ءشى دۇنيەجۇزىلىك كوشپەندىلەر ويىندارى وتەدى. بۇل اۋقىمدى حالىقارالىق ءىس-شارا ۇلتتىق سپورتتى ودان ءارى دامىتۋعا تىڭ سەرپىن بەرەدى» - دەدى يسلامبەك سالجانوۆ.

بۇدان سوڭ ءسوز سويلەگەن استانا قالاسى اكىمىنىڭ ورىنباسارى ەسەت بايكەن جينالعانداردى مەيراممەن قۇتتىقتاپ، وسى مەرەكە كۇندەرى ەلوردانىڭ بارلىق اۋدانىندا ۇلتتىق سپورت تۇرلەرى بويىنشا جارىستار وتەتىنىن اتاپ ءوتتى.

مەرەكەلىك ءىس-شارا اياسىندا كوكپار، اۋدارىسپاق، تەڭگە ءىلۋ، قىز قۋدان كورسەتىلىمدەر جانە توعىزقۇمالاق پەن اسىق اتۋدان شەبەرلىك سىنىپتارى ءوتتى. قوناقتارعا قازاقى تازى جانە بۇركىت كورسەتىلىپ، قۇسبەگىلىك ونەر تانىستىرىلدى.

سونىمەن قاتار، كوكپاردان استانا مەن اقش قۇرامالارى اراسىنداعى جولداستىق كەزدەسۋ كورەرمەندەر ءۇشىن كەرەمەت توسىنسىي بولدى.

مەرەكەگە وراي ءوزىنىڭ جەتىستىكتەرىمەن ۇلتتىق سپورتتى دارىپتەپ جۇرگەن ۇلتتىق سپورت ارداگەرلەرى مەن قايراتكەرلەر ماراپاتتالدى.

ولاردىڭ قاتارىندا كوكپاردان كسرو-نىڭ توعىز دۇركىن چەمپيونى ءابىلحان داۋىلباەۆ، توعىزقۇمالاقتان قر ەكى دۇركىن چەمپيونى مەيرامقۇل نوعايباەۆ, قازاق كسر ەڭبەك سىڭىرگەن جاتتىقتىرۋشىسى جۇمابەك مەيرامعاليەۆ, بەلگىلى سپورت ءجۋرناليسى، جازۋشى نەسىپ ءجۇنىسبايۇلى, قر ەڭبەك سىڭىرگەن جاتتىقتىرۋشى قۇلامحان جاقىپوۆ, اسىق اتۋدان ۇلتتىق قۇرامانىڭ باس باپكەرى جومارت سابىرجانوۆ, اتبەگى مەيرامبەك چاكەنوۆ بار.

«ۇلتتىق سپورت ارداگەرى رەتىندە ەڭبەگىمىزدى ەلەپ، ماراپاتتاپ جاتقانىنا قۋانىشتىمىز. قازىر ەلىمىزدەگى جاس سپورتشىلارعا مۇمكىندىك كوپ. الداعى 5-ءشى دۇنيەجۇزىلىك كوشپەندىلەر ويىندارىندا ۇلتتىق قۇرامامىزعا جەڭىس تىلەيمىن», - دەدى ءابىلحان داۋىلباەۆ.

ايتا كەتەيىك، قر ۇلتتىق سپورت قاۋىمداستىعىنىڭ قۇرامىنا بۇگىندە 10 فەدەراتسيا كىرەدى: بايگە، كوكپار، اۋدارىسپاق، ساداق اتۋ، جامبى اتۋ، تەڭگە ءىلۋ، قۇسبەگىلىك، اسىق اتۋ، «JORYQ» جانە ت.ب. وتكەن جىلى فەدەراتسيا سپورتشىلارى 12 حالىقارالىق جارىسقا قاتىسىپ، 95 مەدال جەڭىپ الدى، ونىڭ 35-ءى – التىن.

Abai.kz