قازاقستانداعى اۋىلدار سانى ازايۋدا. سوڭعى 10 جىلدا ولاردىڭ سانى 582-گە كەمىگەن، دەپ حابارلايدى "ادىرنا" ۇلتتىق پورتالى. بۇل تۋرالى ۇكىمەتكە ۇلتتىق ەكونوميكا ءمينيسترى نۇرلان بايبازاروۆ باياندادى.

«سوڭعى 10 جىلدا اۋىلدىق ەلدى مەكەندەردىڭ سانى 6838-دەن 6256-عا نەمەسە بىلايشا ايتقاندا 582 بىرلىككە قىسقاردى. نەگىزىنەن حالقى 50-دەن اسپايتىن اۋىلداردا قىسقارتۋ بايقالدى، حالقى جاقىن ماڭداعى ەلدى مەكەندەرگە بىرىكتىرىلدى»، - دەدى مينيستر.

قازاقستاندا 6256 اۋىلدىق ەلدى مەكەن بار، ولاردا 7,6 ميلليون ادام تۇرادى، بۇل ەل حالقىنىڭ 38,4 پايىزىن قۇرايدى. بۇل رەتتە تابىسى ەڭ تومەنگى كۇنكورىس دەڭگەيىنەن تومەن اۋىل حالقىنىڭ ۇلەسى 7,2%، جۇمىسسىزدىق دەڭگەيى 4,7% قۇرايدى. ءوزىن-ءوزى جۇمىسپەن قامتىعانداردىڭ ۇلەسى 33% نەمەسە 1,2 ملن ادامدى قۇرايدى.

2023 جىلى اۋىلداردى نەگىزگى قىزمەتتەرمەن قامتاماسىز ەتۋ دەڭگەيى 64,3% قۇرادى، بۇل 2022 جىلمەن سالىستىرعاندا 2,1 پايىزعا ارتىق. بۇل تۇستا نىساندار مەن قىزمەتتەردىڭ ەڭ جوعارى ۇسىنىلۋى ماڭعىستاۋ وبلىسىندا – 72,4%، اتىراۋ وبلىسىندا – 70% جانە اقتوبە وبلىسىندا – 69,6% بايقالادى.

قاۋىپسىزدىك دەڭگەيىنىڭ تومەندىگى بويىنشا: شىعىس قازاقستان وبلىسىندا – 58%، ۇلىتاۋدا – 57% جانە ابايدا – 55,4%.

«سونىمەن، قاۋىپسىزدىك دەڭگەيى جوعارى اۋىلداردىڭ سانى 1296 بىرلىكتى قۇرايدى، بۇل 2022 جىلمەن سالىستىرعاندا 169 بىرلىككە ارتىق. بۇل رەتتە تابىس دەڭگەيى تومەن اۋىلداردىڭ ۇلەسى 1676 اۋىلدان 1399 اۋىلعا دەيىن ازايدى. جالپى، اۋىل تۇرعىندارىنىڭ ءومىر ءسۇرۋ ساپاسىن جاقسارتۋ جانە وڭىرلىك ستاندارتتارمەن قامتاماسىز ەتۋ دەڭگەيىن ارتتىرۋ ماقساتىندا مينيسترلىك مۇددەلى مەملەكەتتىك ورگاندارمەن جانە اكىمدىكتەرمەن بىرلەسە وتىرىپ، بىرقاتار جۇيەلى شارالاردى جۇزەگە اسىرۋدا»، - دەپ قوستى بايبازاروۆ.

شەنەۋنىكتەر اۋىلدىق اۋماقتاردىڭ الەۋمەتتىك-ەكونوميكالىق الەۋەتىن اشۋعا ارنالعان قازاقستان رەسپۋبليكاسىنىڭ 2023-2027 جىلدارعا ارنالعان اۋىلدىق اۋماقتاردى دامىتۋ تۇجىرىمداماسىن جۇزەگە اسىرۋدا.

Abai.kz